1 O lailad, da nai imu inam maṯie malaḵul heṯem. Amu ag Naḏinu oolag gamag ahaḏ! Da am nai imu baula ahilagnu yaami amu da amunu oolp̱a ug iiṯa. Imu amu ag ehanadḵunu yaami.

2 Amu ag danab laala ag uḏat kaboliak nau heṯeb, amu dilagnu dab mena autna aweg! Ao, ag danab ag gaḏalag otaḏḵulagnu heṯeb amu ag amu dilag dab mena autna aweg! Danab amu ag iiṯa aḏi, ag beḏulag mauhnoak opat-teb, amubia heṯeb. 3 Aḏinu ag amu dilagnu dab mena autna aoglag? Ag am gaḏa otaḏak danab genab iiṯa. Ig Kayak Ouḏip̱a Kayak binag metata, Kristus Jesus onig humata, ig beḏunignu kobol ig ehanigḵunu elele amunu oonigp̱a genab ii dooṯem ele amu, ig iḵa am gaḏa otaḏaknu kobolnu danab genab daaṯem. 4 Amu beḏunu keeke ig ehanigḵunu elele daalo amu da ib amup̱a elelenab daalom. Danab laala ag beḏulagnu keeke ag ehanadḵunu elele daalob amge da amu elelenab daalom. 5 Aḏinu? Da anai oop̱anu doi, deḏ eblaih aḏit uḵe, deḏ eblaih ewamp̱a ag da gaḏal otaḏp̱ig. Da am Israel danab amu Benyamin buḏubp̱anu, da am Hibru danabnab daaṯem. Da am ḏo gumak danab-Parasia, da Juda dilag ḏo tutuḵuib dim lamidmi ele. 6 Yag bak dayaya uḏat huana hak kobolnu amu da g̱agaṯag hein, kristen tamaniak aqadmi. Amu ḏo dim lamiṯakp̱a danab tutuḵu daaḵunu amu da huana hei, laa nug ḏo aḏi aḏi heḵunignu ip̱unigṯe amu, nug dahilp̱a eheḏ hak laa anidḵunu elele iiṯanab.

7 Amge da gemu Kristusnu dab meṯem amunu keeke amu oh, anuḵa da amunu, “Keeke imu binag ele,” ami amu, da gemu keeke amunu amu da hamu bia dooṯem. 8-9 Amu da keeke amunuib ii aṯem. Iiṯa. Da aḏi keeke laa awen, Jesus ele ou aqaten, laip̱u elele bia daaṯep dooḵulnu elele iiṯanab iiṯa dooṯem. Jesus nuḵa am enanag. Keeke laa ohnu amu da keeke amunu am keeke ena, keeke genab ele ii dooṯem. Laip̱uib am Kristus Jesus, Nug am dahil Naḏi, doyak amuam keeke genabnab dooṯem. Amu da Kristusib aoḵulnu dab mein, keeke laa oh akai gop̱ig. Keeke amuam kinipan bia dooṯem. Amu da Kristusib awe, oolp̱a meḵulnu, Nug ele laip̱u daagnihnu aaḵuib ool daaṯe. Amu da uḏat dahilp̱a, ḏo dim lamiṯak kobolp̱a danab tutuḵu daaḵulnu amu da ool ii daaṯe. Iiṯa. Da danab tutuḵu daaḵulnu amu da Kristusnu oolp̱a genab dooṯem, amup̱a Kayak Nug dahilnu, “Tutuḵu danab,” awa aḵunu ool daaṯe. Tutuḵu dayak amunu diig am da iiṯa, am Kayak. 10 Amu da Kristus, Nug mauhowa, Kayaknu g̱agaṯagp̱a eḏua hibaiṯom, da Nug amu g̱agaṯag amu ele dooḵulnunab heṯem. Nug wan imup̱a tutuḵu oiyom amunu Nug ug doya, guiṯak awom, da ele amubia heḵulnu dab mein, Jesus Nug bau dayak nuhig uua mauhom amubia da hip̱unin waap̱a daaḵulnu geḏiṯen, Kristus waap̱aib daaḵulnu ool daaṯe. 11 Amu dab mak dahilp̱a amu da anam hein, da mauhe, eḏue hip̱aidḵulnu dooṯem.

12 Amu da Kristusnu kobol oh aomi, o da aaḵu elelenab daaṯem amu da amunu ii dab meṯem amge da Jesus Kristus, Nug da aun bia daaḵulnu dab ma aḏailom, da anam daaḵulnu dab mein, dayeye goṯem. 13 O lailad, genab da kobol amu awen malami amu da anam ii dooṯem amge da dab mak laip̱uib laa ele, amuam da keeke anuḵanu amu oh daul atieye, da keeke dimp̱anu amu aoḵulnu wagai meinne, 14 da hab aṯan goḵulnu wagai mein, qai edaṯem. Aḏinu? Kayak Nug da hab aṯan Kristus Jesusnu uḏatp̱a keeke ena meḏaḵunu onilp̱a eum amunu da amu aoḵulnu anam heṯem.

15 Amu ig oh ig danab kalunig ele daaṯem amu, ig da nai ami amubia dab metu! Amu ag dab mak laa ele, dahil bia iiṯa daap̱eg am, Kayak Nug nuḵa ahilag dab mak tutuḵu medaḵu. 16 Amge kobol ig aomut ele amu, ig aḏat auta aota, tuḏidta hetu!

17 O lailad, ag oh dahil kobolib dim lamiṯeg! Amu ag danab laa ihinig kobol dim lamidṯeb ele amu, ag amu dilag dim lamidḵulagnu amu anadna autna aweg! 18 Aḏinu? Danab kuḏum laa, ag ig oiṯem bia ii oiṯeb ele amu, da matu haen kuḏum ag amelagp̱a danab amunu ami, amubia gemu ele iiḵu aiyi, amel leb neṯe. Ag Kristus, Nug ad emaitakp̱a mauhom, dab mak amunu kekeḏab daaṯeb. 19 Ag aḵa ag beḏulagnuib dab meṯeb amu dab mak amu ahilag kayak bia aaḵu daaṯe. Ag am uḏanak keeke diigdiig amunu oolag gamag ahehe, ag wanp̱anu keekenuib dab meṯeb. Danab amunu ag geha padal mak aoglag. 20 Amge ig am hab aṯannu danab. Ig ehaniṯak ihinig, Naḏi Jesus Kristus, Nug ap̱anu eḏua uḏia awigḵunu tap̱aḏidta ameg meṯem. 21 Geha Kristus Nug g̱agaṯag nuhigp̱a keeke oh Nug waap̱aib maaṯeb daaglag ele, g̱agaṯag amup̱a Nug heeb, ig beḏunig mauhṯe imu am Nug beḏu enanag binag ele bianab beḵu.