1 Kana ña tnoꞌo ndichi,

vi kaꞌan jaa tnoꞌo ja jinkuiꞌnu ini.

2 Junkuiin ndee sukun xtuu yuku

vi ndetu ña nuu nukuntnaꞌa ichi,

3 te kana yatni yeꞌe nuu ndiukuei ñayiu ñuu,

te jiñaꞌa:

4 “Nuu maa ron ja ka kuu ron teyii, kana rin,

vi kaꞌan rin nuu ndiꞌi ñayiu.

5 Roon ja tu ka jini ron naxa vi saꞌa ron,

vi kutuaꞌa ja vi jinkuiꞌnu ini ron.

Te roon ñayiu vasa, vi kutuaꞌa ja vi kuiꞌnu ini ron nagua ka saꞌa ron.

6 Vi konini, chi kaꞌan rin tnoꞌo kanuu ndevaꞌa,

te kaxtnoꞌo rin tnoꞌo ndaa.

7 Te tnoꞌo kaꞌan rin yaꞌa kuu tnoꞌo ndaa,

chi tu junkuaan saꞌun ini rin ja kaꞌan rin tnoꞌo tnoꞌo.

8 Chi ndiꞌi tnoꞌo ja kaꞌan rin kuu tnoꞌo ndaa,

te tu na tnoꞌo kueꞌe ni tnoꞌo yakua kaꞌan rin.

9 Chi ndiꞌi kuu tnoꞌo ndaa nuu ñayiu jinkuiꞌnu ini,

te kaꞌan kaji nuu ñayiu niꞌi tnoꞌo ndichi.

10 Vi kuantaꞌu tnoꞌo kaxtnoꞌo rin nuu tniuu ja vi kuantaꞌu ron plata,

te vi nduku ja vi jinkuiꞌnu ini ron nuu tniuu ja vi nduku ron oro vii ndevaꞌa.”

11 Chi ja guaꞌa ndevaꞌa ka kuu tnoꞌo ndichi saa yuu vii,

te ndiꞌi ja ka jioꞌo ñayiu ma kuu vi skintnaꞌa inuu jin.

12 “Maa rin kuu tnoꞌo ndichi, te in ni ka oo rin jin tnoꞌo niꞌnu ini,

te nevaꞌa rin tnoꞌo jinkuiꞌnu ini vi tnoꞌo ja janu ichi ndaa ña.

13 Te ja yuꞌu niꞌnuo Jitoꞌo kuu ja skexiko jakueꞌe,

te ruꞌun, chi skexiko rin tnoꞌo teyii vi tnoꞌo niꞌi

vi ichi kueꞌe vi tnoꞌo neꞌe.

14 Kuenta maa rin kuu tnoꞌo xteku ña, vi tnoꞌo niꞌnu guaꞌa ini.

Maa rin kuu tnoꞌo ja jinkuiꞌnu ini, te kuenta maa rin kuu tniuu kaꞌnu.

15 Te ndee jañuꞌu ka maa rin, te ka tatnuni tee ka kuu rey,

vi ka saꞌa ndaa tee ka tatnuni nuu ka saꞌa de in in ley.

16 Te suni ndee jañuꞌu ka maa rin, te ka oo tee ka netniuu,

vi ndiꞌi tee ka tatnuni ja ka saꞌa ndaa de kuechi ñuyiu.

17 Te kutoo rin na in kutoo ña jin rin,

te na in ja vi ni ini ni anui ndanduku ñai jin rin, te ndaniꞌi ñai.

18 Nuu maa rin ka oo jakuika vi jayiñuꞌu,

vi ja vi konevaꞌa ñayiu nikuii nikani, vi ja vi koo vaꞌi.

19 Te jaguaꞌa ka kuu ja jiñaꞌa ruꞌun, masu oro ninoꞌo,

te kuaꞌa ka ja kee nuu ja jiñaꞌa rin, masu nuu kaa kuu plata.

20 Jika rin nuu ichi ndaa,

vi nuu ichi chindaa ja ndeka ndaa ña,

21 nagua ja saꞌa kuika rin ñayiu ka kutoo ña,

saa te chitu rin veꞌi jin ja vi konevaꞌi.

22 ’Maa Jitoꞌo ni saꞌa ña jin rin ndee jaxtnañuꞌu,

ndee ama kuiti ka ja kejaꞌa ya jin tniuu saꞌa ya ndee jananaꞌa yun.

23 Te ni saꞌa ña ya ndee jaxtnañuꞌu ja oo rin nikuii nikani,

ama ka ja jinkoo ñuyiu.

24 Ama ka ja vi jinkoo ndute mar, vi ja vi taꞌu kuaꞌa nuu ndute,

te ja oo rin.

25 Ja oo rin ama ka ja vi jinkoo yuku,

vi ja vi jinkoo tinduu,

26 ama ka ja saꞌa ya ñuꞌu vi ja oo nui,

te ni ñuyaka ñuꞌu ja ni saꞌa ya ñuyiu, chiaꞌan ka ja koo.

27 Te nuu ni saꞌa ya andivi vi nuu ni saꞌa siin ya ñuꞌu jin nuu ndute mar,

te yun ja oo rin.

28 Te nuu ni saꞌa ya viko ja oo andivi

vi nuu ni ndachituu guaꞌa ya nuu kee ndute ja oo kaꞌa mar,

te yun oo rin.

29 Te nuu ni tatnuni ya nuu ndute ja ma kee de kiꞌin de,

nagua ni chikuaꞌa ya ja koo de nuu ni jani ya naxa koo ñuꞌu,

30 te yun oo rin jin ya, kaꞌan rin ja oo guaꞌa tniuu saꞌa ya,

te in kiuu in kiuu kusii ini ya ja oo rin jin ya.

Te ndiꞌi ni jichi jinkuaan ini rin ja koo rin jin ya.

31 Te kusii ini rin ja jiondita rin nuu ñuyiu ni saꞌa ya,

vi junkuaan ndevaꞌa ini rin jin ñayiu ni saꞌa ia Dios.”

32 ’Vitna, vi seꞌe, te vi konini,

chi na taꞌu na ndetu ñayiu ka jika nuu ichi jika rin.

33 Vi konini tnoꞌo kaxtnoꞌo rin,

ma vi skexiko ron, te vi kuu ndichi ron.

34 Chi na taꞌu na ndetu ñayiu nini tnoꞌo kaꞌan rin,

te in kiuu in kiuu oo tuaꞌi yeꞌe rin ndetu ñai.

35 Chi na in nukuꞌun ña jin rin, te niꞌi ja kotekui,

vi niꞌi ja chindee chituu ña Jitoꞌo jin.

36 Su na in skexiko ña jin rin, te saꞌa kueꞌi mai,

chi ndiꞌi ñayiu ja ka skexiko ña, te ka kutoi ja vi kui.”