तिमोथीयात पावलं च्वःगु न्हापांगु पौ
म्हसीका
थ्व पौ पावलं माकेडोनियां तिमोथीयात च्वःगु खः। पावलं थःगु निक्वः खुसिया यात्राया इलय् वयात नापलाःगु खः। तिमोथी एशियाय् लाःगु लुस्त्रा शहरय् च्वंम्ह छम्ह ल्याय्म्हम्ह विश्वासी खः। वया मां यहूदी व बौ ग्रीक खः। पावलयात वयागु ज्याय् वं ग्वाहालि ब्यूगु खः। थ्व पतिइ स्वता खँयात बांलाक ध्वाथुइकातःगु दु।
दकलय् न्हापां पावलं मण्डलीइ मखुगु खँ स्यनाजुइपिनि पाखें बचय् जुया च्वनेगु ख्याच्वः बियातःगु दु। इमिगु धापू कथं संसार मभिं, गुप्ति-खँया पाखें जक मुक्ति काये फइ, अले ब्याहा मयासे व नये मज्यू धयातःगु नसा मनसे जक हे काये फइ। थ्व पौया निगूगु ब्वय् पावलं मण्डली गुकथं चलय् यायेगु, गुकथं सेवा यायेगु व मण्डलीया थकालिपिं व ग्वाहालि याइपिनिगु चालचलन गज्याःगु जुइ माः धकाः नं न्ह्यथनातःगु दु। दकसिबय् लिपा पावलं तिमोथीयात येशू ख्रीष्टया धात्थेंम्ह च्यः गुकथं जुइगु व मण्डलीया थकालिपिं व क्वकालिपिं विश्वासीतय्त गुकथं हनाबना तयेमाः धकाः अर्ती बियातःगु दु।
धलः पौ
न्ह्यखँ ............................................. १:१-२
मण्डलीया थकालिपिं व ग्वाहालि
याइपिनिगु खँ .............................. १:३–३:१६
भाःत मदुपिं मिसातय्गु खँ ................. ५:१-१६
धिबायागु लोभ मयायेगु बारे अर्ति ...... ६:१-१०
मेमेगु अर्ती ....................................... ६:११-२१
१ तिमोथी
1
पावलपाखें ज्वजलपा
1 मुक्ति बियादीम्ह परमेश्वरया उजंकथं आशा बियादीम्ह येशू ख्रीष्टया प्रेरित जुयाम्ह जि पावलयापाखें 2 विश्वासय् जिम्ह काय् थें जुयाच्वंम्ह तिमोथीयात† १:२ ग्रीक भाषां तिमोथियसयात ज्वजलपा।
परमेश्वर बाः व झी प्रभु येशू ख्रीष्टयापाखें छन्त दया माया व शान्ति दयेमा।* १:२ प्रे १६:१
मखुगु खँ स्यनिपिं लिसे होश या
3 जि माकेडोनियाय् वने त्यनाबलय् छन्त एफिससय् हे च्वँ धकाः धयागु खः। मखुगु खँ स्यनिपिन्त पनेत छ अज्ज नं अन हे च्वना च्वँ। 4 जिं धयाथें इमित मनय् वःथें बाखं कनेगु व तापाःबाज्यापिनिगु धक्कु त्वःतेगु ज्या याके मते। थुकिं विश्वास यानाः जक थुइगु परमेश्वरयागु ग्वसाःयात स्वयाः अप्वः जवाःसवाः यायेगुयात तिबः बी।
5 यचुगु नुगलं, भिंगु मतिं व शंका मयासें याइगु विश्वासं दइगु मायायात ब्वलंकेत जिमिसं थथे धयाच्वनागु खः। 6 गुलिखय् मनूत ला थज्याःगु पाखे लिचिलाः म्वाः मदुगु खँय् जुयाच्वंगु नं दु। 7 थःपिन्सं छु धयाच्वना धकाः इमिसं मस्यू, न इमिसं थःगु खँयात विश्वास यानाः हे धाये फु। अय्नं इपिं व्यवस्था स्यनिपिं गुरू जुइ मास्ति वः।
8 व्यवस्थाय् च्वया तःथें याये फःसा व्यवस्था तसकं बांलाःगु खः धकाः झीसं स्यू। 9 व्यवस्था भिंपिं मनूतय्गु निंतिं दय्कातःगु मखु। थ्व ला मभिंपिं मनूतय्गु निंतिं दय्कातःगु खः। नियम मानय् मयाइपिं, परमेश्वरयात मानय् मयाइपिं, पापीत, पवित्र मजूपिं, परमेश्वरयात क्वह्यंकीपिं, मांबौयात स्याइपिं, मनू स्याइपिं, 10 व्यभिचार याना जुइपिं, मिजं मिजं हे व्यभिचार याना जुइपिं, दास मीपिं, मखुगु खँ ल्हाना जुइपिं, मखुगु साक्षी बीपिं व भिंगु खँयागु अःखतं ज्या याना जुइपिनिगु निंतिं दय्कातःगु खः। 11 थ्व हे तसकं भिंगु खँ दकलय् तःधंम्ह परमेश्वरं जितः न्यंकेत बियादीगु खः।
परमेश्वरया दयाया निंतिं सुभाय्
12 जिगु ज्याय् जितः शक्ति बियादीम्ह झी प्रभु येशू ख्रीष्टयात जिं सुभाय् बी, छाय्धाःसा वय्कलं जितः विश्वास यानाः थःगु ज्या याके बियादिल। 13 न्हापा जिं प्रभुयात विश्वास मयानानिबलय् मस्युसे वय्कःयात क्वह्यंका जुइगु, वय्कःया मनूतय्त स्यंका जुइगु व इमित यक्व दुःखकष्ट बीगु याये लात। अय्जूसां परमेश्वरं जितः दया यानादिल।* १:१३ प्रे ८:३; ९:४-५ 14 ख्रीष्ट येशूयात यानागु विश्वास व मायां यानाः वय्कलं जितः तसकं दया यानादिल।
15 पापीतय्त मुक्ति बीत ख्रीष्ट येशू थ्व संसारय् झायादीगु धात्थें हे खः धयागु खँ फुक्कसिनं मानय् याये हे माः। पापीत मध्ये नं जि तसकं पापीम्ह खः। 16 थुकिं यानाः हे वय्कलं जितः माया यानादिल। जि थें ज्याःम्ह तसकं पापीयात थःगु धैर्य क्यनेत वय्कलं जितः नमुना दय्कादिल। थ्व नमुना लिपा वय्कःयात विश्वास याइपिं व अनन्त जीवन काइपिनिगु निंतिं खः। 17 न्ह्याबलें दया च्वनिम्ह जुजु, गुबलें सी मखुम्ह, खने मदुम्ह छम्ह हे जक परमेश्वर न्ह्याबलें तःधने मा अले वय्कःयात हे फुक्कसिनं हने मा। आमेन।
18 तिमोथी, जि काय्, छन्त कयाः न्हापांनिसें जुयाच्वंगु अगमवाणी कथं जिं उजं बियाच्वना। थुकियात हे ल्वाभः यानाः छ प्रभुया निंतिं ल्वाना च्वँ। 19 विश्वास यायेगु व भिंगु खँ मतिइ तयेगु त्वःते मते। मति मभिना वंगुलिं ग्वःम्हय्सिनं ला विश्वास यायेगु नापं त्वःते धुंकल। 20 अथे स्यंपिं मध्ये हुमेनियस व अलेक्जेन्डर नं खः। अज्ज अप्वः थुमिसं प्रभुयात बांमलाकाः खँ ल्हाना मजुइ मा धकाः जिं थुमित शैतानयागु ल्हातय् लः ल्हाना बी धुन।