2
Yesus imwanyani ndramat hamou sangin imat
1 Lang hayah iyamulan, Yesus imui iya Kapernawum pe nongan ingau tehe Yesus kinmui kinsa wum. 2 Pwen ndramat hitun husawule, pe nondriya seu iyapolo pohokaram kene, masih ara ipep topwei tahu ndramat. Pe Yesus iro tiyani nongnan iya kili hu. 3 Pwen hu ndramat tiken husa, iyapolo hu mahaamou mepo huhiri ndramat hamou sangin imat, ara isa kili Yesus. 4 Pe wum indrap tahu ndramat pe hu kanlahiy para kahari ndramat ara kisa pakeh kili Yesus pwi. Pwen pe huhiri yiy iya payandroha wum, pe hurambuskehe payandroha wum hape, pe huyuwani yiy ma nokun iya pwan mbulmara Yesus. 5 Pwen Yesus inime lohongahu ipwotisingiy, pe ipwai iya kili ndramat mepo sangin imat ara ipa, “Noru, kuntali mwomwan atam.”
6 Hu ndramat tiken para hinuwani nongan para pwahanou hurompwan ara, pe huro lolohonge soyon iro ndriyahu hupa, 7 “Tehen tappeh ndramat aro iwong tehen tora? Yiy ipwasimiri Ngindrai, ndre? Ngindrai hamou opu ara ilahiy para kitali mwomwan.”
8 Indrou pwi ko, Yesus ara kinpahasani lohongahu pwen iro ndriyan, pe ipwai iya tahu ipa, “Tehen tappeh lohongai ara ita ndriya wawu? 9 Sehe nongan ara waison para kupwai kiya ta ndramat sangin imat? Ara waison para kupa, ‘Kuntali mwomwan atam,’ ndre ara waison para kupa, ‘Atine, awiri nokum pe arikai’? 10 Hapeko para wawu kapahasaniy tehe Noru Ndramat ara pwoke ita kili yiy iripo kol pwan para kitali mwomwan tahu ndramat …” Pwen ipwai iya kili ndramat sangin imat ara ipa, 11 “Yo upwai satam, atine, awiri nokum, pe ayau aya suwem.” 12 Indrou pwi, itine, iwiri nokun, pe iyau iya mawen mbulmarahu masih. Pwen hu ndramat masih mwoiwahu ihin pe huhuri ngala Ngindrai hupa, “Yowu ara konoho nime memelit tehen tora pwi.”
Yesus iyoh Lepi
13 Porosih aro, Yesus iyau imui iya poholeng para Ndran Makaiye Kaliliy, pe hu ndramat hitun iya husa kili yiy pe ihinuwani hu. 14 Pwen iro tikai iya pe inime ndramat hamou para poya sombulepat para takis* Eng: tax collector ta kapman.* Eng: government (“kapman” refers to the government of Rome) Yiy ngalan Lepi NdraAlpiyus. Yiy imimpwan ndroho mbulen tan, pe Yesus ipwai iya tan ipa, “Asaho ndruwo.” Pwen pe Lepi itine pe iho ndruwan.
15 Iyamulan hape, Yesus iro namnam iya seu ta Lepi. Pe hu ndramat para poya takis soyon, iyapolo hu ndramat soyon kultuwayihu ara mwomwan, huro namnam iyapolo Yesus pe hu ndramiran. Hu ndramat soyon tehen ara ngara hu koho ndruwan. 16 Pwen hu ndramira Parisiy tiken para hinuwani nongan para pwahanou, ara hunimei tehe Yesus iro namnam iyapolo hu ndramat kultuwayihu mwomwan pe hu ndramat para poya takis. Pe hupwai iya tahu ndramira Yesus hupa, “Tehen tappeh pe Yesus iro namnam iya sura hu ndramat para poya takis pe hu ndramat kultuwayihu mwomwan?”
17 Yesus ihilingi hu pe ipa, “Hu ndramat mwaniyehu hiyan ara andre hu kanna nime hu ndrokta pwi. Hapeko hu ndramat humwa, hu ara ko ngara hu kaya nime hu ndrokta. Yo kunsa para kuyoh hu ndramat kultuwayihu hiyan ara pwi; hapeko yo usa para kuyoh hu ndramat kultuwayihu mwomwan.”
Yesus iwong iya kultuw para kayuh anandrinai
18 Lang sih, hu ndramira Yohanes pe hu ndramira Parisiy huyuh anandrinai. Pe hu ndramat tiken husa pe hupwai iya kili Yesus hupa, “Paratappeh hu ndramira Yohanes pe hu ndramira hu Parisiy hutora yuh anandrinai, hapeko hu ndramiram, ara konoho yuh tehen tora pwi.”
19 Yesus ipwai iya tahu ipa, “Kapa hamou ndramat nakipo kowase yesou, tehen tappeh andre yowen hu kayuh anandrinai tandrohonga iro ndron kili hu? Pwi yoh! Yihu kanlahiy para kayuh anandrinai pwi, paratesah, iro ndron kili hu. 20 Hapeko lang itapo isa andre hu kawiri ndramat kinyesou ara kiya mawen kili hu, pe andre kinto kili yowen hu pwi. Pwen tandrohonga lang ara andre yowen hu kayuh anandrinai.
21 Hamou ndramat kinoho sorowe koyau hape howen pe kirapairaniy kiya sura koyau saken ara pwi yoh. Kapa tehen tora, koyau hape howen ara andre kindrohomwiri koyau saken pe kiya mwomwan masih. 22 Pwen tehen aliy o, hamou ndramat andre kinsongorani wain howen kiya nondriya pwisi wain saken ara pwi. Kapa tehen tora, pwen wain howen andre kitaluwe pwisi wain saken; pe wain howen iyapolo pwisi wain saken, ara maluwoh kene andre karahis. Pwen iya lohongai ara ko, hu ndramat ngara kasongorani wain howen kiya nondriya pwisi wain howen opu.”
Yesus iwong para kahaiyani lang Sapat
23 Lang sih Sapat, Yesus iyapolo hu ndramiran huro tokai nondriya piyang hambut. Pe hu ndramiran huro rih mbuwa wit* Eng: grain; wheat (wit) is one kind of grain; TP hayah. 24 Pwen pe hu Parisiy hunimei, pe hupwai hupa toro: “Akanimei, paratesah humbusi memelit mepo nonombun iya lang Sapat?”
25 Yesus isomwi hu ipa, “Wawu kannime titiye ta Ndrepit ndre pwi? Titiye ipa tehe Ndrepit iyapolo hu ndramiran anandrinahu pwi pe humundrui. 26 Aro ara irayah imwonen Apiyatar iro ndron payan tahu pris. Pwen Ndrepit isong iya nondriya numwa totohun ta Ngindrai pe iwiri ndrina nohun nonombun. Pwahanou ara ipa tehe hu pris opu andre kayan ndrina nohun ara, hapeko Ndrepit iya pe iya wiri ndrina nohun ara pe iyan pe ihang hu ndramiran i. Wawu nime titiye ara ndre pwi?”
27 Pwen ipwai iyatahu ipa, “Lang Sapat ara isarayah para kisopwat hu ndramat; hapeko hu ndramat para kasopwat lang Sapat, ara pwi. 28 Pwen pe Noru Ndramat ara yiy Yapane lang Sapat.”