1 थथे धयातःगु धात्‍थें हे खः -- सुनानं मण्‍डलीया बिशप जुइ मास्‍ति वय्‌कूसा, वं तसकं बांलाःगु इच्‍छा यात। 2 बिशप जुइम्ह मनू छुं हे दोष मदुम्‍ह, छम्‍ह हे जक मिसा लिसे ब्‍याहा याःम्‍ह, थातं च्‍वने फुम्‍ह, थःत थःम्‍हं कःघाये फुम्‍ह, चालचलन बांलाःम्‍ह, पाहां वःपिन्‍त दुनुगलंनिसें दुकाइम्‍ह, बांलाक स्‍यनेकने याये फुम्‍ह, 3 अय्‌लाखं काय्‌का मजुइम्‍ह, ल्‍वाना मजुइम्‍ह, भिंम्‍ह, हाला जुइ मखुम्‍ह, धिबायागु लोभ मदुम्‍ह, 4 थःगु छेँ बांलाक कःघाये फुम्‍ह, थः मस्‍तय्‌त कजय्‌ याना तये फुम्‍ह जुइ माः। 5 छाय्‌धाःसा थःगु छेँ हे बांलाक कःघाये मफुम्‍हय्‌सिनं गय्‌ यानाः मण्‍डली कःघाइ?

6 थज्‍याःम्‍ह मनू नकतिनि जक विश्वास याःम्‍ह नं जुइ मज्‍यू। मखुसा व नं अप्‍वः तःधंछुयाः शैतान थें नाश जुयावनी। 7 अले मण्‍डलीं पिने नं नांजाःम्‍ह जुइ माः, अथे जूसा जक वयात मनूतय्‌सं हेबाय्‌चबाय्‌ याइ मखु, अले शैतानयागु जालय्‌ नं लाइ मखु।* ३:२-७ तीत १:६-९

8 ग्‍वाहालि याइपिं नं अथे हे भिंपिं व दुग्‍यंपिं जुइ माः। इपिं खःगु व जूगु जक खँ ल्‍हाइपिं, अय्‌लाखं काय्‌का जुइ मखुपिं, अले धिबायागु लोभ मयाइपिं जुइ माः। 9 इपिं विश्वासयागु सत्‍य खँयात मनं निसें बांलाक थुइका काये फुपिं जुइ माः। 10 बांलाक जाँचय्‌ याये धुंकाः तिनि इमित मण्‍डली ग्‍वाहालि याके बी माः।

11 इमि कलाः नं अथे हे भिंपिं, दुग्‍यंपिं, मेपिन्‍त हेबाय्‌चबाय्‌ याना मजुइपिं, थातं च्‍वने फुपिं व न्‍ह्यागु खँय्‌ नं विश्वास याये बहःपिं जुइ माः।

12 थथे ग्‍वाहालि याइम्‍ह नं छम्‍ह हे मिसा लिसे ब्‍याहा याःम्‍ह जुइ माः। अले व नं थः मस्‍तय्‌त कजय्‌ याये फुम्‍ह व छेँ कःघाये फुम्‍ह जुइ माः। 13 बांलाक ज्‍या याइम्‍हय्‌सित फुक्‍कसिनं मानय्‌ याइ। अले इमिसं येशू ख्रीष्‍टयात थःम्‍हं विश्वास यानागु खँ मेपिन्‍त नं मग्‍यासे धाये फइ।

14 थ्‍व पौ च्‍वया च्‍वनाबलय्‌ नं जिं याकनं हे छन्‍थाय्‌ वयेगु मतिइ तयागु दु। 15 अय्‌नं छुं जुयाः जि वये लिबात धाःसा परमेश्वरयागु छेँय्‌ झीसं गय्‌ यानाः च्‍वने माः धकाः थ्‍व हे पौ पाखें सीका ति। परमेश्वरयागु छेँ धयागु हे मण्‍डली खः। अले थ्‍व सत्‍ययागु थां व किल्‍ला नं खः।

16 थ्‍व तसकं तःधंगु गुप्‍ति खँ खः धकाः झीसं स्‍यू --