1 Ieremia enai e kau herevadia, Iuda taudia iboudiai Aigupto tanona ai e nohova herevadia, bini. Idia na Migdol ai bona Tapanese ai bona Memefisi ai bona Pataro tanona ai e nohova. 2 Iehova Sabaota, Israel Diravana, na ini e gwau tomamu: Dika idoinai Ierusalem latanai bona Iuda hanuadia iboudiai latadiai vada na hadihoa na vada o itaia. A itaia, ina nega ai idia na vada e vahu, asi tauna ta idia lalodiai e nohomu, 3 edia kara dikadia daidiai. Unu kara amo idia ese e habadugu; badina be idia na ela, muramura mai bonadia e gabu, bona dirava idaudia, idia asi dibadia, umui asi dibamui, bona senemui asi dibadia diravadia, isiaidia e lao heni. 4 Ḡau tamona, egu peroveta hesiai taudia na siaidia havara-havara dekemui ai, nato, Mani ina kara dika-rohorohona, na inai heniamu ḡauna, na basio karaia. 5 A idia na asie kamonai, taiadia asie kirara, edia kara dika asie rakatania, bona muramura mai bonadia igabudia dirava idaudia ediai na asie hadokoa. 6 Taunabunai egu badu-garagara bona egu badu na bubudia dobi, Iuda hanuadia ai bona Ierusalem ariaradia ai e ara; bena vada e ḡaḡae bona vada e vahu, ina dina ai heḡereḡerena. 7 Harihari Ḡaubada Iehova Sabaota, Israel Diravana, na ini e gwau tomamu: Dahaka dainai ina dika badana o karaiamu, umui sibomui ihadikamui, bena tau bona hahine, mero karukaruna bona meromero, na emui amo eme henege daure, Iuda bogaragina amo, bona kwabukwabumui ta basine noho. 8 Badina be dahaka imamui ḡaukaradia amo o habadugumu? Dahaka dainai muramura mai bonadia o gabudiamu dirava idaudia edia, ina Aigupto tanona, vada o mai henia bona o noholaiamu tanona, lalonai; bena unu amo vada ba henege daure, heuduguirai bona hegonagonalai ḡauna ai ba hahelao, tanobada besedia iboudiai bogaragidiai. 9 Senemui edia kara dika, Iuda pavapavadia mai adavadia ida edia kara dika, bona umui mai adavamui ida emui kara dika, Iuda tanona ai bona Ierusalem ariaradia ai e karava ḡaudia, vada o lalodia boio a? 10 Ema bona ina dina idia na asie hahemanau, bona asie gari, bona egu taravatu bona egu hiahedua herevadia, umui bona senemui vairamui ai na ato ḡaudia, lalodiai asie raka.

11 Taunabunai, Iehova Sabaota, Israel Diravana, na ini e gwau tomamu: A itaia, vairagu baina ha-aukaia emui ai, ihadikamui totona; Iuda idoinai baina negea daure. 12 Iuda taudia kwabukwabudia, vairadia vada e ha-aukadia Aigupto tanona baema bona bae noholaia taudia, na baina abidia, iboudiai baina ha-oredia; Aigupto tanona ai bae hekida diho, dare bona doe amo bae mase ore; asi dagidia bona mai dagibadadia taudia na dare bona doe ese bae hamasedia; idia na heihi ihirai bona hahegari bona heuduguirai bona heḡonaḡonalai ḡaudia ai baela. 13 Aigupto tanona ai e nohomu taudia na edia dika davana baina henidia, Ierusalem davana na henia heḡereḡerena, dare bona doe bona dai-hanai gorerena amo; 14 taunabunai, Iuda taudia kwabukwabudia Aigupto tanona inoholaina totona; ema taudia, na ta basine heau mauri eiava basine roho mauri eiava Iuda tanona, harihari e uramu bae lou henia, na basine lou lao; badina be basie lou lao, a heau mauri taudia ta ta mo.

15 Bena dibadia adavadia ese muramura mai bonadia na duava idaudia ediai vada e gabu taudia iboudiai, bona badibadidiai e giniva hahinedia iboudiai, hebou bada-hereana, Pataro ai, Aigupto tanona ai, e nohova taudia iboudiai, ese Ieremia e haere henia, eto, 16 Hereva ta vada o hamaorolaimai Iehova ladana ai, to ai na basia kamonai henimu. 17 A vada a gwaurai hamata karadia iboudiai baia kara, muramura mai bonana baia gabua guba pavapavana hahinena ena, bona inuinu bouboudia baia bubu nege ia ena, a karaia guna heḡereḡerena, ai bona senemai, bona emai pavapava bona emai lohia, Iuda hanuadia ai bona Ierusalem ariaradia ai. Badina be una negana ai, amai aniani na momo, bona namomai na e bada e laova, dika ta asia itaia. 18 A guba pavapavana hahinena ena muramura mai bonana igabuna bona ena inuinu bouboudia ibubudia a hadokoa murinai, ai na ḡau iboudiai vada e dabu bona dare bona doe ese vada e haoremai. 19 Hahine ma eto, Ai na muramura mai bonana a gabua, guba pavapavana hahinena ena, bona inuinu bouboudia a bubu nege ia ena, negana ai, adavamai asie gwau maoro bena ai ese ena ataga a kara latadiai na mai ia laulauna bona inuinu bouboudia a bubu nege ia ena danu a?

20 Bena Ieremia ese taunimanima iboudiai, tatau bona hahine, unu e haere henia toma taudia iboudiai, na e hereva henidia, eto, 21 Hari muramura mai bonadia, Iuda hanuadia ai bona Ierusalem ariaradia ai o gabu ḡaudia, umui bona senemui, emui pavapava bona emui lohia, bona tano taudia, Iehova ese se laloa tao a? Ia ese se helalolaia une a? 22 Iehova ena haheauka emui kara havara bona emui kara dika-rohorohodia ediai vada e ore; taunabunai emui tano na vada e ḡagae bona vada e vahu, heuduguirai ḡauna ai vada ela, asi inoholaina tauna ta, ina dina ai e miamu heḡereḡerena. 23 Muramura mai bonadia o gabu dainai, bona Iehova o kara dika henia bona Iehova gadona asio badinaia bona ena taravatu bona ena hahedua herevadia bona ena haheḡani lalodiai asio raka dainai, ina dika na latamui ai vada e kau, ina dina ai heḡereḡerena.

24 Ieremia ese taunimanima iboudiai bona hahine iboudiai e hamaorodia, eto, Iuda taumui Aigupto tanona ai o nohomu iboumui ai, Iehova ena hereva ba kamonai. 25 Iehova Sabaota, Israel Diravana, na ini e gwau tomamu: Umui bona adavamui ese udumui amo vada o gwauraia bona imamui amo vada o karadia, oto “Ai na momokani emai gwauhamata karadia baia kara, guba pavapavana hahinena ena muramura mai bonaula baia gabua bona inuinu bouboudia baia bubu nege”. Benaini, emui gwauhamata ba hamomokanidia bona karadia ba kara. 26 Taunabunai, umui Iuda taumui Aigupto ai o nohomu iboumui ai, Iehova ena hereva ba kamonai. Iehova na e tomu: A itaia, lau ladagu herea-daena bagunai vada na gwau hamata auka, Aigupto tanona idoinai Iuda tauna ta ese uduna amo lau ladagu basine hahanea, basineto “Ḡaubada Iehova e maurimu heḡereḡerena”. 27 A itaia, lau ese na itadia taomu, dika ihavarana dainai, dia namo ihavarana dainai. Iuda taudia iboudiai Aigupto tanona ai na dare bona doe ese bae ha-oredia, ela bona bae ore vaitani. 28 Bena dare amo bae roho mauri taudia na Aigupto tanona amo bae lou lao, Iuda tanona baela, a gadoidia mo; bona Iuda taudia kwabukwabudia iboudiai, Aigupto tanona ema bena e noholaia taudia iboudiai, na bae diba daika ena hereva baine gini, lauegu eiava idia edia. 29 Iehova na e tomu: Toana binai emui ai, emui dika davana baina henimui ina gabu ai, bena ba diba lauegu hereva na bae gini, umui ihadikamui totona. 30 Iehova ini e gwau tomamu: A itaia, lau ese Farao Hofra, Aigupto pavapavana, na inaina imadia ai bona ena mauri iabi-ohona dalana e tahuamu taudia imadia ai baina atoa, Sedekia, Iuda pavapavana, na Nebukadresara, Babulono pavapavana, ana inai tauna bona ena mauri iabi-ohona dalana e tahuava tauna, imana ai na atoa heḡereḡerena.