1 ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌། །ང་ཡི་སེམས་ཀྱིས་ཡ་ཝཱེར་བསྟོད་བསྔགས༌བརྗོད།། 2 མི་ཚེ་གང་པོར་ཡ་ཝཱེར་བསྟོད་པ༌འབུལ། །འཇིག་རྟེན་འདི་རུ་འཚོ་བའི་དུས་ཡུན༌ནང༌། །དཀོན་མཆོག་ཉིད་ལ་བསྟོད་དབྱངས་འབུལ་བར༌བྱ།། 3 ཁྱོད་རྣམས་སྐྱོབ་ཐབས་བྲལ་བའི་སྐུ་དྲག༌དང༌། །འཇིག་རྟེན་མི་ལ་བློ་གཏད་མ་བཅོལ༌ཞིག། 4 དེ་ཡི་དབུགས་རྒྱུ་ཆད་དུས་རྡུལ་དུ༌འགྱུར། །དེ་ཡི་ཇུས་རྣམས་ཉིན་གཅིག་ནང་ལ༌འཇིག། 5 ཡ་ཀོབ་དཀོན་མཆོག་སྡོངས་གྲོགས་ཡིན་པ༌དང༌། །སུ་ཡིས་རང་གི་དཀོན་མཆོག་ཡ་ཝཱེ༌ལ། །རེ་བ་བྱེད་པའི་མི་དེ་བདེ་བ༌ཡིན།། 6 ཡ་ཝཱེས་གནམ་དང་ས་དང་རྒྱ་མཚོ༌དང༌། །དེའི་ནང་ཁྱབ་པ་ཡོད་དགུ་མཛད་པ༌ལགས། །ཁོང་ནི་རྟག་ཏུ་ཡིད་རྟོན་རུང་བ༌ཡིན།། 7 གཉའ་གནོན་འོག་གི་མི་ལ་དཀར་འདོན་བྱེད། །ལྟོགས་པ་རྣམས་ལ་ཁ་ཟས་གནང་བ༌དང༌། །ཁོང་གིས་བཙོན་པ་རྣམས་ཀྱང་ཐར་དུ༌འཇུག། 8 ཡ་ཝཱེས་ལོང་བ་རྣམས་ཀྱི་མིག་འབྱེད༌ཅིང༌། །གཉའ་གནོན་ཐེབས་པ་རྣམས་ནི་སློང་བར༌མཛད། །ཁོང་ཉིད་དྲང་བདེན་མི་ལ་ཐུགས་མཉེས༌སོ།། 9 ཡ་ཝཱེས་བྱེས་སུ་སྡོད་པ་རྣམས་བསྲུང༌ཞིང༌། །དྭ་ཕྲུག་ཡུགས་མོ་རྣམས་ལ་རོགས་སྐྱོར༌གནང༌། །འོན་ཀྱང་སྡིག་སྤྱོད་ལམ་ནི་འཁྱོག་པོར༌མཛད།། 10 ཡ་ཝཱེས་རྒྱུན་ནས་རྒྱུན་དུ་སྲིད་མཛད༌དེ། །ཀྱེ་ཀྱེ་ཛ་ཡན་ཁྱེད་ཀྱི་དཀོན་མཆོག༌ནི། །མི་རབས་ཀུན་ཏུ་རྒྱལ་པོར་བཞུགས་གྱུར༌ཅིག །ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌།།