BALUWA YA PAULI KWA
TITUSI
ULONGULELU
Chitabu cha Titusi ndi chimu ya sila baluwa mchechi sha Pauli shayandikili kwilata mundu mweni weka hela yayilatili lipinga lya vandu yivamjumilili Kilistu ha. Baluwa singi ndatu ndi 1Timotewu na 2Timotewu na Filimoni. Pauli amyandikilili Titusi, lakini ayandikili kucha wula akudayila yipikanishiwi na vandu vatangalili. Tukuwesha kumanya naha mweni pahimulili jumu yaki kucha ndundami, Titusi amanyili kala chilongu achi. Pamongapa Pauli ayandikili baluwa ayi gati ya myaka milongu sita na mitatu na milongu sita na muhanu kukandila pawonikili Yesu.
Pauli amlayili Titusi kulongosha mipinga ya vandu yivamjumilili Kilistu yivaveli muliwunguli lya Kileti. Pauli ayandikili baluwa ayi kwilata kumlagha Titusi mukushawula na kuvawula filongosi va mipinga ya yivamjumilili Kilistu. Avalayili ngimu wuwula wamlayili mubaluwa ya Timotewu. Baluwa yaki yikusasambula ndambu filongosi wa mipinga ya yivamjumilili Kilistu yivadayiliwa kuva na unofu mkomi. Vandu yivamjumilili Kilistu na filongosi vawu va majuva ava vakudayiliwa vavi ndemindemi kulembesha kwa chiganu kusighala muunofu mkomi wuudayiliwa kwa vala yivavelili muulongoshi.
Fivelili mugati kwa chikata,
Pauli akumlagha Titusi kuvashawula filongosi yivamtama Chapanga mungalilu yawu yonda. Sula ya 1:1-16.
Pambeli kandi mweni amlayili Titusi kuvawula vandu kwikala ngalilu ya kumtama Chapanga mungalilu yawu. Sula ya 2:1-3:11.
Mbelu, Pauli akuyandika filongu fya kumalilila. Sula ya 3:12-15.
1
1 Nenga Pauli ndumindumi wa Chapanga na ndundami wa Yesu Kilistu. Nenga shawuliwa kuwudindasha ujumilwa wa yivashawuliwili na Chapanga na kuvalongosha vawumanyi unakaka wa kwikala ndambu ya kumunowesha Chapanga.
2 Weni ndi wukutugayila shuvililu ya unofu wa jola, Chapanga akudeta udesi ha, atujangili ngalilu ya unofu chipindi mlima waveli wakali kulumbiwa, 3 na pachifikili chipindi cheni, alangushili muunjagila waki wawulandulili ngimu Malawu va Chapanga, mlowola wetu.
4 Ngukuyandikila yuwi Titusi, mwana wangu wa nakaka muujumilwa wutuveli na yuwi.
Kufuma kwa Chapanga tati wetu na Kufuma kwa Yesu Kilistu Mlowola wetu ngukuluvila usangi na kusika kufuma kwa Chapanga.
Chichuku cha Titu kula Kileti
5 Ngakulekili kuliwunguli lya Kileti kwanongwa ugolikeshi yila milandu yivelili yikali kupela na kuvashawula vavaha filongosi muchipinga cha yivamjumilili Kilistu mumbwani shosi. Kotoo kwivasuwa findikulayilili, 6 mvaha yalongosha chipinga cha vandu yivamjumila Kilistu ghavi mundu yangajila mbatiwa na yaveli na mwehi yumu hela na vana vaki vavi yivamjumila Yesu, vakotoo kuva na nditi na vangajila kupikana. 7 Mvaha chilongosi wa chipinga cha yivamjumila Kilistu yalolela filongu fya vandu ndi muwolukela wa chichuku cha Chapanga, ghavi mundu yangajila mbatiwa. Akotoo kuva na chinyuku, akotoo kuva na maya, akotoo kuva njayila, akotoo kuva muna ndewu na akotoo kuva yayikungashila mali kwa deha ya chindipa. 8 Ila ghavi yalibushila vandu na yadayila milandu ya usangi, yagola fyadayila Chapanga na mng'alili na yagola ngimu wufidayiliwa na yawesha kwilongosha mweni. 9 Awukamuli unjagila wula nakaka kucha ndambu wulilu yetu. Ndi daweshi kuvadindasha vengi kwa ng'ulilu ya nakaka na kulangusha wafu wa vala yivalimba ngu'lilu ayi.
10 Kwanongwa kuvaveli vandu vatangalili munu yivafumili mudeha ya Vayawudi, vala yivavalema filongosi na kuvajanga vandu kwa upufi wawu. 11 Uvapeshi filongu fyawu, kwanongwa vakuyashinganya nyumba yosi kwa kuwula findu fingajila kujumiliwa kuwuliwa, vakugola nahawu kwanatilu ya wafu ya kupata mbiya. 12 Hata mbuyi vawu yumu yaveli Mkileti, adetili, “Vakileti majuva vosi vakudetaya udesi, kandi vava kucha vang'ongolu va wafu, vabafu na vagata!” 13 Na mweni adetili nakaka, kwanongwa ayi, ukudayiliwa uvalakalili nendu, ili vavi na ujumilwa wa nakaka. 14 Vakotoo kuyendilela kukamulila himusi sha Chiyawudi singajila chindu na Malawu va vandu yivafuma kwa vandu yivalemili unakaka. 15 Kila chindu ching'alili kwa vandu vang'alili, lakini kwahela chindu chivelili ching'alili chivi kwa vala yivangajila kuva vang'alili na vangajila ujumilwa, kwa hala shawu na natilu sipighashiwa. 16 Vandu kucha ava vakwijuma vamumanya Chapanga, lakini ndambu yivagola vakumlema. Ndi vandu yivakalalisha munu na vanalukilu, vakujakwa ha kwa chindu chochosi chinofu.