1 दाजुकिजापिं, छिपिं दकलय्‌ तःधंम्‍ह झी प्रभु येशू ख्रीष्‍टयात विश्वास याःपिं जुया नं छाय्‌ ख्‍वाः स्‍वयाः व्यवहार यायेगु यानागु?

2 सुं छम्‍ह मनू लुँयागु अंगू न्‍ह्यानाः बांलाःगु वसतं पुनाः मण्‍डलीइ वल, अथे हे सुं छम्‍ह चीमिम्‍ह मनू नं भ्‍वाथःगु वसतं पुनाः वल धाय्‌का। 3 छिमिसं बांलाक वसतं पुना वःम्‍ह मनूयात मानय्‌ यानाः “झासँ, थन दिसँ,” अले चीमिम्‍ह मनूयात हेपय्‌ यानाः “अन हे दना च्‍वँ, अथबाः बँय्‌ फ्‍यतुना च्‍वँ” धकाः 4 धाल धाःसा छिमिसं ख्‍वाः स्‍वयाः ज्‍या याःगु जुइ। छिमिसं थथे ख्‍वाः स्‍वयाः ज्‍या यात धाःसा छिमित मभिंगु बिचाः तयाः न्‍याय याःगु द्वपं जुइ।

5 यःपिं दाजुकिजापिं, जिं धयागु खँ न्‍यँ -- संसारय्‌ चीमिपिन्‍त हे परमेश्वरं विश्वासय्‌ तःमि यायेत व वय्‌कःयात माया याःपिन्‍त दुकाये धकाः धयादीगु राज्‍यय्‌ दुकायेत ल्‍ययादीगु मखु ला? 6 तर छिमिसं ला चीमिपिन्‍त हे हेला यानाच्‍वन। छिमित त्‍यला तःपिं सु? तःमिपिं हे मखु ला? छिमित अदालतय्‌ यंकीपिं सु? तःमिपिं हे मखु ला? 7 अले हानं छिमित सःतादीम्‍ह हने माःम्‍ह प्रभुयागु नां बेइज्‍जत यायेत स्‍वःपिं नं तःमिपिं हे मखु ला?

8 जःलाखःलातय्‌त नं थःत थें माया याये माः धकाः धर्मशास्‍त्रय्‌ च्‍वया तःगु परमेश्वरया राज्‍ययागु व्‍यवस्‍था छिमिसं मानय्‌ याना च्‍वंसा बां हे लात।* २:८ लेवी १९:१८ 9 मनूतय्‌गु ख्‍वाः स्‍वयाः ज्‍या यात धाःसा छिमिसं पाप याःगु जुइ। अले छिमित व्‍यवस्‍था मानय्‌ मयाःपिं धकाः दोषी ठहरय्‌ याइ।

10 व्‍यवस्‍थाय्‌ च्‍वंगु दक्‍व फुक्‍क मानय्‌ यानाः नं छगू जक द्वंकल धाःसां व मनुखं व्‍यवस्‍था हे मानय्‌ मयाःगुति जुइ। 11 “व्‍यभिचार याये मते” धकाः धयादीम्‍हय्‌सिनं हे “मनूतय्‌त स्‍याये मते” नं धयादीगु दु। सुनानं व्‍यभिचार मयाः तर मनू स्‍यात धाःसा वं व्‍यवस्‍था मानय्‌ मयाःगु जुइ, अले व पापी जुइ।* २:११ प्रस २०:१३-१४; व्‍य ५:१७-१८

12 अय्‌जूगुलिं पापं छुतय्‌ याइगु व्‍यवस्‍थां न्‍याय काये खंपिं मनूतय्‌सं थें नवायेगु व ज्‍या यायेगु या। 13 छाय्‌धाःसा परमेश्वरं न्‍याय यानादीबलय्‌ दया माया मदुम्‍ह मनूयात दया माया यानादी मखु। दया माया दुपिं मनूतय्‌त दया माया हे क्‍यनादी।

14 यःपिं दाजुकिजापिं, ख्रीष्‍टयात विश्वास यानाच्‍वनागु दु धकाः धया जुइम्‍ह मनुखं ज्‍या याना मक्‍यंसा, वं विश्वास याना जूगु छु ज्‍यालगय्‌ जुल? थज्‍याःगु विश्वासं वयागु उद्धार जुइ फइ ला? 15 पुनेत वसः मदुपिं, नयेमखंपिं दाजुकिजापिं व तताकेहेँपिं छिमिथाय्‌ दु धाय्‌का। 16 “परमेश्वरं छिमित आशिष बियादीमा, अले बांलाक नया तिया जु” धकाः जक धयाः छिमिसं इमित माःगु नसा वसः बिया मछ्वल धाःसा छिमिगु विश्वास छु ज्‍यालगय्‌ जुल?

17 विश्वास याना थें ज्‍या नं याना क्‍यने मफुसा वयागु विश्वास सीगु विश्वास जुइ।

18 सुनानं थथे धाये फु -- “छंके विश्वास दु, जिके ज्‍या दु।” छं छुं हे मयासे विश्वास याना धकाः जितः क्‍यने फु ला? तर जिं ज्‍यां हे जिगु विश्वास क्‍यने।

19 परमेश्वर छम्‍ह हे जक दु धकाः छं विश्वास याना च्‍वंसा, बां हे लात। भूत आत्‍मां नं थथे वय्‌कः छम्‍ह हे जक दु धकाः विश्वास याः, अले वय्‌कः खनाः ग्‍याः।

20 अय्‌ मूर्ख, ख्रीष्‍टयात विश्वास याना जू थें ज्‍या याना मक्‍यनिम्‍ह मनुखं वय्‌कःयात विश्वास याःगु सितिं वनी धकाः छन्‍त क्‍यना बी माल ला?

21 झी तापाःबाज्‍या अब्राहाम गथे जुयाः धर्मी जुल, छं स्‍यू ला? थः काय्‌ इसहाकयात वेदीइ छाये त्‍यंगुलिं हे मखु ला, व धर्मी जूगु?* २:२१ उत २२:१-१४ 22 छं गथे थुइके मफुगु? अब्राहामं विश्वास याः थें ज्‍या नं याना क्‍यन। वं याःगु ज्‍यां हे ला खःनि, वयागु विश्वास सिद्ध जूगु। 23 थुकथं धर्मशास्‍त्रय्‌ च्‍वया तःगु थ्‍व खँ पूवन -- “अब्राहामं परमेश्वरयात अथे विश्वास याःगुलिं हे वयात धर्मीम्‍ह मनू धकाः धयादिल।” “अब्राहाम जिम्‍ह पासा खः” धकाः परमेश्वरं हे धयादिल।* २:२३ उत १५:६; २ इति २०:७; यशै ४१:८ 24 विश्वास जक याना जुयां धर्मी जुइ मखु धकाः ला थुकिं हे सी दतनि। अय्‌जूगुलिं धर्मी जुइत विश्वास यायेगुया नापं ज्‍या नं यानाः क्‍यने माः।

25 अथे हे राहाब धाःम्‍ह छम्‍ह मिसा वेश्‍या नं देशयागु फुक्‍क खँ सीकेत वःपिं यहूदी मनूतय्‌त बाय्‌ बियाः बिसिके छ्वःगुलिं हे ला खःनि धर्मी जूगु।* २:२५ यहो २:१-२१ 26 गथे प्राण मन्‍त धायेवं मनू सी, अथे हे ज्‍या याना मक्‍यंसा विश्वास नं सी।