1 न्‍ह्यागु जूसां छं भिंगु खँ नाप ज्‍वःलाःगु जक स्‍यनेगु याना च्‍वँ। 2 बुह्रातय्‌सं थातं च्‍वनेगु, हनेबहः जुइक सना जुइगु, थःत कःघाना च्‍वनेगु, विश्वास याना च्‍वनेगु, माया यायेगु व न्‍ह्यागु खँय्‌ नं सह याना च्‍वनेगु याये माः धकाः स्‍यनेकने या।

3 अथे हे बुह्रितय्‌त नं परमेश्वरयात मानय्‌ याना च्‍वँ, मेपिन्‍त मभिंकाः खँ ल्‍हाना जुइ मते, अय्‌लाः थ्‍वँ त्‍वना जुइ मते, बरु दुग्‍यंगु खँ स्‍यनेकने या धकाः स्‍यना ब्‍यु। 4 अथे जूसा इमिसं ल्‍यासेपिं मिसातय्‌त थः मस्‍तय्‌त व भाःतयात माया यायेगु खँ स्‍यने फइ। 5 अले इमिसं इमित थःत कःघाना च्‍वनेगु, पवित्र जुया च्‍वनेगु, छेँ बांलाक कःघाना च्‍वनेगु, दया यायेगु व भाःतं धाःथें च्‍वनेगु खँ स्‍यनेकने याइ। थथे जूसा सुनानं परमेश्वरयागु वचनयात क्‍वह्यंकाः खँ ल्‍हाये फइ मखु।

6 अथे हे ल्‍याय्‌म्‍हपिं मिजंतय्‌त नं थःत कःघाना च्‍वँ धकाः स्‍यनेकने या। 7 छं थःम्‍हं हे भिंगु ज्‍या यानाः इमिगु न्‍ह्यःने नमुना जुयाः क्‍यँ। स्‍यनेकने यायेबलय्‌ खःगु, दुग्‍यंगु व 8 सुनानं छुं धाये मफय्‌क नवा। अथेजूसा विरोधीतय्‌सं नं छुं धाये मफयाः थः हे लज्‍या चाये माली।

9 दासतय्‌त नं मालिकं धाःथें यानाः इमित न्‍ह्यागु खँय्‌ नं लय्‌ताय्‌का च्‍वँ, अले जवाःसवाः याना जुइ मते धकाः स्‍यनेकने या। 10 अले उखेंथुखें खुया कायेगु मयासे भिंम्‍ह व विश्वास याये बहःम्‍ह जुयाः न्‍ह्यागु खँय्‌ नं झीत मुक्ति बियादीम्‍ह परमेश्वरयागु वचनयात तःधंके फये मा।

11 परमेश्वरं फुक्‍कसितं मुक्ति बीत दया माया यानादीगु खः। थ्‍व हे खँ फुक्‍कसितं सीके ब्‍यूगु दु। 12 थ्‍व हे दया मायां झीत पापं व संसारयागु ज्‍याखं लिचिकी, अले थःत कःघानाः धर्मी व परमेश्वरयात मानय्‌ याइपिं जुयाः थ्‍व संसारय्‌ म्‍वाना च्‍वने फइ। 13 झीत मुक्ति बियादीम्‍ह, झीम्‍ह तःधंम्‍ह परमेश्वर येशू ख्रीष्‍ट हानं झाइ तिनि। झीपिं थ्‍व हे तःधंगु आशायागु लँ स्‍वया च्‍वने। 14 झीत झीगु पापं छुतय्‌ यायेत वय्‌कः थः हे सिनादिल। थुकथं वय्‌कलं झीत थः मनू यानाः पवित्र यानादिल, अले भिंगु ज्‍या यायेत साहस बियादिल।* २:१४ भज १३०:८; प्रस १९:५; व्‍य ४:२०; ७:६; १४:२; १ पत्र २:९

15 छं थ्‍व फुक्‍कं न्‍यंका ब्‍यु। ब्‍वः बी माःसां साहस बी माःसां छं स्‍वयाः या। अले छन्‍त सुनानं हेपय्‌ याये फइ मखु।