ꞌPɔlʋꞌa ꞌꞌyizabɔgʋ ɔ poꞌa TESALONIKƖKƆMƲ -jeyi
Wludie poꞌa nyɔ ꞌꞌbɔgʋ -nɛɛꞌɛ -naagɩ ꞌli.
Tesalonikɩkɔmʋ ꞌma-a Zeziiꞌa nyʋ, ꞌɩnnʋ ꞌɔ -dalbhoyi ꞌPɔlʋ poꞌo ꞌꞌbɔgʋ -nɛɛ -jeyi. Ɔ ꞌnʋ-o -kaa, -ɛkedɩmaa, ꞌwa ꞌꞌdɩzɩgɩ-ɩ ꞌwlʋꞌa ꞌle ʋ gbo, ꞌya kuna nyʋ po ɔꞌo. ꞌƖnnɛ ꞌbhleꞌe ꞌnynɩꞌa dɩ ɔ-ɔ po ꞌʋ ꞌkpa ꞌꞌyi ꞌle ʋn ꞌke ꞌkpa ꞌꞌyi ku ꞌꞌkɔmʋ. Ɔ na ɔ ꞌbɔ-ɔ ti ɔ ꞌke ꞌle ʋ gbo le mu. Ɔ -see -bhla -kaa nʋ keꞌa dɩ, lɩ -lrɩɩ ʋn dede ꞌnɔ ti a, ɔ-ɔ ꞌꞌdu ꞌɩ wlu ꞌꞌkpi. Lɛ -lue ʋn dede ꞌnɔ ti a, ꞌɩnnɛ ꞌmo-o, Zeziiꞌa leyiɛ -ke ꞌɔ nyʋ-ʋ ꞌmɛꞌɛ ɛ, ꞌwa glusɔdɩ.
Ⅰ
ꞌYewlu
Ⅰ ꞌƖnmɔ ꞌPɔlʋ-e *Silɩvɛɛ -ke Timotee, a-bʋ Tesalonikɩkɔmʋ ꞌma-a Zeziiꞌa -glɩgbawɔnyiꞌa nyʋ, -a-bʋ ꞌyeꞌe amʋ! ꞌBho ꞌɛ lemʋ, ꞌɩn-ɩ ꞌpo-o amʋ wlu -jeyi. A-bʋ ꞌma-a -aꞌba -tɩta -Lagɔ -ke -aꞌba -Kɔyi *Zezii *Kliisɩꞌa nyʋ, -Lagɔꞌɔ ꞌꞌnitiwʋnnakʋta -nɩ amʋ ꞌꞌkpi ꞌle ɔ ꞌke amʋ -pɔlʋꞌa bhlubhlua ꞌꞌnyɩ!
*Zeziiꞌa nyʋ-ʋ -nɩꞌa Tesalonikɩ, -ka ʋn de ꞌɔ ꞌꞌgwli ꞌle -ka ꞌwa kpli -ke ꞌɔ nɩ gʋgɔꞌɔ, ꞌkla-a ꞌka-a
Ⅱ A ꞌye li-ɔ, -bho -a -ka *-Lagɔ wɔn gbo-o po, -a popo-o aꞌba ꞌweeꞌa dɩ ꞌgwlʋti ꞌꞌkɔmʋ ꞌle -a po ꞌɔ ꞌsɛɛ aꞌba dɩ. Ⅲ A -gblee, -ka a ꞌꞌduꞌa -aꞌba -Kɔyi *Zezii *Kliisɩꞌa ꞌꞌgwlideɛꞌɛ dɩ ꞌle a-a nʋꞌa lbhʋ, ꞌle a-a sɩaꞌa tenyɩ ꞌɔ dɩkmɛɛꞌɛ dɩ a, ꞌle a-a de ꞌnɔ -pɔlʋ ꞌꞌyiꞌa dɩ, a-a kuꞌo ꞌkpa ꞌꞌyi, ꞌya ꞌwee -a -see ɩ ꞌmate ꞌbho -aꞌba -tɩta -Lagɔꞌɔ ꞌꞌyigbeyi.
Ⅳ ꞌLotʋꞌa ꞌꞌnynuu-a, -ka -Lagɔ -kmaꞌa aꞌba dɩ ꞌle ɔ ꞌyeꞌa ꞌbho amʋ -za ꞌle a ꞌke ꞌɔ nyʋ ꞌꞌdu, -abʋ yiboꞌo-o ꞌna. Ⅴ A ꞌye li-ɔ, ꞌle *-Lagɔꞌɔ Lisaazuzuꞌa wɔnkuɛ ꞌmʋ -a -yaꞌa amʋ Zeziiꞌa ꞌꞌdɩzɩgɩ. -A yiboꞌo-o ꞌꞌdɩ ꞌmnɩ ꞌmo-o -ziadɩ. Ɩ -se wlufɔfʋ -ko. -A -nɩꞌa ꞌle aꞌba ꞌꞌklumʋ, kpli -yɩ -a -tɔꞌɔ, -ka ɩ ꞌka amʋ -zɩgɩ -bodɩ nʋ ꞌle a ꞌke ꞌpʋn ꞌbho -Lagɔꞌɔ ꞌꞌyigbeyi, a yiboꞌo-o ꞌna.
Ⅵ A-bee -mnʋʋ a, -a nʋꞌa -kaa a, a -zaꞌa-a -abʋ -ke -aꞌba -Kɔyi Zezii Kliisɩꞌa kpli ꞌꞌsɛlɩ. A ꞌwɔɔnꞌɔ Zeziiꞌa ꞌꞌdɩzɩgɩ, ꞌle, ꞌbʋbʋa -Lagɔꞌɔ Lisaazuzu poꞌa amʋ ꞌmʋ, ꞌɛ dɩ, sɩasɩaaꞌa lɩꞌa -dadudu -ke ꞌmʋ a -zi -nɩꞌa ɩ-bɩ wlu ꞌmnɩꞌa dɩ, a ꞌbhɛɛ ꞌnɩ wɔnyi. Ⅶ ꞌKa-a aꞌba kpli -nɩꞌa dɩ a, ꞌbho aꞌba ꞌꞌkpi a, Masedʋanɩbhlʋkpa -ke ꞌꞌkpi a -nɩꞌa-e, Akayibhlʋkpa ꞌꞌkpiꞌa Zeziiꞌa ꞌꞌgwlidemʋ ꞌwee ꞌbhɛɛꞌo ʋn ꞌke amʋ ꞌꞌyikpi -za ꞌle ʋn ꞌke aꞌba ka nʋ. Ⅷ A -gblee, -aꞌba -Kɔyi Zezii Kliisɩꞌa ꞌꞌdɩzɩgɩ-ɩ ꞌwlʋꞌa ꞌle -Lagɔ gbo, -ɩ ꞌkpaꞌa ꞌbho a ꞌꞌbhli glu, a -see ɩ ꞌplʋ -kpʋn. Aꞌba -Lagɔꞌɔ ꞌꞌgwlideɛꞌɛ ꞌꞌdɩ -waꞌa-a ꞌbhlɩkpɩ -lrɩɩꞌa -dadudu ꞌꞌkpi ti. Ɛ -se Masedʋanɩ -ke Akayibhlʋkpa ꞌꞌkpiꞌa ꞌꞌsɛ -ko. ꞌƐ dɩ a, -abʋ se ꞌtɔ ꞌbhɛɛ -a ꞌke aꞌba ꞌꞌdɩ -za -lreeka. Ⅸ A ꞌye li-ɔ, -a yiꞌa ꞌbho aꞌba gwlɔ ꞌmʋ, -ka a kpʋnꞌa -amʋ -gli, ꞌle a ꞌyeꞌa aꞌba kɔkuiꞌa bʋbɔdɩ ꞌbhɔ ɔ, ꞌle a ꞌyeꞌa Tinɩlagɔzɛgɛ gbo ꞌꞌbhiti ꞌle ɔ ꞌyeꞌa amʋ -kɔ, ꞌle a-a bʋbɔ ꞌnɔ ɔ, nyʋ ꞌmnʋ-ʋ zɩ ꞌɩ ꞌmʋ-ɛ. Ⅹ Lɩ ʋn-ʋ zaꞌa ꞌmʋ -lrɛɛ, ꞌɩnnɩ ꞌmo-o, ꞌɔ ꞌꞌyu-u ꞌyeꞌa ꞌle yaku ꞌli ꞌwlʋ mʋ, -ɔ ꞌka ꞌnɔɔ ꞌkmʋ ꞌmʋ le yi, ꞌɔ leyinɔɔ ꞌmnɛ, ꞌɩnnɛ a-a fuoꞌo wɔn ꞌle ꞌbʋbʋa ꞌmʋ. Ɔbɔ ꞌmnɔ, ꞌɩnnɔ ꞌmo-o Zezii. -Lagɔ -zɔ ꞌɔ-ɔ glu ꞌle ꞌmɛmʋꞌa ꞌꞌklumʋ ꞌle ɔ ꞌye ti-nɩ -lrɛɛ. Zezii ꞌmnɔ, -Lagɔꞌɔ ꞌcɛkʋta ꞌyeꞌa -yi mʋ, ꞌɩnnɔ -zɛ ꞌɛ -amʋ ꞌꞌkpi.