1-2 དེ་བས་ན། བདག་གིས་ཁྱོད་རྣམས་ལ་སྐུལ་བར༌བྱ་སྟེ། བདག་ཅག་གིས་དད་གུས་བྱེད་པ་དང་ཚུལ་མཐུན་ངང་བག་ཕབ་ལྷིང་འཇགས་ཀྱི་འཚོ་བ་རོལ་ཐུབ་པའི་ཕྱིར། ཐོག་མར་ཁྱོད་རྣམས་ཀྱིས་མི་ཐམས་ཅད༌དང༌། རྒྱལ༌པོ། དབང་ཤེད་ཅན་མཐའ་དག་གི་ཆེད༌དུ། དཀོན་མཆོག་ལ་ཞུ་བ་བྱེད་པ་དང༌། གསོལ་བ་འདེབས༌པ། ཚབ་ཞུ་བྱེད༌པ། བཀའ་དྲིན་ཞུ་བ་བཅས་བྱེད་པར༌གྱིས། 3 དོན་འདི་ནི་བདག་ཅག་གི་སྐྱབས་མགོན་དཀོན་མཆོག་གི་སྤྱན་སྔར་ལེགས༌ཤིང་ཁོང་ཐུགས་དགྱེས༌པ་ཡིན། 4 ཁོང་གིས་མི་ཐམས་ཅད་ལ་ཐར་པ་འཐོབ་པ་དང་ཀུན་གྱིས་བདེན་པ་ཉིད་རྟོགས་ཐུབ་པར་དགོངས་སོ།། 5 ཅིའི་ཕྱིར་ཞེ་ན། དཀོན་མཆོག་གཅིག་ཁོ་ན་ཉིད་ལས་གཞན་མེད༌ཅིང༌། ཡང་དཀོན་མཆོག་དང་མིའི་རིགས་ཀྱི་བར་དུ་བར་མི་གཅིག་ལས་གཞན་མེད༌དེ། འཇིག་རྟེན་དུ་མི་རུ་འཁྲུངས་པའི་མཱ་ཤི་ཀ་ཡེ་ཤུ་ཡིན་པའི་ཕྱིར༌རོ།། 6 ཁོང་གིས་རང་ཉིད་འཇིག་རྟེན་གྱི་མི་ཐམས་ཅད་ལ་བླུ་རིན་དུ་གནང༌ཞིང༌། དུས་ལ་བབས་པ་ན། དོན་འདིར་བདེན་དཔང་བྱས་པ་ཡིན། 7 བདག་ནི་དོན་དེའི་ཆེད་དུ་ཆོས་སྒྲོག་མཁན༌དང༌སྐུ་ཚབ༌པར་བསྐོས་ཏེ། དད་པ་དང་བདེན་པ་ཉིད་ཀྱི་ཆ་ནས་ཕྱི་ཕྱོགས་པ་རྣམས་ཀྱི་དགེ་རྒན་ཡིན། དེ་ནི་བདག་གིས་བདེན་པར་སྨྲས་པ་ཡིན་གྱི་རྫུན་སྨྲས་པ་མ་ཡིན༌ནོ།།

8 དེའི༌ཕྱིར། བདག་གིས་སྐྱེས་པ་རྣམས་ཀྱིས་ཞེ་སྡང་དང་རྩོད་གླེང་མེད་པར་རྣམ་པར་དག་པའི་ལག་ཟུང་ཡར་བཏེགས་ནས། གནས་གང་རུང་དུ་གསོལ་བ་འདེབས་པར་བསམས་སོ།། 9 ཡང་བདག་གིས་བུད་མེད་རྣམས་ནི་ཁྲེལ་ཡོད་བག་ཡོད་ངང་ཚུལ་མཐུན་གྱི་གོས་གྱོན་པ༌ལས། མགོའི་སྐྲ་སླས་པ་དང་གསེར་དང་མུ་ཏིག་དང་གོས་ཆེན་སོགས་ཀྱིས་མི་བརྒྱན་པར༌སྨོན། 10 དཀོན་མཆོག་ལ་དད་པ་ཡོད་ཟེར་བའི་སྐྱེས་མ་རྣམས་ཀྱིས་ལུས་ལ་དོན་བཟང་པོས་བརྒྱན་ན་འོས་སོ།། 11 ཡང་བུད་མེད་རྣམས་ལྷོད་འཇགས་ངང་ཆོས་བསླབ་ཅིང་རྒྱུན་དུ་ངག་ལ་ཉན་པ་ཞིག་ཡིན་དགོས༌ཏེ། 12 བུད་མེད་རྣམས་ལྷོད་འཇགས་སུ་སྡོད་པ་ལས་སྐྱེས་པ་རྣམས་ལ་ཆོས་བཤད་པའམ་མགོ་ཁྲིད་བྱེད་མི་རུང་ཞེས་བདག་གིས་སྨྲས༌པའོ།། 13 ཅིའི་ཕྱིར་ཞེ་ན། ཐོག་མར་ཨ་དམ་དང་ཕྱིས་སུ་ཧ་ཝཱ་མཛད་པའི་ཕྱིར༌དང༌། 14 ཡང་ཨ་དམ་བསླུས་པ་མ་ཡིན་པར་བུད་མེད་དེ་བསླུས་ནས་སྡིག་པའི་ནང་དུ་ལྷུང་བའི་ཕྱིར༌རོ།། 15 འོན༌ཀྱང༌། བུད་མེད་རྣམས་ཀྱིས་རྟག་ཏུ་དད་སེམས་དང་བྱམས་པ་བཅངས་པ༌དང༌། སྤྱོད་ལམ་དྲང་ཞིང་བག་ཡོད་པ་ཡིན༌ན། ཕྲུ་གུ་བཙའ་བའི་དུས་སུ་ཁོ་མོ་རྣམས་ཐར་བར་འགྱུར་རོ།།