Ⅰ Nyɔꞌꞌo nyɔ-ɔ deꞌa ꞌꞌgwli na *Zezii ꞌmo-o *-Lagɔꞌɔ ꞌBhozayi -ɔ ꞌpʋʋnꞌa nyʋ a, ɔ-ɔ ꞌmo-o -Lagɔꞌɔ ꞌꞌyu. ꞌLe, nyɔ-ɔ -kmaꞌa -Lagɔꞌɔ dɩ a, ɔ -kmaꞌa ꞌɔ ꞌꞌyreetɩꞌa dɩ -lrɛɛ. Ⅱ A -gblee, -bho -a -kma -Lagɔꞌɔ dɩ ꞌle -a ꞌke ꞌɔ wlu -lokuipo, -a ꞌke ɩ ꞌbho ꞌꞌdu a, -mnɩɩ -a yiboꞌo -ka -a -kmaꞌa ꞌɔ ꞌꞌyreetɩ -lrʋʋꞌa dɩ. Ⅲ A yibo -Lagɔꞌɔ dɩꞌa -kmakmaa ꞌnɩ? Nyɔ-ɔ ꞌꞌduꞌa ꞌbho ꞌɔ wlu, ꞌɩnnɔ -kmaꞌa ꞌɔ dɩ. ꞌBho -amʋ -bodɩ, ꞌɔ wluꞌa ꞌbhoduɛɛ se ꞌꞌyi-kmu, Ⅳ -ɛkedɩmaa, nyɔꞌꞌo nyɔ-ɔ ꞌma-a ꞌɔ ꞌꞌyu, nyʋ-ʋ -seꞌa-a ꞌɔ -nʋ, ɔ-ɔ ꞌlu-o, ʋn -ke ꞌwa -kɔyi, *Sataan, tʋ wɔn ꞌmʋ. A -gblee, ꞌle -aꞌba Zeziiꞌa ꞌꞌgwlidɛɛ ꞌmʋ -a lu nɩꞌe tʋ. Ⅴ Ʋ-bʋ nyʋ ꞌmnʋ ꞌle, yɔɔ lu ꞌʋ tʋ wɔn ꞌmʋꞌa? A -gblee, nyɔ-ɔ deꞌa ꞌꞌgwli na Zezii ꞌmo-o -Lagɔꞌɔ ꞌꞌyu a, ꞌɩnnɔ nʋ ɛꞌo.

Ⅵ A -gblee, *Zezii *Kliisɩ ꞌmo-o nyɔ -yɔ yiꞌa ꞌnɔɔ ꞌkmʋ ꞌmʋ. Ɔ yiꞌa a, ʋn *batizee -nɩ ꞌnɔ-ɔ ꞌle ꞌꞌnukɔ, ꞌle, ɔ ꞌka ꞌmɛ, ꞌɔ nymɔ ꞌye tiꞌwla. Ʋn batizee -nɩ ꞌnɔ ꞌꞌnukɔ, ɛ -see ꞌbho ꞌꞌtii, ꞌɔ nymɔ ꞌwla-a ti -lrɛɛ. ꞌLe, *-Lagɔꞌɔ Lisaazuzu ꞌma-a -ziadɩꞌa ꞌmʋzayi, ɔ na ɩ -se sɩn -ko. Ⅶ-Ⅷ A ꞌye li-ɔ, -Lagɔꞌɔ Lisaazuzu-e, ꞌɔ batizeeni -ke ꞌɔ nymɔ-ɔ ꞌwlaꞌa ti, ꞌɩnnɩ -tɔꞌɔ nyʋ -ka ɔ ꞌꞌduꞌa -Lagɔꞌɔ ꞌꞌyu. Ɩ-bɩ lɩꞌa ꞌdigbi tan ꞌmnɩ, lɛ -lue ɩ-ɩ zaꞌa ꞌzɔ. Ⅸ Lɩ -ke -da nyʋ ꞌyeꞌa, -bho ʋn -za ꞌya ꞌꞌkpidɩ ꞌmʋ, a-a ꞌlɩ -ɩ -ziadɩ, ꞌle -Lagɔꞌɔ ꞌmʋzadɩ ꞌbhle-e ꞌnynɩ, ɛ ꞌye nyunyuꞌa nɛ -zi, ꞌle ɩ-bɩ dɩ ꞌmnɩ, -Lagɔꞌɔ ꞌꞌbhuo-o -zɩ ꞌɩ ꞌmʋ ꞌbho ꞌɔ ꞌꞌyu ꞌꞌkpi.

Ⅹ Nyɔ-ɔ deꞌa ꞌɔ ꞌꞌyu ꞌmnɔ ꞌꞌgwli, ꞌɛ dɩ ꞌɔ ꞌmʋzadɩ ꞌmnɩ -nɩꞌe -ɩnmʋ ꞌmʋ. Ɛ -nɩꞌa -kaa ꞌmʋ a, nyɔ-ɔ seꞌa -Lagɔ ꞌꞌgwlide, ɔ-ɔ ꞌꞌluo-o -Lagɔ ꞌmʋ -ka sɩncɛyi. -Ɛkedɩmaa, dɩ ɔ -zaꞌa ꞌmʋ ꞌbho ꞌɔ ꞌꞌyu ꞌꞌkpi, ꞌɔ nyɔtu -see ɩ -ziadɩ ꞌla. Ⅺ Ɩ-bɩ ꞌɔ ꞌmʋzadɩ ꞌmnɩ, ꞌɩnnɩ ꞌka-a: Ɔ ꞌꞌnyɩ-e -amʋ ꞌꞌkɔgwlɛtinɩɛzɛgɛ. ꞌLe, ɛ-bɛ tinɩɛ ꞌmnɛ ɛ, ꞌɔ ꞌꞌyu-u ꞌbhleꞌe ꞌɛ ꞌꞌlru kwa. Ⅻ Ɛ-bɛ ꞌꞌkɔgwlɛtinɩɛzɛgɛ ꞌmnɛ, nyɔ-ɔ -ke ꞌɔ ꞌꞌyu ꞌmnɔ ꞌꞌsisriꞌa ꞌꞌyi, ɔ-ɔ ꞌye -ɛꞌo. Nyɔ -yɔ -ke ɔ seꞌa tikpʋkpʋn, ɔ-ɔ bɔ ꞌnɛ ꞌmʋ-ɛ.

ⅩⅢ A-bʋ deꞌa -Lagɔꞌɔ ꞌꞌyu, *Zezii, ꞌꞌgwli, ꞌɩn-ɩ ꞌpo-o amʋ ꞌꞌbɔgʋ -nɛɛ -jeyi, ꞌle, -ka a ꞌyeꞌa ꞌꞌkɔgwlɛtinɩɛzɛgɛ, a ꞌke ɩ yibo. ⅩⅣ -Bho -a -ka -Lagɔꞌɔ ꞌgwlʋdɩ-ɩ nʋ, ꞌle -a ꞌke ɔ lɛ ꞌybhaa, -a ꞌde-e ꞌꞌgwli na ɔ ꞌkpʋn-o -aꞌba bhadewlu. ꞌƐ dɩ, -bho -a -nɩꞌe ꞌbho ꞌɔ ꞌꞌyigbeyi, ꞌle -sɩanyɩꞌa ꞌlbhaꞌa -amʋ. ⅩⅤ -Bho -a ꞌybhaa nɔ lɛ, -a de ꞌtɔ-ɔ ꞌꞌgwli na ɔ ꞌkpʋn-o -aꞌba bhadewluꞌa dɩ, -a deꞌe ꞌꞌgwli -lrɛɛke na ɔ-ɔ ꞌꞌnyɩ ꞌɛ -amʋ-ɛ.

ⅩⅥ A -gblee, ꞌꞌnyinynidɩ -ke ꞌꞌlru ꞌꞌyi nyɔ -seeꞌa ꞌmɛ yi katii ꞌbho -Lagɔꞌɔ ꞌꞌyigbeyi, -bho a ꞌye a -Bozeziiꞌa nyɔ li, -bho ɔ -kɩ ɩ-ɩ nʋ a, a po *-Lagɔ wɔn gbo ꞌle ɔ ꞌke ꞌya dɩ ꞌbhɔ, ɔ ꞌke ɔ ꞌbho ꞌɔ ꞌꞌkɔgwlɛtinɩɛzɛgɛꞌɛ -jeyi le -ya! ꞌꞌNyinynidɩ -ke ꞌꞌlru ꞌꞌyi nyɔ -seeꞌa ꞌmɛ yi katii ꞌbho ꞌɔ ꞌꞌyigbeyi, nyʋ-ʋ nʋ ꞌɩ a, ꞌwa ꞌꞌsɛ ꞌɩn ꞌꞌsiꞌe ꞌnynɩ. A -gblee, ꞌꞌnyinynidɩ -lue-e -nɩꞌe ꞌbho: ꞌɛ dɩ nyɔ-ɔ ꞌye ꞌmɛ mʋ katii ꞌbho ꞌɔ ꞌꞌyigbeyi. -Bho ɛ ꞌꞌdu ɛ-bɛ ꞌꞌnyinynidɩ ꞌmnɛ, aꞌba po ɔ wɔn gbo -le ꞌɔ nyɔtuꞌa dɩ! ⅩⅦ Lɛꞌꞌo lɛ-ɛ seꞌa ꞌꞌyiꞌsrɛɛ ꞌbho ꞌɔ ꞌꞌyigbeyi, ɛ-ɛ ꞌmo-o ꞌꞌnyinynidɩ. Ɛ -nɩꞌa -kaa ꞌmʋ a, ꞌꞌnyinynidɩ -lrɩɩ-ɩ -nɩꞌe ꞌbho, ꞌya dɩ nyɔ -see ꞌmɛ yi katii ꞌbho ꞌɔ ꞌꞌyigbeyi.

ⅩⅧ Nyɔ-ɔ ꞌma-a ꞌɔ -nɔ ɔ, -a ꞌde-e ꞌꞌgwli na ɔ-ɔ ꞌbhɔ-ɔ ꞌꞌnyinynidɩꞌa nʋnʋdɩ, -ɛkedɩmaa, ꞌɔ ꞌꞌyu Zezii-i ꞌꞌdu -ɔ ꞌꞌyrili ꞌle ꞌꞌnyinynidɩꞌa tiyayi se ɔ wɔnyiꞌbhɛɛ.

ⅩⅨ -Abʋ ꞌde-e ꞌꞌgwli na -Lagɔꞌɔ ꞌꞌyreetɩ -a ꞌꞌduꞌo, ꞌle nyʋ -lrʋʋ -nɩꞌe ꞌꞌnyinynidɩꞌa tiyayiꞌa -kpɛɛ wɔn ꞌmʋ.

ⅩⅩ -A yiboꞌo-o -lrɛɛke na -Lagɔꞌɔ ꞌꞌyu Zezii *Kliisɩ ꞌyi-e ꞌnɔɔ ꞌkmʋ ꞌmʋ ꞌle ɔ ꞌye -amʋ -naagɩ ꞌꞌnyɩ -a ꞌke -Lagɔzɛgɛ yibo. -A -ke -Lagɔzɛgɛ ꞌmnɔꞌɔ ꞌꞌbhuo ꞌꞌsisriꞌe-e ꞌꞌyi ꞌle -a -ke ꞌɔ ꞌꞌyu, Zezii, kpʋkpʋnꞌo ti -lrɛɛ, -ɛkedɩmaa, Zezii-i ꞌmo-o -Lagɔzɛgɛ ꞌle ɔ ꞌbhleꞌe ꞌꞌkɔgwlɛtinɩɛzɛgɛꞌɛ ꞌꞌlru kwa.

ⅩⅪ A -gblee, ꞌan dɩkmayreetɩ-a, lɛꞌꞌo lɛ-ɛ ꞌka -Lagɔꞌɔ ꞌbɩ ꞌmʋꞌꞌluo ꞌle aꞌba -pɔlʋ ꞌzɔ, a ꞌꞌdu aꞌba ꞌꞌbhi ꞌꞌyrili ꞌɛ dɩ!