15-16 Nyangka tjiinya-ya tiinti miirl-miirlnga pupatjunu wantingu. Palunyangka yutuwari palunyanya yangatjura kanyilpayinya pitjangu katu ngaralanytjalu tjutura kanyiranytja. Nyangka mungangka-ya nyakupayi yutuwari palunyanya warupirinypa tili kamparranyangka tiinti katalarra. 17-19 Nyangka Mama Kuurrtu-tjananya yutuwariwanalu nintitjunkupayi. Nyangka-ya mularrpartu pakara yalatja yankula ngurra ma-tjunkupayi. Tjiinya yutuwari tiinti miirl-miirlta katu ngaralanyangka Yitjurayilku tjamupirti-ya ngurrangka tirtu nyinapayi. Nyangka yutuwari palunyanya yurrirra pakara kurranyu yankulanyangka-ya palunyanyartu mirara wanalpayi. Nyangka yutuwari ngaranyangka ngurra-ya tjunkula nyinapayi. 20-22 Tjiinya yutuwari tirtu ngaralanyangka-ya pakara yankukitjamunu. Ngarna yutuwari yurrinyangkakutju-ya yarnangu pirninya yurriku. Tjiinya-tjinguru yutuwari ngurra kutjutjanu yurrinyangka-ya pakara wanalku. Nyangka-tjinguru yutuwari palunyanya rawa ngaralayilku kurli kutjutjanu yurriku. Nyangka-ya rawa nyinarrayilku nyaku yutuwari yurrinyangkakutju pakara wanalku. 23 Tjiinya-ya yungarrakurrurntu ngurra tjunkukitjamunu. Puru-ya yungarrakurrurnpa pakara yankukitjamunu. Ngarna Mama Kuurrtu Mawutjanya nintitjunkunyangka-ya pakara yalatja yankupayi.