Mattup ki Pool yi riiŋe a ɗoŋ a
Kolos
Eŋ urzi kʼono ɗoŋ kun tʼoone adda mattup ettiyo
Ette mattup ki pool yi riiŋe a ɗoŋ i ziipe addaŋ a Isa a geeger Kolos. Yode batum ki Kolos yi kʼiide ye, wo yʼa illiga ɗoŋ i ziipe addaŋ a ummey geŋ, an seeɗu zakiɗi a urzi zaapu kʼadde a Isa me. Geŋ Epapiras yoŋ wede an sooru soo ti Pool, an gizite urzi Rabila Majjaanawa ki poone me.
Ozzinagi miibi kʼita maŋ, ɗoŋ doolo an dʼiide ki Kolos, a ɗoŋ geeger gette an an di gizite ono ɗoŋ ti doolo a ki tʼiide a Rabila Majjaanawa ere ki Epapiras yʼan gizite gettiyo ye. Ɗuwo geŋ an an di ruute, wede yi dehu Raa yʼa yʼutte maŋ, yʼan dʼottile a maaleekiyagi wo a sulɗi ɗoŋ i ceeriyo ɗoŋ tudde. An an di ruute soŋ, an di walɗa ponde wo sulɗi ɗoŋ oŋgo kʼomɓo ulu. Epapiras yʼilliga maŋ, yʼa iide yʼa uuney Pool a geeger Room yoŋ daŋgay, maŋ yi di tʼîide taaya. Aame Pool yʼilliga iŋkino maŋ, yʼan di riiŋe mattup kono yʼan di kize a ɗoŋ Kolos geŋ, wedusu yi tʼoone uttiyo tʼurzi zaapu kʼadde a Almasi ɗaŋŋal.
1
Toose ki Pool
1 Mattup ette i raaŋiya nuŋ Pool wede zina kʼIsa Almasi aa Raa yi dehu, nuŋ ti leemadiŋ Timote, 2 a kune ɗoŋ ki Raa a geeger Kolos* 1.2 Kolos gette geeger n̰eŋko ki siiɗo Pirizi a kese peeɗo ti koliyo ki geeger kʼEpez, kʼa ozire kuɓɓaara meeda sire ɗoo miŋ kʼa ti tʼoone kollo., kune zemɓa ɗoŋ daayum i seeɗu zakiɗi a Almasi, i lekkiyo kettiyo kaŋ soo ti yode. Geŋ beeko ti toose ere ki Meegiŋ Raa i koona egguŋ.
Pool yi tondiyo Raa kono zemɓa a Kolos
3 Adda tondiyo Raa ere daayum kaye ay tondiyo kono kune gette, ay rootiyo koɗuwo a Raa Meeki Galmeegiŋ Isa Almasi, 4 kono ay illiga a lekkiyaguŋ ere kun zaapu adduguŋ a Isa Almasi wo kunʼni geyyiso ɗoŋ pay ki Raa me. 5 Kun isiyo iŋkino kono kun zaapu elkisaguŋ a munɗa wede Raa yʼun boohiyo a kandaane. Zaapu kʼelkisaguŋ gette, kun ti zuune tʼurzi kʼono ɗoŋ ɗerec ki Rabila Majjaanawa aame tʼiina di kune geŋ me. 6 Rabila Majjaanawa gette ti-teepiyo adda siiɗo pay, ti dʼaagulu aa undumu yʼohire wo yi dʼehiyo in̰n̰i. Geŋ iŋkino a tʼaaze di kune ti onniyo ere ki poone, kun dʼilliga ono ɗoŋ ki beeko Raa, wo kun di zuune geŋ ɗerec. 7 Dooyiso gette unni duuye Epapiras leema wede ki geyyiso, yode wede naabadey kaŋ soo. Yoŋ daayum yi seeɗu zakiɗi a naabo kʼAlmasi ere yʼisiyo a kune te. 8 Yoŋ yʼay tʼîide taaya a geyyiso ere Unde Raa tʼun ele adda kʼadduguŋ gette.
9 Kono kamo ti onniyo ere ay illiga rabilaguŋ geŋ, kaye toŋ ay kʼooliyo ye ti tondiyo Raa kono kune me. Ay yi tondiyo yʼun diʼn ôone ti suuniyo ki sulɗi ɗoŋ pay Raa addí i dehu, tʼurzi pay ki suuniyo kʼono ti eego soodo a elkiso kane ɗoŋ Unde Raa tʼun ele. 10 Iŋkino maŋ kun dʼaane kun di lekke aakede ɗoŋ i daaniya urzi Galmeega an di lekke, wo daayum kun dʼise munɗa wede ulbí i-dʼise uŋse. Geŋ kun dʼisa naabo pay ere tuuku beehiye wo Raa kun di yʼ suuna adda kʼadduguŋ a ceera ki ceeriyo. 11 Kaye ay tondiyo Raa yʼun tʼele toogo a ume tuuku toŋ maŋ tʼurzi toogadí ere meeda ki ki ti dooze ye gettiyo, kono kune a sulɗi pay kun di seeɗa zakiɗi ti omɓin̰e bini ɗaŋgu. 12 Kun rooto koɗuwo a Meega Raa ti uŋsuwo, yode wede un diʼn ize ɗoŋ aane a tʼooney aggadaŋ tʼadda sulɗi ɗoŋ yi boohiyo a kane ɗoŋzí adda mozikadí ere a toore gettiyo. 13 Yoŋ yʼin diʼn uɗɗe ti bey kʼEre toogo adda zimolo, wo yʼin diʼn tʼiide kʼadda moziko kʼUlí, yoŋ yi yʼ giyye ɓaadaŋ. 14 Tʼurzi yode geŋ Raa yʼin uɗɗe tʼadda kʼolɗiko, yʼin tʼize tambobino a olɗikadiŋ te.
Almasi mozigo tʼekki sulɗi pay
15 Raa geŋ wenɗa yi kʼaane yi ki yʼ wolle ye, wo in wolliyo Almasi geŋ, yoŋ miŋ Raa koyok.
Yoŋ geŋ yi jiire sulɗi ɗoŋ pay Raa yʼikkima,
16 kono tʼurzi yode, Raa yʼikkima sulɗi ɗoŋ pay a kandaane wo a siiɗo,
sulɗi ɗoŋ inʼni wolliyo wo ɗoŋ in kiʼn wolliyo ye toŋ maŋ,
kane undiyagi ɗoŋ pay a dandaane kʼume, kane ɗoŋ deero, kane ɗoŋ an dʼede urzi ki dokkiyo wo kane ɗoŋ an dʼede toogo.
Kane pay geŋ an ikkima Raa tʼurzi kʼAlmasi wo a Almasi.
17 Yoŋ ede too ki poone Raa yʼa okkima sulɗi pay geŋ me,
wo tʼurzi yode kane sulɗi pay geŋ an dʼôhire a umayaŋ me.
18 Yoŋ eego, wo tuddí kane ɗoŋ pay ogiyso ti suma kʼIsa.
Yoŋ eesiyo ki sulɗi pay,
yode wede i-bilɗe ki poone wo ki daayum ti diine ɗoŋ unto,
kono yʼa koone wede goole tʼekki sulɗi pay.
19 Ɗerec, yo Raa batum yi dihe
sulɗi ɗoŋ pay adda kʼaddí wo a tuddí geŋ, a tukkʼUlí toŋ iŋkino ede pây,
20 wo tʼurzi yode, Raa yʼa dihe sulɗi ɗoŋ pay yʼikkima,
ise a siiɗo ise a kandaane toŋ, an di-kimo an di tʼokkiƴe ti yode Raa.
Tʼurzi puuzo kʼUlí ere iɓi ekkʼundumu wede zaapu tʼekki bakadí kaŋ tontilko geŋ, Raa yʼan dʼele toose.
21 Wo kune toŋ ti kaaga kun likke aa torgagi dokki ti ɗaana Raa me. Kune ɗoŋ kʼaduzí, kun dʼilkite kun dʼise olɗiko, wo olɗiko kun ti tʼize. 22 Wo aŋkeŋ, tʼurzi kʼunto kʼUlí ere ki tudde gette, Raa yʼun tiʼn gimo kun tʼukkiƴe ti yode. Yʼize iŋkino kono yʼun diʼn tʼetta ɗaanadí kune ɗoŋ kamilen̰, daa kʼolɗiko munɗa, ɗuwo an kʼamɓe sunduguŋ kʼulsuko ye. 23 Wo geŋ i dehu kun di seeɗa daayum zakiɗi wo toogo a urzi zaapu kʼadduguŋ a Isa me, wo kun gi di leɗɗe dokki ye tʼurzi Rabila Majjaanawa ere in zaapu elkisadiŋ eego gette. Tode ere kun illiga, an di gizite a ɗuwo adda duniya pay, wo nuŋ Pool eŋ nʼa tʼize wede naabo kono ni kazita rabila gettiyo.
Naabo Pool a ɗoŋ ogiyso ti suma kʼIsa
24 Aŋkeŋ nuŋ ulbó uŋse a dabaradó ere nʼooniyo adda naabo ere nʼisiyo a kune gette. Iŋkino maŋ adda tuddó nʼa-ti ɗaŋge dabar kʼAlmasi ere yi ni wiike nʼa dabire kono tuddí te, wo to tuddí tiŋ kane ɗoŋ pay ogiyso ti suma yode. 25 Nuŋ ni tʼize wede naabo ki ɗoŋ pay ogiyso ti suma kʼIsa, a-tʼette a naabo ere Raa yʼo ele a beezó ki noogiyaguŋ: nuŋ nʼun di kizite ono Raa pay. 26 Ono geŋ kane munɗa wede tʼume kʼeesiyo ombiɗe a ɗoŋ pay, wo aŋkeŋ Raa yʼan tʼiiɗiba ita a ɗoŋzí. 27 Raa yʼa dihe yʼan di yʼ kize a ɗoŋzí munɗa wede ombiɗe geŋ, yoŋ goole i jiire wo laalayí ɓaadaŋ, Raa yi yʼize a nooga kane ɗoŋ pay Yawudiyagi ye. Wo kun wollo munɗa wede ombiɗe geŋ, yoŋ Almasi adda kʼadduguŋ, tʼurzi yode kun di zaapu elkisaguŋ a gooliko ere ki Raa gettiyo, kune toŋ adda kay. 28 Iŋkino maŋ kaye ay kazita rabila ki yode Almasi a ɗuwo pay. A wede tuuku toŋ ay yi di tookiyo kuudí wo ay di yʼ dooyiso tʼurzi suuniyo kʼono ɗoŋ pay, kono kane pay an tʼise ɗoŋ i-dirse a urzi lekkiyo ere kettiyo kaŋ soo ti Almasi. 29 Geŋ iŋkino ni naabiya wo ni ɗeyyiso ti toogo ere kʼAlmasi yʼo ele, tode gette ti naabiya adda kʼaddó ti toogo.
*1:2 1.2 Kolos gette geeger n̰eŋko ki siiɗo Pirizi a kese peeɗo ti koliyo ki geeger kʼEpez, kʼa ozire kuɓɓaara meeda sire ɗoo miŋ kʼa ti tʼoone kollo.