Ⅰ A -gblee, ꞌlotʋꞌa ꞌꞌnynuu-a, ɩ-bɩ dɩ ꞌmnɩ, -nɔɔ -ke ti ɩ-ɩ ꞌyeꞌa -zi mʋ, ꞌbho ꞌɛ damʋ, ꞌɩn se lɛ ꞌbhle ꞌɩn ꞌke amʋ -bodɩ ꞌmʋ-za -lrɛɛ, Ⅱ -ɛkedɩmaa, aꞌba ꞌꞌbhi yibo nɩ-oꞌo ꞌꞌgɩɩ! -Ka, -bho nyɔ -seeꞌa ꞌꞌyriyi ꞌꞌgwlide ꞌle ɔ-ɔ ꞌdaa ꞌnɔ ꞌzɔ ꞌꞌmatʋ a, -ka -lue ꞌmnɔ, ꞌka-a -aꞌba -Kɔyi Zeziiꞌa leyinɔɔ-ɔ ꞌye nyʋ tiꞌgete mʋ -lrɛɛ. Ⅲ A ꞌye li-ɔ, nyʋ-ʋ -seꞌa-a ꞌɔ nyʋ, -da ʋn-ʋ ꞌyeꞌa na, ꞌbhlʋkpa -deꞌe ti, nymɔꞌɔ ꞌꞌsi ʋ ꞌgwlʋ, -nʋ mʋ a, ꞌbho ꞌmnɔ ꞌbho-o ꞌkleyeɛɛ-ɛ ꞌye ʋ tiꞌgete -nɩ mʋ -gblukutu! ꞌWa -lue ꞌtɩn -see ꞌɛ wɔn ꞌmʋ -cɛ yi. -Ka -nɩgblaanynɔꞌɔ ꞌgwlʋlicɛɛ -nɩꞌa a, ꞌka-a ɛ-ɛ ꞌye -nɩ mʋ.

Ⅳ A-bʋ -yʋʋ a, ꞌlotʋꞌa ꞌꞌnynuu-a, nyʋ-ʋ -seꞌa-a ꞌɔ nyʋ, a -se ʋ -ko. Ɔ -see amʋ ꞌzɔꞌdaa yi ꞌꞌyriyiꞌa ka. Ⅴ A -gblee, a ꞌꞌdu-o ꞌɔ nyʋ ꞌꞌfɩa ꞌwee. Ⅵ ꞌKa-a ɛ -nɩꞌe ꞌmʋꞌa dɩ a, -a san ꞌꞌyi, -a ꞌke yra de ꞌle -a ꞌke ɔ wɔn-fuo, -a kpʋn dɩ li! -Ka nyʋ-ʋ -seꞌa-a ꞌɔ nyʋ, ꞌwa deꞌa yra, -aꞌba nʋ -kaa -le! Ⅶ A -gblee, nyʋ-ʋ ꞌmʋ-o ꞌꞌnynɔɔ, ꞌle, ꞌwa tɔlʋ, nmɛ-ɛ zi ʋꞌo ꞌꞌmatʋ. ꞌWa nyʋtuꞌa san ꞌꞌyi, ꞌwa yaa ꞌmʋti. Ⅷ A ꞌye li-ɔ, ꞌɔ nyʋ -a ꞌꞌduꞌa dɩ, -a yaa ꞌmʋti ꞌle -a ꞌke dɩ likpʋn, -ka ꞌꞌsrojayi -nɩꞌa ka ꞌle ɔ-ɔ ꞌbhaaꞌa ꞌɔ ꞌbɛtɛ ꞌꞌyi ꞌle ɔ ꞌke ꞌɔ ꞌꞌbhuo ꞌꞌyi-ka a, ꞌka-a Zeziiꞌa ꞌꞌgwlideɛ -ke dɩkɩkmɛɛ kpʋkpa ꞌle -amʋ ꞌmʋ ꞌꞌkpiti ꞌle ɩ ꞌke -amʋ ꞌmʋ -nɩ ꞌꞌkɔmʋ, ꞌle, -ka ꞌꞌsrojayi-i paꞌa nɛtɛkwloo ꞌꞌlru ꞌmʋ ꞌle ɔ ꞌke ɛ ꞌꞌyi-ka, lɛ -kɛɛ ɛ kpʋn a, ꞌka-a -a de -aꞌba -pɔlʋ Zezii ꞌꞌyi ꞌꞌkɔmʋ! ꞌƆ dɩ -a ꞌpʋnꞌo ꞌbho -Lagɔꞌɔ ꞌꞌyigbeyi, ꞌle, ɛ-bɛ ꞌpʋnpʋan -yɛɛ ɛ, -nɔɔ -ke ti ꞌɛ tinɩɛtu-u ꞌyeꞌa -amʋ ꞌmʋ ꞌꞌyi mʋ ꞌle ɛ ꞌka tiꞌpɩple, ꞌɩnnɛ -a deꞌe -pɔlʋ ꞌꞌyi. Ⅸ A -gblee, -Lagɔ -zaꞌa ꞌbho -amʋ-ɛ ɔ ꞌke -amʋ ꞌpʋʋn ꞌbho ꞌɔ ꞌꞌyigbeyi ꞌle -a ꞌke ꞌle ꞌpʋnpʋan ꞌmnɛ ꞌli ti-de ꞌꞌkɔmʋ. -Aꞌba -Kɔyi Zezii Kliisɩ ɔ -zi -nɩꞌe ꞌmʋ ꞌle ɔ ꞌye ɛ nʋ. Ɔ -see -amʋ ꞌbho -za ꞌle ɔ ꞌke -amʋ -zigle -kpʋn.

Ⅹ -Aꞌba ꞌpʋnpʋan ꞌmnɛꞌɛ dɩ Zezii ꞌmɛꞌo. ꞌLe, -bho ɔ yi le, -bho -a ꞌmɛ see o, -bho -a -nɩ -bhla ti o, -a -ke ɔ ꞌke -dalue -de ꞌꞌkɔmʋ.

Ⅺ ꞌƐ dɩ a, -ka a ꞌbhleꞌa -laa kwa a, a popo ꞌkpɩ ꞌꞌyi ꞌle a ꞌke kpʋkpa, ꞌle a ꞌke Zeziiꞌa -jeyi -na -ka -zɛgɛka!

Ⅻ ꞌLotʋꞌa ꞌꞌnynuu-a, ꞌbho ꞌɛ lemʋ -lrɛɛke a, ꞌɩn-ɩ ꞌtmʋʋꞌo amʋ-ɛ, a ꞌꞌdu ꞌbho nyʋ-ʋ nʋꞌa -Lagɔlbhʋ ꞌle aꞌba ꞌꞌklumʋ. Ʋbʋ ꞌmnʋ, ꞌɩnnʋ -aꞌba -Kɔyi *Zezii deꞌe amʋ ꞌꞌlru ti ꞌle ʋn ꞌke amʋ -tɔ, ʋn ꞌke amʋ ꞌꞌsrɩn ꞌmʋ ꞌꞌdu; ꞌɩnnɛ ꞌmo-o aꞌba -jolʋgbopoɛ. ⅩⅢ Ʋn-ʋ ꞌnʋ-o lbhʋ ꞌle aꞌba ꞌꞌklumʋꞌa dɩ a, a ꞌbhɛɛ nʋ ꞌꞌyi ꞌle a ꞌke ꞌwa dɩ -kma tenyɩ! -Ka a -dieꞌa ꞌmʋ ꞌwee, a ꞌwʋwla -pɔlʋ ꞌꞌkpi ti.

ⅩⅣ -Yɛ kɔꞌɔ ꞌbho -lrɛɛ ɛ, ꞌle Zeziiꞌa nyʋꞌa ꞌꞌklumʋ nyʋ-ʋ vlanꞌa a, -a ꞌpo-o amʋ ꞌkpa ꞌꞌyi a ꞌke ʋ ꞌꞌsrɩn ꞌmʋ ꞌꞌdu. Nyʋ-ʋ ꞌbhleꞌa -sɩanyɩ ku ꞌmʋti, a de ʋ -pɔlʋ ꞌli ti; nyʋ-ʋ seꞌa ꞌmʋtikuku ꞌbho -Lagɔjeyi a, a -kpa nʋ, a -ku ꞌꞌgwli ꞌle nyʋ ꞌwee -bodɩ! ⅩⅤ A ꞌꞌdu aꞌba ꞌꞌbhi ꞌꞌyrili, ꞌle, -bho nyɔ nʋ amʋ ꞌꞌnyinynidɩ ꞌꞌlruli, a -kaa ꞌɛ kpa -za! ꞌLe aꞌba ꞌꞌklumʋ o, ꞌle nyʋ ꞌwee -bodɩ o, a nʋ -zɛgɛꞌɛ ꞌꞌsɛ ꞌle -nɔɔꞌꞌo nɔɔ ꞌli!

ⅩⅥ A ꞌbhle ꞌbʋbʋa ꞌli ꞌꞌkɔmʋ, ⅩⅦ aꞌba -kpʋn *-Lagɔꞌɔ wɔngbopoɛ ꞌplʋ -le, ꞌle a -ke Zezii *Kliisɩ ꞌke ꞌꞌyiꞌꞌsisri ꞌꞌkɔmʋ, ⅩⅧ ꞌle, lɛꞌꞌo lɛ-ɛ ꞌyeꞌa amʋ -bodɩ -yi mʋ, -bho koo ɛ -nɩ ꞌmʋ o, a po ꞌɛ dɩ -Lagɔ ꞌsɛɛ! A -gblee, a-bʋ -ke Zezii Kliisɩ ꞌꞌsisriꞌa ꞌꞌyi, -kaabodɩ ꞌmnɩ, ꞌɩnnɩ -Lagɔ-ɔ ꞌbɔꞌɔ amʋ ꞌmʋ ti.

ⅩⅨ Lbhʋ *ꞌɔ Lisaazuzu ꞌbɔꞌɔ ti ɔ ꞌke nʋ ꞌle aꞌba ꞌꞌbhi ꞌmʋ o, ꞌle nyʋ -lrʋʋ ꞌmʋ o, a ꞌꞌnyɩ ɔ ꞌꞌyiflɔɛ, ⅩⅩ ꞌle, -bho nyɔ -za -Lagɔꞌɔ wlu ꞌmʋti a, aꞌba -tri nɩ -lokui ti -le! ⅩⅪ Lbhʋꞌa -dadudu-u nʋɛꞌɛ -kaa, a ꞌcrɩ ɩ ꞌmʋti ꞌle a ꞌke ꞌya -ziadɩ ꞌye ꞌle a ꞌke ɩ ꞌwɔɔn! ⅩⅫ ꞌBho ꞌɛ lemʋ a, ꞌlotʋꞌa ꞌꞌnynuu-a, lɛꞌꞌo lɛ-ɛ ꞌma-a ꞌꞌnyinynidɩ, a ple ɛ li!

ⅩⅩⅢ -Lagɔ -ke ꞌꞌbhuo-o ꞌꞌnyɩꞌa nyʋ -pɔlʋꞌa lipɩpɛɛ ɛ, ɔ nʋ ɛ ꞌle ɔ ꞌke amʋ ꞌꞌyisrɛɛmʋ po ꞌbho ꞌɔ ꞌꞌyigbeyi ꞌle ɔ ꞌke aꞌba nyɔꞌꞌo nyɔ -kɔ ꞌꞌfɩa ꞌwee ꞌle aꞌba tɩnɩɛꞌɛ ꞌwee ꞌli, ꞌle a ꞌke pepepe -nɩ, ꞌle, -bho -aꞌba -Kɔyi Zezii Kliisɩꞌa leyinɔɔ ꞌke nyni a, a -kaa ꞌꞌnyinynidɩ liꞌbhle! ⅩⅩⅣ A -gblee, -Lagɔ ꞌlaꞌa amʋ a ꞌke ꞌɔ nyʋ ꞌꞌdu, ɔ ꞌsrɛɛꞌɛ-ɛ ꞌꞌyi. A de ɔ ꞌꞌgwli, lɛ ɔ ꞌꞌduꞌa wɔn ꞌle amʋ ꞌmʋ, ɔ-ɔ ꞌye -ɛ -nʋ -mʋ ꞌle ɔ ꞌke ɛ ꞌꞌyigwɛ ꞌle nyʋ ꞌke ꞌɛ ꞌꞌyriꞌa ꞌbɩ ꞌye! ꞌƆ cɛ sɩn.

ⅩⅩⅤ ꞌLotʋꞌa ꞌꞌnynuu-a, a po ɔ -aꞌba dɩ wɔn gbo!

ⅩⅩⅥ ꞌBho -aꞌba ꞌbɩ ꞌmʋ a, a -ke ꞌlotʋꞌa ꞌꞌnynuu ꞌwee gbɩgble ꞌle a -ke ʋn ꞌke ꞌyɩye ꞌle dɩkɩkmɛɛ ꞌmʋ! ⅩⅩⅦ ꞌLe -aꞌba -Kɔyi Zeziiꞌa ꞌnynɩ ꞌmʋ, ꞌɩn-ɩ ꞌtri -ɛ -jiɛ ꞌꞌkpi ti, a -zrɛ -nɩ ꞌꞌbɔgʋ -nɛɛ ꞌbho ꞌwa ꞌweeꞌa ꞌꞌyigbeyi!

ⅩⅩⅧ -Aꞌba -Kɔyi Zezii Kliisɩ ꞌmnɔꞌɔ ꞌꞌnitiwʋnnasʋ -nɩ amʋ ꞌꞌkpi ꞌwee!