Mattup ere ki poone Pool yi riiŋe a ɗoŋ a
Tessaloni
Eŋ urzi kʼono ɗoŋ kun tʼoone adda mattup ettiyo
Ette mattup ere ki poone Pool yi riiŋe a ɗoŋ i ziipe addaŋ a Isa a geeger Tessaloni. Tessaloni todʼte geeger ki siiɗo Girek, a biza bar ki Mediterane. Pool geŋ ti laŋzayí Silas ti poone an iide ki Tessaloni me, an an di gizite Rabila Majjaanawa kʼIsa Almasi. Ɗoŋ ɓaadaŋ a Tessaloni geŋ an dʼumɓe urzi kʼAlmasi. Wo ɗe kʼita maŋ ɗoŋ miibi ti diine Yawudiyagi an iideʼŋ an an tʼeelite ono a kane ɗoŋ Tessaloni, kono an di-tooge kʼollige kʼono Pool ti Silas me. (Naabo ɗoŋ zina 17.1-10)
Saŋ maŋ Pool yʼa igibe Timote yʼa tiʼn wollo zemɓa ki Tessaloni geŋ, lekkiyadaŋ mummino koo maŋ? Aame Timote yʼiide wo yi-gime maŋ, yi di tʼîide taaya a Pool yʼede, an seeɗu daayum zakiɗi a urzi kʼIsa me, wo ɗe ɗoŋ oŋgoŋ ti diinayaŋ an di-toogiyo ki naabo kʼomɓo bizaŋ me. Wo kane anʼde, kama kʼIsa goppoŋ an niiba maŋ, a tʼisa ki bita. Wo ɗoŋ oŋgoŋ eedaŋ a digge kono maawaŋ ti laŋziyagaŋ ɓaadaŋ an tʼinda, wo Isa yi ki kama ye ɓotto. Kono kamo Pool yʼan di riiŋe mattup kono an tʼeele toogo, wo yʼan di ruute soŋ mummino me kama kʼAlmasi tʼisa me.
1
Toose ki Pool
1 Mattup ette i raaŋiya nuŋ Pool ti Silas wo Timote, a kune ɗoŋ ogiyso ti suma kʼIsa a geeger Tessaloni, kune ɗoŋ ki Meega Raa wo ki Galmeega Isa Almasi. Geŋ beeko ti toose ki Raa i koona egguŋ.
Lekkiyo wo zaapu kʼadde a Isa ki ɗoŋ Tessaloni
2 Adda tondiyo Raa ere kaye ay tondiyo gette, daayum ay rootiyo koɗuwo a Raa kono kune pay wo sunduguŋ ay gi-di seɗɗiyo ye. 3 Adda tondiyadey a ɗaana Meegiŋ Raa gette, kayeʼŋ ay elkiyo daayum a kune, a naabaguŋ ere a urzi zaapu kʼadduguŋ a Isa, a lekkiyaguŋ ere kun geyyiso Raa tʼadde soo, wo a zaapu kʼelkisaguŋ a Galmeegiŋ Isa Almasi ere kun seeɗu zakiɗi bini ɗaŋgu. 4 Zemɓa ki nuŋ, kaye ay suune Raa yʼunni giyye, yʼunni biire kun tʼize ɗoŋ ki yode. 5 Munɗa geŋ ay yi suune kono Rabila Majjaanawa kʼIsa ere ay un gizite gette, todʼ tʼiina di kune tʼurzi kʼono ɗoŋ uɗɗe ti bizey ɗaŋŋal ye, wo soŋ ti toogo ti noogiyo kʼUnde Kamilen̰, wo ay zuune adda kʼaddey ono ɗoŋ ay gizite geŋ kane ɗerec. Iŋkino kun suune lekkiyo ere kaye ay likke a diine kune gette, todʼte un dʼize beehiye a kune. 6 Kune kun tʼize ɗoŋ umɓe zina kaye wo ki Galmeega. Adda dabar ɓaadaŋ toŋ ono Raa kun diʼn ziiɗa tʼuŋsuwo ere ettiyo tʼurzi kʼUnde Kamilen̰* 1.6 Kun wollo adda mattup ki Naabo ɗoŋ zina 17.4-9.. 7 Iŋkino maŋ kune lekkiyaguŋ ti konso aa urzi a kane ɗoŋ pay i ziipe addaŋ a Isa a siiɗo Maseduwan ti Akayi geŋ, an di wolle an dʼozire eego. 8 Ono Galmeega geŋ ti di kune i-tiipe adda siiɗo Maseduwan ti Akayi ɗaŋŋal ye, wo soŋ rabila ere a urzi zaapu kʼadduguŋ a Raa gette i-tiipe a ume tuuku toŋ maŋ, iŋkino i ki dehu ay ki roote munɗa ye baa a urzi zaapu kʼadduguŋ me. 9 Ɗuwo pay an tôwwo taaya a tukki kaye anʼde, mummino a ettiyadey ere di kune gette kun ayni ziiɗa me, wo mummino kun di-gime ki tukki Raa me. Urzi loŋgayi kun dʼiili, kun di daaniya Raa ki kotto zeere kono kun i di naabe, 10 wo kun di delle Ulí Isa yʼa kimo ti kandaane. Yo Ulo geŋ Raa yʼa ti yʼ bilɗe ti diine ɗoŋ unto, wo yoŋ yʼin diʼn utta ti booro Raa ere aana.