Ukalata ughwa Paabhuli ku
Bhaefesi
Shiisho shikutangila
Ukalata uyu akasimbighwa nu Paabhuli mu chinja icha malongo mahaano na limo (60) bhwo uYeesu Kilisiti aapaapighwa. Shikulangisha ukuti uPaabhuli akasimba ukalata uyu bhwo ali mu nyumba iya bhapinyighwa.
UPaabhuli akabhasimbilagha abhandu abha mu kaaya aka Efesi. Akaaya ako kakabha ko kamu mu twaya tuutwo tukabha paase pa bhulongoshi ubhwa Looma. Akaaya ako kakafumukwa leka ku nongwa iya kuti yikabhaamwo inyumba iya chaala umukolo yuuyo ingamu yaake akabha ghwi Aatemi. Mu kaaya ako mukabha ni mbombo inyingi isha bhuchulushi na bhandu abha tuyiilo utwa luko nu luko. UPaabhuli akiikala mu kaaya ako ifyinja fibhili nu kwongela bhwo akubhamanyisha abhandu iNongwa iNyiisa.
Mwa kalata uyu uPaabhuli akabhakashanga abhiitiki mu lwitiko lwabho nu kubhalingaania muumwo bhakulondighwa ukubha pamupeene. Akabhabhuulagha aBhaefesi ukuti ku sila iya kumwitika Yeesu Kilisiti, uChaala akubhabhiika aBhayuuta na bhaabho bhataa Bhayuuta ukubha chibhughutila chimocheene. Akabhamanyishanga isha bhweghi, isha bhapaapi na bhaana bhaabho ni sha bhatumwa na bhomalafyale bhaabho. Soona, uPaabhuli akabhamanyishanga aBhaefesi ukuti uChaala akubhapoka abhandu bhooshi ku sila iya Yeesu Kilisiti nu kubhalingaania muumwo bhakulondighwa ukulwa ubhwite nu Seetano nu kumupoota. Pabhumalilo akubhasuuma aBhaefesi ukuti bhamwipuutilaghe.
1
Ukulamuka ukwa Paabhuli
1 Ukalata uyu akufuma kukwangu une ni Paabhuli nee uChaala aanyiitishiishe ukuti imbe mutumighwa ughwa Kilisiti uYeesu. Ingubhasimbila umwe mwe bhiitiki abha Chaala* 1:1 Abhiitiki abha Chaala Bhelenga ishu ilya Abheelu ku Mashu aMaheesha. mwe mukwikala mu kaaya aka Efesi,† 1:1 Mwe mukwikala mu kaaya aka Efesi Abhokalata bhamu abha bhwandilo bhatali na masimbo agha. mwe mukumwitika uKilisiti uYeesu.
2 Ingusuuma ukuti ichisa nu lutengaano ukufuma kwa Chaala uTaata ghwitu na kwa Malafyale ghwitu uYeesu Kilisiti fibhange pamupeene nuumwe mweshi.
UChaala atusayite ku nongwa iya
kubha pamupeene nu Kilisiti uYeesu
kubha pamupeene nu Kilisiti uYeesu
3 Apaalighwange uChaala, uTaata ughwa Malafyale ghwitu uYeesu Kilisiti, yuuyo atusayite ku sayo shooshi isha Mbepo uMwelu ukufuma kumwanya ku sila iya kubha pamupeene nu Kilisiti. 4 Bhwo uChaala akaali ukupela ichiisu, akatughana nu kutusala ukuti tubhe bhiitiki bhaake ku sila iya kubha pamupeene nu Yeesu Kilisiti. Akabhomba ulwo ukuti tubhe bheelu, soona bhaabho bhatali nu bhubhiibhi naabhumo pandaashi papaake. 5 UChaala akabha atumwile ukufuma kubhwandilo ukuti utwe tubhe bhaana bhaake ku sila iya Yeesu Kilisiti. Akabhomba ulwo ukukongana na muumwo shikamuhobhosha nu kukongana nu bhwighane bhwake yuuyo mwene. 6 Po tumupaalishange uChaala ku nongwa iya chisa chaake ichikulu chiicho atupiile ukughendela ku Mwana ghwake‡ 1:6 UMwana ghwake Bhelenga ishu ilya UMwana ughwa Chaala ku Mashu aMaheesha. umughanighwa.
7 Ku sila iya libhanda ilya Yeesu liilyo likakupuka pa chikobhekano, utwe twabhuliighwe, kwo kuti tuhobhokeliighwe imbiibhi shiitu shooshi. Akabhomba shooshi isho ku nongwa iya chisa chaake ichikulu. 8 Umwene akatupa ichisa chaake ichingi nu kutupela ukuti tushimanye inyingi nu kubhumanya ubhwanalooli bhwake. 9 UChaala atubhuulite ulubhaatiko lwake luulwo lutali pabhwelu ukukongana nu bhwighane bhwake bhuubhwo akatumula ukubhomba ukughendela kwa Kilisiti. 10 Ulubhaatiko lwake lwa kuti linga akabhalilo kaako akakabhaatika kaafika, indiakatubhungaanie pamupeene utundu twoshi tuutwo tuli kumwanya na tuutwo tuli pa chiisu nu kutubhiika ukubha paase pa bhulongoshi ubhwa Kilisiti. 11 Ku sila iya kubha pamupeene nu Kilisiti, uChaala atusalite utwe ukufuma kubhwandilo ukuti tubhe bhaana bhaake. Umwene akabhomba shooshi isho ukukongana nu lubhaatiko nu bhwighane bhwake 12 ukuti utwe twe tukabha bha kwanda ukumusubhaalila uKilisiti, tumupaalaghe uChaala ku nongwa iya bhukulumba bhwake.
13 Nuumwe mwe mutaa Bhayuuta muyipulikite indumi iya bhwanalooli, kwo kuti iNongwa iNyiisa iya kuti uChaala akubhapoka. Bhwo mwamwitika uKilisiti, uChaala akabhabhiika ichindindo icha kushimikisha ukuti mwe bhandu bhaake. Ichindindo icho ghwi Mbepo uMwelu yuuyo akafinga ukubhapa. 14 UMbepo uMwelu uyo ghwe yuuyo akushimikisha ukuti nalooli inditukapokeele fyoshi fiifyo uChaala akafinga ukubhapa abhandu bhaake nu kuti indiakatupoke lwoshi twe bhandu bhaake. UChaala apaalighwange ku nongwa iya bhukulumba bhwake.
UPaabhuli akubhiipuutila aBhaefesi
15 Po ku nongwa iya isho shooshi shiisho uChaala abhabhombiile na muumwo ingapulikagha isha kumwitika kwinyu uMalafyale uYeesu ni sha lughano lwinyu ku bhiitiki abha Chaala, 16 indakulita ukumupaalisha uChaala ku nongwa yiinyu bhwo ingubhakumbuka mu nyipuuto shangu. 17 Ingusuuma kwa Chaala ughwa Malafyale ghwitu uYeesu Kilisiti, uTaata ughwa bhukulumba ukuti abhape uMbepo ghwake yuuyo indiabhapange amahala nu kubhasetulila ukuti mumumanye uChaala akiisa. 18 Ingumusuuma uChaala ukuti abhiighule amaaso agha mu ndumbula shiinyu ukuti mulumanye akiisa ulusuubhilo luulwo tuli nalwo ku nongwa iya kuti atusalite ukubha bhiitiki bhaake. Soona ingumusuuma ukuti mushimanye isayo isha kuswighisha shiisho akafinga ukubhapa abhiitiki bhaake. 19 Soona ingwipuuta kwa Chaala ukuti mughamanye amaka ghaake muumwo makulu ngaani ku nongwa yiitu twe tukumwitika. Amaka agho ghaagho ghakubhomba imbombo mu ndumbula shiitu ghali ungati maka ghaake amakulu, 20 ghaagho akaghabhombela ukumushuusha uKilisiti nu kumubhiika ku kakono kaake aka kumwisa kumwanya ukwo. 21 Bhwo ali kumwanya ukwo, uKilisiti ghwi songo ukukinda abhomalafyale bhooshi, abha maka bhooshi, abhalongoshi bhooshi, abha bhukulumba bhooshi na bhaabho bhapeeliighwe ingamu isha lughindiko mu chiisu ichi na mu chiisu chiicho chikwisa. 22 UChaala amupiile uKilisiti amaka agha kulongosha utundu twoshi nu kumubhiika abhe ghwi Songo ughwa tundu twoshi ku nongwa iya chipanga isa muumwo umutu ghukulongosha umubhili. 23 Ichipanga chili ungati mubhili ughwa Kilisiti. Umwene ghwe yuuyo akuchipela ichipanga ukuti manye chisobhelighwange naakamu nu kutupela utundu twoshi ukuti manye tusobhelighwange pooshi pala.