1 Na in kutoo tnoꞌo ja ka xteku ña jin, te kutoi tnoꞌo ndichi.

Su na in skexiko tnoꞌo ja ka kuxeen nui, te kui in ñayiu vasa.

2 Ñayiu guaꞌa, chi jantaꞌu ña Jitoꞌo jin.

Su tetniuu ya tnundoꞌo tnaꞌa ñayiu ndakani kueꞌe ini.

3 Tu na in kuu koyutnu jin maꞌñu sagua jakueꞌe saꞌi.

Su ñayiu ndaa, chi ka oyutnu yoꞌi, te tu na in skanda ña jin.

4 Ñasiꞌi guaꞌa ndevaꞌa kuu ña na kuinio in ita ja ni ndukutu vii xini yii ña.

Su ñasiꞌi kueꞌe, chi kuu ña na kuinio in kueꞌe ja xteꞌi yiki yii ña.

5 Ka ndakani vaꞌa ini ñayiu ndaa.

Su tnoꞌo ja ka xteku ña ñayiu kueꞌe kuu ja ka xndaꞌu ñai.

6 Tnoꞌo ka kaꞌan ñayiu kueꞌe yun kuu na kuinio ja ka jaꞌni ndiyi.

Su tnoꞌo ja ka kaꞌan ñayiu ndaa kuu ja skaku ña nuu jakueꞌe.

7 Xnaa ña ia Dios jin ñayiu kueꞌe, te ma vi koo saꞌun kai.

Su ñayiu veꞌe ñayiu ndaa, chi siun ni vi koyutnui.

8 Vi kaꞌan vaꞌa ña ñayiu jin tee ndichi.

Su vi skexiko ñai jin tee ndakani kueꞌe ini.

9 Guaꞌa ka ndee in tee ndaꞌu ja ka skexiko ña jin de, su oo in ñayiu jinokuechi nuu de,

saa in tee saꞌa kaꞌnu maa de, su jaꞌni ña ja kaa de.

10 Jito guaꞌa ñayiu ndaa kiti ja na koo vaꞌa ti.

Su ñayiu kueꞌe, chi tu kundaꞌu ndaa ini ti.

11 Ñayiu jitu nuu ñundeꞌi, chi vi suaꞌa kendoo sagua ja kai.

Su ñayiu yaꞌa yun ni ja ndakani ini, kuu ñayiu tu jinkuiꞌnu ini.

12 Ja ka ndioo ini ñayiu ka saꞌa jakueꞌe kuu ja ka ndesi mai nuu jakueꞌe yun.

Su ñayiu ndaa kuu na kuinio in yoꞌo yutnu ja yituu guaꞌa ña, te tu ndonso tnu.

13 Kanakau maa ñayiu saꞌa jakueꞌe yun nuu tnoꞌo tnoꞌo ja kaꞌin.

Su ñayiu ndaa, chi kaku niꞌnui nuu tnundoꞌo.

14 Vi niꞌi in in maa ñayiu jaguaꞌa na kuu na kuu na tnoꞌo ka kaꞌin,

te vi junkuꞌun yaꞌui na kuu na kuu na tniuu ka saꞌi.

15 Ñayiu vasa, chi ndakani ini ja oo guaꞌa ndiꞌi ja saꞌi.

Su ñayiu ndichi, chi nini tnoꞌo ja ka xteku ña jin.

16 Ñama xneꞌe ñayiu vasa mai ja kiti ini.

Su ñayiu niꞌnu ini, chi tu saꞌi kuenta ja ka kaneꞌe ña jin.

17 Na in kaꞌan ndaa, te kaꞌin nagua kuu ndija.

Su testiu tnoꞌo, chi xndaꞌu ña.

18 Tnoꞌo ja ka kaꞌan sava ñayiu nuu tu ka ndakani guaꞌa ini, xtuji inka ñayiu na kuinio in yuchi kani.

Su tnoꞌo ka kaꞌan ñayiu ndichi kuu na kuinio tatna ja ndasaꞌa ña.

19 Na in kaꞌan ndaa, te koi nikuii nikani.

Su na in kaꞌan tnoꞌo tnoꞌo, te nunuu ni koi.

20 Ninoꞌo tnoꞌo tnoꞌo oo ini anu ñayiu ka ndakani kueꞌe ini.

Su tnoꞌo sii ini oo ini anu ñayiu ka nduku ja vi koo mani.

21 Ni in jakueꞌe ma kii siki ñayiu ndaa.

Su koo kuaꞌa ndevaꞌa jakueꞌe siki ñayiu saꞌa jakueꞌe.

22 Skexiko ña Jitoꞌo jin ñayiu kaꞌan tnoꞌo tnoꞌo.

Su kusii ini ya jin ñayiu ka saꞌa ndaa.

23 Tee niꞌnu ini, chi tu xneꞌe de nagua jini de.

Su tee vasa, chi xneꞌe ndiꞌi de tnoꞌo tu jiniuꞌu ja kaꞌan de.

24 Ñayiu kuyu ja satniui, chi sui kotatnuni.

Su ñayiu kuꞌndu, chi vi kotatnuni nui ja kosatniuu ndei.

25 Tnoꞌo suchi ini ja oo ini anu ñayiu skuita ña jin.

Su in tnoꞌo vii tnoꞌo vaꞌa ndasaꞌa sii ini ña jin.

26 Ñayiu ndaa kui taniñu ja ka ndikin ña tnaꞌa kuikin.

Su ichi ja ka jika ñayiu kueꞌe jaka ña ja vi nai.

27 Ñayiu kuꞌndu, chi ni tu chioꞌi kiti ni jaꞌni.

Su ñayiu kuyu, chi niꞌi kuaꞌi ja kuu kuikai.

28 Ichi tnoꞌo ndaa jaka ña ja vi kotekuo,

te nuu ichi yun, chi ma vi kuo.