1 ܘܵܠܹܐ ܝܠܵܗ̇ ܕܥܵܒ݂ܕܹܢ ܫܘܼܒ݂ܗܵܪܵܐ ܐܘܼܦ ܐܸܢ ܕܠܲܝܬ ܦܲܝܕܵܐ ܒܝܼܹܗ. ܐܵܕܝܼܵܐ ܒܸܬ ܫܲܪܹܝܢ ܒܚܸܙܘܹ̈ܐ ܘܒܓܸܠܝܵܢܹ̈ܐ ܡ̣ܢ ܡܵܪܲܢ. 2 ܟܹܐ ܝܵܕܥܹܢ ܚܲܕ ܐܢܵܫܵܐ ܒܡܫܝܼܚܵܐ ܕܡ̣ܢ ܩܲܕܡ ܐܲܪܒܲܥܣܲܪ ܫܸܢܹ̈ܐ ܦܝܼܫ ܠܹܗ ܡܘܼܪܡܵܐ ܠܫܡܲܝܵܐ ܕܬܠܵܬ. ܐܸܢ ܒܦܲܓ݂ܪܵܐ ܝܗܘܵܐ ܝܲܢ ܠܒܲܕܲܪ ܡ̣ܢ ܦܲܓ݂ܪܵܐ ܠܹܐ ܝܵܕܥܹܢ، ܐܲܠܵܗܵܐ ܟܹܐ ܝܵܕܹܥ. 3 ܐܵܢܵܐ ܟܹܐ ܝܵܕܥܹܢ ܗܘܵܐ ܚܲܕ ܗܵܕܟ݂ܵܐ ܐܢܵܫܵܐ، ܒܦܲܓ݂ܪܵܐ ܝܲܢ ܠܒܲܕܲܪ ܡ̣ܢ ܦܲܓ݂ܪܵܐ ܠܹܐ ܝܵܕܥܹܢ، ܐܲܠܵܗܵܐ ܟܹܐ ܝܵܕܹܥ، 4 ܕܵܐܟ݂ܝܼ ܦܝܼܫ ܠܹܗ ܡܘܼܪܡܵܐ ܠܦܲܪܕܲܝܣܵܐ ܘܫܡܝܼܥ ܠܹܗ ܗܹܡܸܙܡܵܢܹ̈ܐ ܕܠܹܐ ܐܵܬ‌ܝܼ ܠܗܲܡܙܘܼܡܹܐ، ܗܹܡܸܙܡܵܢܹ̈ܐ ܕܠܹܐ ܝܠܵܗ̇ ܩܵܢܘܿܢܵܝܬܵ‌ܐ ܠܐܢܵܫܵܐ ܕܗܲܡܙܸܡ ܠܗܘܿܢ. 5 ܒܸܬ ܥܵܒ݂ܕܹܢ ܫܘܼܒ݂ܗܵܪܵܐ ܒܗܵܕܟ݂ܵܐ ܐܢܵܫܵܐ، ܐܝܼܢܵܐ ܒܓܵܢܝܼ ܠܹܐ ܥܵܒ݂ܕܹܢ ܫܘܼܒ݂ܗܵܪܵܐ ܫܒ݂ܘܿܩ ܡ̣ܢ ܒܙܲܒܘܼܢܘܼܬ‌ܝܼ. 6 ܐܘܼܦ ܐܸܢ ܕܒܵܥܹܝܢ ܥܵܒ݂ܕܹܢ ܫܘܼܒ݂ܗܵܪܵܐ ܠܹܐ ܗܵܘܹܝܢ ܣܲܟ݂ܠܵܐ، ܣܵܒܵܒ ܒܸܬ ܗܲܡܙܸܡܸܢ ܫܪܵܪܵܐ. ܐܝܼܢܵܐ ܒܸܬ ܕܵܒ݂ܩܹܢܵܗ̇ ܓܵܢܝܼ ܕܠܵܐ ܚܵܫܹܒ݂ ܐܢܵܫܵܐ ܒܘܼܬ ܕܝܼܝܼ ܙܵܘܕܵܐ ܡ̣ܢ ܗ̇ܘ ܡܸܢܕܝܼ ܕܚܵܙܹܐ ܒܝܼܝܼ ܝܲܢ ܕܫܵܡܹܥ ܡܸܢܝܼ.

7 ܘܕܠܵܐ ܦܵܝܫܹܢ ܗܘܵܐ ܡܘܼܪܡܵܐ ܙܵܘܕܵܐ ܡ̣ܢ ܕܘܵܠܹܐ ܝܠܵܗ̇ ܒܝܲܬܝܼܪܘܼܬܵ‌ܐ ܕܓܸܠܝܵܢܹ̈ܐ، ܦܝܼܫ ܠܝܼ ܝܘܼܗܒ݂ܵܐ ܟܸܬܘܵܐ ܓܵܘ ܦܲܓ݂ܪܝܼ، ܐܝܼܙܓܲܕܵܐ ܡ̣ܢ ܣܵܛܵܢܵܐ ܠܥܲܓ̰ܘܼܙܝܼ، ܕܠܵܐ ܦܵܝܫܹܢ ܡܘܼܪܡܵܐ ܙܵܘܕܵܐ. 8 ܬܠܵܬ ܓܵܗܹ̈ܐ ܦܘܼܪܦܸܠܔ ܠܝܼ ܒܡܵܪܲܢ ܕܫܵܩܹܠܔ ܗܘܵܐ ܠܹܗ ܡܸܢܝܼ، 9 ܐܝܼܢܵܐ ܐܡܝܼܪܹܗ ܐܸܠܝܼ: ”ܫܵܦܵܩܲܬ‌ܝܼ ܟܹܐ ܡܵܠܝܵܐ ܠܘܼܟ݂، ܣܵܒܵܒ ܚܲܝܠܝܼ ܒܙܲܒܘܼܢܘܼܬܵ‌ܐ ܟܹܐ ܦܵܐܹܫ ܬܘܼܡܸܡܵܐ.“ ܒܘܼܬ ܐܵܗܵܐ ܒܚܲܕܘܼܬܵ‌ܐ ܒܸܬ ܥܵܒ݂ܕܹܢ ܫܘܼܒ݂ܗܵܪܵܐ ܒܘܼܫ ܙܵܘܕܵܐ ܒܙܲܒܘܼܢܘܼܬ‌ܝܼ ܕܫܵܪܹܐ ܒܝܼܝܼ ܚܲܝܠܵܐ ܕܡܫܝܼܚܵܐ. 10 ܡ̣ܢ ܗܵܕܵܐ، ܒܘܼܬ ܚܵܬܸܪ ܕܡܫܝܼܚܵܐ ܐܝܼܬ ܠܝܼ ܒܘܼܣܵܡܵܐ ܒܙܲܒܘܼܢܘܼܝܵܬܹ̈‌ܐ، ܒܡܲܣܠܲܝܵܬܹ̈‌ܐ، ܒܐܘܼܠܨܵܢܹ̈ܐ، ܒܪ̈ܕܘܼܦܝܹܐ، ܒܓ̰ܘܼܢܓ̰ܵܪܹ̈ܐ. ܣܵܒܵܒ ܐܝܼܡܲܢ ܕܙܲܒܘܼܢ ܝܼܘܸܢ، ܗ̇ܝܓܵܗ ܚܲܝܠܵܢܵܐ ܝܘܸܢ.

11 ܗܘܹܐ ܠܝܼ ܣܲܟ݂ܠܵܐ، ܐܝܼܢܵܐ ܐܲܚܬܘܿܢ ܩܵܡ ܡܲܠܝܸܨܝܼܬܘܿܢ ܠܝܼ. ܘܵܠܹܐ ܝܗܘܵܐ ܕܦܵܝܫܹܢ ܗܘܵܐ ܚܩܝܼܪܵܐ ܒܝܼܵܘܟ݂ܘܿܢ ܣܵܒܵܒ ܠܹܐ ܝܘܸܢ ܒܘܼܫ ܒܵܨܘܿܪܵܐ ܡ̣ܢ ܫܠܝܼܚܹ̈ܐ ܕܟܹܐ ܚܵܫܒ݂ܝܼ ܒܘܼܫ ܥܸܠܵܝܹ̈ܐ ܝܢܵܐ، ܐܵܦܸܢ ܕܠܹܐ ܝܘܸܢ ܡܸܢܕܝܼ. 12 ܪ̈ܘܼܫܡܹܐ ܕܚܲܕ ܫܠܝܼܚܵܐ ܐܲܢܹܐ ܝܢܵܐ: ܢܝܼܫܲܢܩܹ̈ܐ ܘܕܘܼܡܵܪܹ̈ܐ ܘܚܲܝ̈ܠܹܐ ܓܘܼܪܹ̈ܐ، ܘܐܲܢܹܐ ܦܝܼܫܹܐ ܝܗܘܵܘ ܥܒ݂ܝܼܕܹܐ ܓܵܘܵܘܟ݂ܘܿܢ ܒܟܠܵܗ̇ ܚܡܵܠܬܵ‌ܐ. 13 ܒܡܘܼܕܝܼ ܝܬܘܿܢ ܗܘܵܘ ܒܘܼܫ ܒܵܨܘܿܪܹ̈ܐ ܡ̣ܢ ܥܹܕܵܬܹ̈‌ܐ ܐܚܹܪ̈ܢܹܐ ܫܒ݂ܘܿܩ ܡ̣ܢ ܕܠܹܐ ܝܘܸܢ ܗܘܝܼܵܐ ܝܘܼܩܪܵܐ ܐܸܠܵܘܟ݂ܘܿܢ؟ ܦܲܚܠܘܼܢ ܐܸܠܝܼ ܐܵܗܵܐ ܓܢܵܗܵܐ.

14 ܐܵܕܝܼܵܐ ܗܕܝܼܪܵܐ ܝܘܸܢ ܕܐܵܬܹܝܢ ܠܟܸܣܠܵܘܟ݂ܘܿܢ ܩܵܐ ܓܵܗܵܐ ܕܬܠܵܬ، ܘܠܹܐ ܗܵܘܹܝܢ ܝܘܼܩܪܵܐ ܐܸܠܵܘܟ݂ܘܿܢ، ܣܵܒܵܒ ܠܹܐ ܒܵܥܹܝܢ ܡܸܢܕܝܼܵܘܟ݂ܘܿܢ ܐܝܼܢܵܐ ܒܵܥܹܝܢ ܐܸܠܵܘܟ݂ܘܿܢ. ܣܵܒܵܒ ܠܹܐ ܝܠܵܗ̇ ܘܵܠܹܐ ܠܒܢܘܿܢܹ̈ܐ ܕܡܲܬܒ݂ܝܼ ܣܝܼܡܵܬܹ̈‌ܐ ܠܐܲܒ݂ܵܗܵܝ̈ܗ‌ܝ، ܐܸܠܵܐ ܐܲܒ݂ܵܗܹ̈ܐ ܠܒܢܘܿܢܹ̈ܐ. 15 ܗܵܕܟ݂ܵܐ ܒܚܲܕܘܼܬܵ‌ܐ ܐܵܢܵܐ ܒܸܬ ܨܵܪܦܹܢ ܟܠܔ ܡܸܢܕܝܼ ܥܲܠܵܘܟ݂ܘܿܢ، ܘܦܵܝܫܹܢ ܨܘܼܪܦܵܐ. ܐܸܢ ܡܲܚܸܒܸܢܵܘܟ݂ܘܿܢ ܙܵܘܕܵܐ، ܒܸܬ ܡܲܚܸܒܝܼܬܘܿܢ ܠܝܼ ܒܘܼܫ ܒܵܨܘܿܪܵܐ؟ 16 ܟܠܔ ܕܵܐܟ݂ܝܼ ܕܗܵܘܝܵܐ، ܠܵܐ ܗܘܹܐ ܠܝܼ ܝܘܼܩܪܵܐ ܐܸܠܵܘܟ݂ܘܿܢ، ܐܸܠܵܐ ܐܲܝܟ݂ ܕܝܼܘܸܢ ܦܵܠܘܿܡܵܐ، ܩܵܡ ܕܵܒ݂ܩܹܢܵܘܟ݂ܘܿܢ ܒܦܸܠܡܹ̈ܐ. 17 ܥܘܼܠܕܹܐ ܠܝܼ ܐܸܠܵܘܟ݂ܘܿܢ ܒܝܲܕ ܚܲܕ ܐܢܵܫܵܐ ܕܫܘܼܕܸܪܝܼ ܠܟܸܣܠܵܘܟ݂ܘܿܢ؟ 18 ܛܠܝܼܒ ܠܝܼ ܡ̣ܢ ܛܸܛܘܿܣ ܕܐܵܬܹ‌ܐ ܠܟܸܣܠܵܘܟ݂ܘܿܢ، ܘܫܘܼܕܸܪܝܼ ܐܲܚܘܿܢܲܢ ܥܲܡܹܗ. ܥܘܼܠܕܹܐ ܠܹܗ ܐܸܠܵܘܟ݂ܘܿܢ ܛܸܛܘܿܣ؟ ܟܠܲܢ ܠܵܐ ܚܕܝܼܪܲܢ ܒܚܲܕ ܪܘܼܚܵܐ؟ ܟܠܲܢ ܠܵܐ ܬܒܝܼܥ ܠܲܢ ܠܐܵܢܝܼ ܦܵܣܘܿܥܝܵܬܹ̈‌ܐ؟

19 ܟܠܵܗ̇ ܐܵܗܵܐ ܥܕܵܢܵܐ ܒܸܚܫܵܒ݂ܵܐ ܝܬܘܿܢ ܕܡܲܕܘܼܪܹܐ ܝܘܲܚ ܓ̰ܘܼܘܵܒ ܐܸܠܵܘܟ݂ܘܿܢ؟ ܗܲܡܙܘܼܡܹܐ ܝܘܲܚ ܩܲܕܡ ܐܲܠܵܗܵܐ ܒܡܫܝܼܚܵܐ، ܘܒܸܥܒ݂ܵܕܵܐ ܝܘܲܚ ܟܠܵܝܗ‌ܝ ܡܸܢܕܝܼܵܢܹ̈ܐ، ܡܘܼܚܸܒܝܼ̈، ܠܒܢܵܝܬܵܘܟ݂ܘܿܢ. 20 ܣܵܒܵܒ ܒܸܙܕܵܥܵܐ ܝܘܸܢ ܩܵܘܡܵܐ ܐܝܼܡܲܢ ܕܐܵܬܹܝܢ ܠܵܐ ܚܵܙܹܢܵܘܟ݂ܘܿܢ ܕܵܐܟ݂ܝܼ ܕܒܵܣܡܵܐ ܠܝܼ، ܘܐܲܚܬܘܿܢ ܠܵܐ ܚܵܙܹܝܬܘܿܢ ܠܝܼ ܕܵܐܟ݂ܝܼ ܕܒܵܣܡܵܐ ܠܵܘܟ݂ܘܿܢ. ܒܸܙܕܵܥܵܐ ܝܘܸܢ ܕܗܵܘܝܵܐ ܡܲܩܲܪܵܨܘܼܬܵ‌ܐ، ܘܒܲܚܸܠܵܢܘܼܬܵ‌ܐ، ܘܟܲܪܒܵܐ، ܘܥܸܨܝܵܢܵܐ، ܘܡܹܐܟܲܠܩܲܪܨܵܐ، ܘܗܹܡܸܙܡܵܢ ܣܦܝܼܩܬܵ‌ܐ، ܘܚܬܝܼܪܘܼܬܵ‌ܐ، ܘܫܓ݂ܘܼܫܝܵܐ. 21 ܒܸܙܕܵܥܵܐ ܝܘܸܢ ܕܐܝܼܡܲܢ ܕܐܵܬܹܝܢ ܠܟܸܣܠܵܘܟ݂ܘܿܢ ܡܸܢܕܪܸܫ ܐܲܠܵܗ‌ܝܼ ܡܲܡܟܸܟ݂ ܠܝܼ ܩܲܕܡܵܘܟ݂ܘܿܢ، ܘܥܵܒ݂ܕܹܢ ܬܵܥܙܝܼ ܥܲܠܔ ܪܵܒܵܐ ܐܲܝܢܝܼ ܕܚܛܹܐ ܠܗܘܿܢ ܡ̣ܢ ܩܲܕܡܵܝܬܵ‌ܐ ܘܗܸܫ ܠܹܐ ܝܢܵܐ ܬܘܼܘܸܒܹܐ ܡ̣ܢ ܛܲܢܦܘܼܬܵ‌ܐ، ܘܙܵܢܝܘܼܬܵ‌ܐ، ܘܫܪܝܼܚܘܼܬܵ‌ܐ ܕܥܒ݂ܝܼܕ ܠܗܘܿܢ.