1 Kayak Nug Kristus Jesus nuhigp̱a ig bauklel megaḵunu nai qaḵa aum amunu Nug he, da Paulus, da Kristus Jesusnu totol danab daaṯem 2 amu o Timotius, da nahipnu nai imu yaaṯem. Nahipnu amu da beḵalnab doyeye, ool ele mauhṯe. Kayak, ig Mamenig, amu ihinig Naḏi Kristus Jesus ele, a ahilah ehaniṯak oḵai hamu megṯep amu ahilah oo gai iiṯa doyak kobol amu ahilah maḏoḏ ele nahipp̱a daaglagnu ool daaṯe.

3 Da tuqan amun ele, da alalad hep̱ig bia, da oolp̱a ab iiṯa doyen, Kayak oḏe dim lamiṯen dayeye, Nug amegp̱a, “Ena hen meḏame,” awe ainne, da nahipnu ele hanhan unuqidṯem. 4 Da na amen leb neum amu amelp̱a do, da ool gamag ahaḵunu na gumiṯen goḵulnunab dab meṯem. 5 Nahip oop̱a genab doyak am genabnab da daulp̱a daaṯe. Danab laa amelagnuib iiṯa. Oop̱a genab doyak amuam tatam na alan Lois, nuhigp̱a daye amu na anin Yunis, nuhigp̱a ele dayom. Amu oop̱a genab doyak amu nahipp̱a ele daaṯe, amu da oolp̱a genab dooṯem. 6 Amunu amu da na dautp̱a doḵunu imu aṯem. Haen da ep̱el na qaḏenp̱a memi, haen amup̱a Kayak Ouḏi Nug na ehah meṯom daaṯe amu, na haen oh ehah amu maḏ eṯe! 7 Kayak Nug baḏaknu dab mak ii meḵom. Iiṯa, Nug g̱agaṯag dayaknu, nug oo mauhaknu amu ig iḵa ihinig hak atog notata daagnignu amu dab mak amu ig meḵom.

8 Amunu amu na ihinig Naḏinu madiḵutnu uḏan aib neum. Da nuhig nai mehuqen, mani guiṯakp̱a daaṯem amu dahilnu ele na uḏan aib neum. Iiṯa. Kayaknu g̱agaṯag amu ehaniṯebeb, da na ele i oh ug laala Kayaknu Nai Ena mehuqaknu beṯeb amu ug amu oh i maoḏ oiḏu! 9 Kayak Nug ig eḏua awiḵom, ig nuhiḵud danab ah op̱ia awak ele daagnignu oninigp̱a eum. Nug ihinig uḏat nobnu oninigp̱a ii eum. Iiṯa, Nug nuḵa oo niiom amu Nug nuhig ehaniṯak oḵai hamu megṯe amu ele dab maama, oninigp̱a eum. Nug ehaniṯak oḵai hamu megṯe amu ig megaḵunu anuḵanab, keeke ii dayom haenp̱a, babaiṯa, ig meḵom daaṯe. 10 Amu loḵumak dayom amge gemu ihinig eḏua awiḵak danab, Kristus Jesus, Nug uḏia he, miag atiom. Nug mauhaknu g̱agaṯag he, iiṯa me amu ig aṯemun bauklel aognig amu Nug Nai Enap̱a ip̱uniḵom. 11 Nug da Nai Ena imu mehuqḵulnu, da totol danab daaḵulnu amu ip̱uniṯak danab ele daaḵulnu meiḏom. 12 Diig amunu amu da ug imu maoṯem amge da amunu uḏal ii neṯe. Aḏinu? Da nuhignu oolp̱a genab dooṯem amunu da keeke Nug da meḏom amu Nug tutuḵu atog noobob, haen oh dayeb uḵeb, gog tak haenp̱a bataḵunu dooṯe.

13 Amu na Kristus Jesusnu ootp̱a genab doona, na nuhig daaṯem amunu na nuhig bauklelnu nai na dahilp̱anu aome amu, na amu dab menana, amuib dim lamidna oiye! 14 Kayak Nug Nai Ena meṯom amu Kayak Ouḏi, Nug am ihinigp̱a daaṯe ele amu, Nug na ehaniṯebeb, na peheṯak atog no!

15 Na doome, Asia danab ag oh da uuiḏna gop̱ig, danab amunu oolagp̱a amu Piselas, Hemosenia ele a laa aaḵu. 16 Da Naḏi Nug Onesiporas amu nug baeḵudp̱a ele amu da Kayak Nug ahilagnu oo gai iiṯa dooḵunu Kayak unuqidṯem. Aḏinu? Onesiporas nug haen kuḏum da qagaiṯak daaiyi amu nug da ool ena daaḵunu ehaniḏom. Da mani guiṯak daami amunu ele nug uḏa ii neum. 17 Iiṯa, nug Rom ip̱a uḏia, uḏat oḵai ha, da maṯiḏa aniḏom 18 amunu da keeke amu ohnu amu da gogtak haenp̱a, Naḏi Nug nuhignu oo gai iiṯa dooḵunu unuqidṯem. Nug Epesus ap̱a keeke kuḏump̱a ehaniḏom ele amu na amu doon malame.