1 ལྟོས་དང་། དཀོན་མཆོག་ཡ་ཝཱེའི་ཉིན་མོ་སླེབས་ལ་ཉེ་སྟེ། མི་ཡིས་ཁྱོད་ཚོའི་ཁྲོད་དུ་ཁྱོད་ཀྱི་རྒྱུ་ནོར་བགོ་བར་འགྱུར། 2 ཅི་ལ་ཞེ་ན། ཡེ་རུ་སཱ་ལེམ་དང་འཐབ་པའི་ཕྱིར་ངས་མི་རིགས་ཐམས་ཅད་བསྡུས་ནས། གྲོང་ཁྱེར་ནི་བཙན་བཟུང་བྱེད་པ་དང་ཁང་པ་རྣམས་འཕྲོག་པར་འགྱུར་ལ། བུད་མེད་རྣམས་ལ་བཙན་གཡེམ་བྱེད་པར་འགྱུར། ཡང་གྲོང་ཁྱེར་ནང་གི་མི་གྲངས་ཕྱེད་ཀ་ནི་བཙན་ཁྲིད་བྱེད་ཅིང་། ལྷག་ལུས་རྣམས་ནི་གྲོང་ཁྱེར་ནས་ལུས་ཏེ་མེད་པར་མི་བྱའོ། ། 3 དུས་དེར་དཀོན་མཆོག་ཡ་ཝཱེ་ཕྱི་རུ་ཕེབས་ཏེ། སྔར་དམག་འཁྲུག་གི་དུས་སུ་ཁོང་གིས་འཐབ་པ་བཞིན་དུ་མི་རིགས་དེ་རྣམས་དང་འཐབ་པར་འགྱུར། 4 ཉིན་མོ་དེར། ཁོང་གི་ཞབས་ནི་ཡེ་རུ་སཱ་ལེམ་གྱི་ཁ་གཏད་དུ་ཤར་ཕྱོགས་ཀྱི་སྐྱུ་རུ་ཤིང་གི་རི་བོར་བཞེངས་ནས། སྐྱུ་རུ་ཤིང་གི་རི་བོ་འདི་དཀྱིལ་ནས་གས་ཤིང་། ཤར་ནས་ནུབ་ཀྱི་བར་དུ་ལུང་པ་ཤིན་ཏུ་ཆེན་པོ་ཞིག་འཐོན་པར་འགྱུར། ཡང་རི་བོའི་ཕྱེད་ཀ་ནི་བྱང་ཕྱོགས་སུ་སྤོ་བ་དང་ཕྱེད་ཀ་ལྷོ་ཕྱོགས་སུ་སྤོ་བའོ། ། 5 ཁྱོད་རྣམས་ངའི་ལུང་པ་བརྒྱུད་ནས་འབྲོ་དགོས་ཏེ། ཅི་ལ་ཞེ་ན། ལུང་པ་དེ་ནི་ཨ་ཙེལ་བར་དུ་སླེབ་ངེས་ཡིན། ཡ་ཧུ་དཱའི་རྒྱལ་པོ་ཨུ་ཟི་ཡཱའི་དུས་སུ་ས་འགུལ་ཆེན་པོ་འབྱུང་དུས་ཇི་ལྟར་བྲོས་པ་བཞིན་ཁྱོད་རྣམས་ཕྲོས་ཤིག ང་ཡི་དཀོན་མཆོག་ཡ་ཝཱེ་ཕེབས་ངེས་ཡིན་ལ། དམ་པ་ཐམས་ཅད་ཁོང་དང་མཉམ་དུ་ཕེབས་པར་འགྱུར་རོ། ། 6 ཉིན་མོ་དེར་འོད་མེད་ལ། གྲང་ངར་དང་བ་མོ་ཡང་མེད་དེ། 7 ཉིན་མོ་དེ་ནི་ཉིན་ཁྱད་པར་ཅན་ཞིག་ཡིན་ཏེ། དཀོན་མཆོག་ཡ་ཝཱེས་མཁྱེན་ནོ། །ཉིན་མོ་དེ་ལ་ཉིན་དཀར་དང་མཚན་མོ་ཞེས་མི་བཀར་ཏེ། གང་ལ་ཞེ་ན། དགོང་མོའི་དུས་སུའང་འོད་དང་ལྡན་པ་ཡིན་ནོ། ། 8 ཉིན་མོ་དེ་ལ་ཡེ་རུ་སཱ་ལེམ་ནས་ཚེ་སྲོག་དང་ལྡན་པའི་ཆུ་ཐོན་ནས། དེའི་ཕྱེད་ཀ་ནི་རྒྱ་མཚོ་ཤར་མའི་ཕྱོགས་དང་ཕྱེད་ཀ་ནི་རྒྱ་མཚོ་ནུབ་མའི་ཕྱོགས་སུ་བཞུར་ཏེ་དབྱར་དགུན་གཉིས་ཀར་དེ་ལྟར་ཡིན།

9 ཡང་དཀོན་མཆོག་ཡ་ཝཱེ་ནི་ས་གཞི་ཡོངས་ཀྱི་རྒྱལ་པོར་འགྱུར་ཞིང་། ཉིན་མོ་དེ་ལ་གཙོ་བོ་ནི་གཅིག་ལས་གཉིས་མེད་ཡིན་པ་དང་ཁོང་གི་མཚན་ལ་ཡ་ཝཱེ་ཞུ་བ་མི་ཐམས་ཅད་ཀྱིས་ཁས་ལེན་པར་འགྱུར། 10 ཡུལ་ཐམས་ཅད་དེ། གེ་བཱ་ནས་ཡེ་རུ་སཱ་ལེམ་ལྷོ་ཕྱོགས་ཀྱི་རིམ་མོན་དང་ཉེ་བའི་བར་དུ་ཡོད་ཚད་དམའ་སར་འགྱུར་ཡང་། ཡེ་རུ་སཱ་ལེམ་ནི་ད་དུང་སྔར་གནས་སུ་འགྱེང་ངེར་ལངས་པ་དང་། པེན་ཡཱ་མེན་གྱི་མཁར་སྒོ་ནས་རྒྱ་སྒོ་དང་པོའི་བར་དང་། གྲུ་གའི་རྒྱ་སྒོའི་བར་དུ་དང་། ཡང་ཧ་ནན་ཨེལ་གྱི་ཐོག་ཁང་ནས་རྒྱལ་པོའི་རྒུན་འབྲུམ་འཚིར་གཞོང་རྣམས་ཀྱི་བར་དུ་ཐམས་ཅད་སྔར་གནས་སུ་ལུས་པ་ཡིན། 11 གྲོང་ཁྱེར་ནང་དུ་ད་དུང་འདུག་མཁན་ཡོད་པ་དང་། ད་ནི་དེ་རྩ་མེད་གཏོང་བར་མི་འགྱུར་ལ། ཡེ་རུ་སཱ་ལེམ་གྱི་མི་རྣམས་བདེ་བར་གནས་པ་ཡིན། 12 དཀོན་མཆོག་ཡ་ཝཱེས་ཡེ་རུ་སཱ་ལེམ་ལ་དམག་འདྲེན་པའི་མི་རིགས་རྣམས་ལ་རྡུང་བརྡེག་བྱེད་དུ་གནོད་འཚེ་དང་རིམས་ནད་མཛད་པ་ནི་འདི་ཡིན་ཏེ། དེ་རྣམས་ད་དུང་སར་ལངས་སྡོད་པའི་དུས་སུ་ཁོ་ཚོའི་ཤ་རུལ་བར་འགྱུར་ལ། དེ་རྣམས་ཀྱི་མིག་རིལ་ཡང་མིག་ཁུང་དུ་རུལ་བར་འགྱུར་བ་དང་། དེ་དག་གི་ལྕེ་ཡང་ཁ་ནང་དུ་རུལ་བར་འགྱུར། 13 ཉིན་མོ་དེ་ལ་དཀོན་མཆོག་ཡ་ཝཱེས་དེ་རྣམས་ལ་འཇིགས་སྣང་ཆེན་པོ་ཞིག་འབྱུང་བར་མཛད་དེ། ཁོ་རྣམས་རེ་རེས་ཕན་ཚུན་གྱི་ལག་པ་བཟུང་ནས། ལག་པ་ཡར་བཀྱགས་ཏེ་ཕན་ཚུན་ལ་རྒོལ་བར་འགྱུར། 14 ཡ་ཧུ་དཱ་ཡང་ཡེ་རུ་སཱ་ལེམ་དུ་འཐབ་པར་འགྱུར་ཞིང་། མཐའ་འཁོར་ཡུལ་ཁམས་རྣམས་ཀྱི་རྒྱུ་ནོར་ཐམས་ཅད་བསྡུ་ངེས་ཡིན་ཏེ། གསེར་དང་དངུལ། གྱོན་གོས་བཅས་ཤིན་ཏུ་མང་ངོ་། ། 15 དེ་དང་དེ་བཞིན་དུ། གནོད་འཚེ་དང་རིམས་ནད་འདི་ལྟ་བུ་ནི་རྟ་དང་དྲེའུ། རྔ་མོང་། བོང་བུ། དམག་སྒར་དུ་ཡོད་པའི་ཕྱུགས་ཟོག་ཐམས་ཅད་ཀྱི་སྟེང་དུ་འཕོག་པར་འགྱུར། 16 དེ་ནས་མི་རིགས་ཐམས་ཅད་ལས་ཡེ་རུ་སཱ་ལེམ་ལ་དམག་དྲངས་ནས་ལུས་པ་རྣམས་ལོ་རེ་བཞིན་ཡར་འོངས་ནས། རྒྱལ་པོ་ཆེན་པོ་སྟེ་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལ་ཕྱག་འཚལ་བ་དང་སྤྱིལ་བུའི་དུས་ཆེན་བསྲུང་བར་བྱའོ། ། 17 ཡང་ས་གཞིའི་མི་སྡེ་ཐམས་ཅད་ལས་སུ་ཞིག་ཡར་ཡེ་རུ་སཱ་ལེམ་དུ་འོངས་ནས་རྒྱལ་པོ་ཆེན་པོ་སྟེ་དཔུང་ཚོགས་ཀུན་གྱི་དཀོན་མཆོག་ཡ་ཝཱེ་ལ་ཕྱག་མི་འཚལ་ན་དེར་ཆར་བ་མི་འབབ་བོ། ། 18 གལ་ཏེ་ཨེ་ཅིབ་ཀྱི་མི་རིགས་རྣམས་ཡར་འོངས་ནས་དེར་མ་ཞུགས་ན། དེ་ནས་ཁོ་རྣམས་ལའང་ཆར་བ་མི་འབབ་ལ། འདི་ནི་དཀོན་མཆོག་ཡ་ཝཱེས་སྤྱིལ་བུའི་དུས་ཆེན་བསྲུང་དུ་མི་འོང་བའི་མི་རིགས་རྣམས་ལ་བརྡེགས་ནས་ཐེབས་པར་མཛད་པའི་གནོད་འཚེ་དང་རིམས་ནད་ཡིན་ནོ། ། 19 འདི་ནི་ཨེ་ཅིབ་ཀྱི་ཉེས་ཆད་ཡིན་པ་དང་། སྤྱིལ་བུའི་དུས་ཆེན་བསྲུང་དུ་ཡར་མི་འོང་བའི་མི་རིགས་ཐམས་ཅད་ཀྱི་ཉེས་ཆད་ཀྱང་ཡིན་ནོ། ། 20 ཉིན་མོ་དེ་ལ་རྟ་རྣམས་ཀྱི་དྲིལ་བུའི་སྟེང་དུ་ཡང་དཀོན་མཆོག་ཡ་ཝཱེའི་ཕྱིར་དུ་དམ་པའོ་ཞེས་པའི་ཡི་གེ་ཡོད་པ་དང་། དཀོན་མཆོག་ཡ་ཝཱེའི་མཆོད་ཁང་གི་སླ་ང་རྣམས་ནི་མཆོད་ཁྲིའི་མདུན་གྱི་མཆོད་པ་འབུལ་བྱེད་ཕོར་བ་དང་འདྲ་སྟེ། 21 ཡེ་རུ་སཱ་ལེམ་དང་ཡ་ཧུ་དཱའི་སླ་ང་ཐམས་ཅད་ཀྱང་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་ཕྱིར་དམ་པར་བཀོལ་བ་དང་། མཆོད་པ་འབུལ་མཁན་ཐམས་ཅད་འོངས་ནས་སླ་ང་འདི་དག་བླངས་ཏེ། དེའི་ནང་དུ་མཆོད་བྱེད་ཀྱི་ཤ་བཙོ་བ་ཡིན། ད་ནི་ཉིན་མོ་དེ་ལ་དཔུང་ཚོགས་ཀུན་གྱི་ཡ་ཝཱེའི་མཆོད་ཁང་ནང་དུ་ཀ་ན་ཨན་པ་ * འདིར་ཀ་ན་ཨན་པ་ཞེས་པ་ནི་ཚོང་པའམ་དད་པ་མེད་པའི་མི་ལ་གོ་བ་ཡིན།ཡོད་པར་མི་འགྱུར་རོ།། །།