Ⅰ ꞌBho ꞌɛ lemʋ a, ꞌlotʋꞌa ꞌꞌnynuu-a, a po -aꞌba dɩ *-Lagɔ wɔn gbo, ꞌle -aꞌba -Kɔyi *Zeziiꞌa ꞌꞌdɩzɩgɩ ꞌke ti-wa ꞌle ɩ ꞌke nya mu ꞌle nyʋ ꞌke ɩ ꞌwɔɔn ꞌle ʋn ꞌke ɩ ꞌbho ꞌꞌdu! -Ka a-bee -see ꞌɩ ꞌplʋ -kpʋn, ꞌle ɩ ꞌke -kaa -nɩ ꞌle -da ꞌwee. Ⅱ A po ɔ wɔn gbo -aꞌba dɩ -lrɛɛ ꞌle ɔ ꞌke -amʋ ꞌꞌyriliꞌꞌdu, lɩ nyanɩbhlemʋ ꞌbɔꞌɔ ti ʋn ꞌke -amʋ -bodɩ nʋ, ɩ -kaa -amʋ ꞌꞌyi pa! A -gblee, ɛ -se nyʋ ꞌwee ꞌwɔɔn ɩ-bɩ ꞌꞌdɩzɩgɩ ꞌmnɩ -ko.

Ⅲ A ꞌye li-ɔ, -aꞌba -Kɔyi Zezii *Kliisɩ ꞌsrɛɛꞌɛ-ɛ ꞌꞌyi, lɛ -ke dɩ -a de ꞌɔ ꞌꞌgwli, ɔ-ɔ nʋ -ɛꞌo. ꞌƐ dɩ -a yiboꞌo ɔ-ɔ ꞌye-e amʋ ꞌkpɩ ꞌmʋ -po -mʋ, ꞌle ɔ ꞌke amʋ ꞌꞌyriliꞌꞌdu, lɩ ꞌꞌnyinynidɩꞌa tiyayi *Sataan-a ꞌbɔꞌɔ ti ɔ ꞌke amʋ -bodɩ nʋ, ɩ -kaa amʋ ꞌꞌyi pa. Ⅳ Zezii-i ꞌkpa-a -amʋ, ꞌle, a-bee -bodɩ, -a yiboꞌo, lɩ -a -zaꞌa amʋ -bodɩ ꞌmʋ a, a-a nʋ -ɩꞌo ꞌle a ꞌke ɩ nya kpa -lrɛɛ. Ⅴ Ɔ -kpa amʋ, ꞌle, -ka -Lagɔ -kmaꞌa nyʋꞌa dɩ tenyɩ, a ꞌke -kaa yibo -ziaka ꞌle Zeziiꞌa ꞌkpayikuɛ ꞌke amʋ ꞌmʋ -nɩ -ka -zɛgɛka!

Ⅵ ꞌLotʋꞌa ꞌꞌnynuu-a, -a ꞌtmʋʋꞌo amʋ-ɛ ꞌle -aꞌba -Kɔyi *Zezii *Kliisɩꞌa ꞌnynɩ ꞌmʋ, Zeziiꞌa nyʋ-ʋ vlanꞌa a, aꞌba -ke ꞌwa ꞌwʋwla ꞌmʋ -le! Ʋbʋ ꞌmnʋ, lɩ -a -tɔꞌɔ amʋ a, ꞌwa ꞌwɔn ʋn ꞌke ɩ ꞌbho ꞌꞌdu. Ⅶ A ꞌye li-ɔ, -a -nɩꞌa aꞌba ꞌꞌklumʋ, kpli -a -tɔꞌɔ ɔ, -ka -a -seeꞌa vlan a, a ꞌye-e ꞌna li, ꞌle aꞌba ꞌꞌbhi yiboꞌo -ka ɛ -nmɔꞌɔ ꞌꞌyrili a ꞌke -amʋ ꞌꞌsɛlɩ-za. Ⅷ A -gblee, ꞌle zɔ ꞌmʋ -a ꞌnʋ-o ꞌꞌyikmulbhʋ, ꞌle glu-u gwɛꞌɛ -amʋ, ꞌle -a -kaa amʋ -taniɛ bhʋ ꞌmʋ ꞌꞌdu ꞌle lililɩ ꞌmʋ. ꞌBho ꞌya damʋ, a -see nyʋ ꞌmʋ ꞌpɛɛ. Ⅸ -A ꞌka -kaa nʋ a, ɛ -se ꞌꞌsɛ -ko. -A ꞌke amʋ lɛ -tɔ ꞌle a ꞌke -amʋ ꞌꞌsɛlɩ-za, ꞌɛ dɩ moꞌo. -A ꞌbhɛɛ ꞌko-oꞌo -a ꞌke amʋ lɩ ꞌybhaa. Ⅹ A ꞌye li-ɔ, -nɔɔ -ke ti -a -nɩꞌa ꞌle aꞌba ꞌꞌklumʋ a, -a ꞌtmʋʋꞌo amʋ-ɛ, -bho nyɔ -see ꞌwɔn ɔ ꞌke lbhʋ nʋ, nyɔꞌɔ ꞌꞌnyɩ ɔ lilia -le!

Ⅺ Dɩ-ɩ ꞌwlʋꞌa ꞌle a gbo, -a ꞌwɔn -ɩ ꞌbɔ. ꞌƐ dɩ -a poꞌo amʋ wlu -nɛɛ -jeyi. Ɛbɛ ꞌmnɛ, ꞌɩnnɛ ꞌmo-o, aꞌba ꞌꞌklumʋꞌa nyʋtɔlʋ-ʋ vlan-oꞌo ꞌle ʋn -see tiꞌbɔ ʋn ꞌke lbhʋ -lue ꞌtɩn nʋ, ꞌle, lbhʋ ʋn-ʋ nʋꞌa, ꞌɩnnɛ ꞌmo-o, ꞌwa -bonyunyuꞌa dɩ-ɩ se ꞌʋ ꞌꞌyiꞌꞌtuu, ʋn-ʋ ꞌzi-e ꞌya dɩ. Ⅻ -Kaabonyʋ -nɩꞌa ꞌle aꞌba ꞌꞌklumʋ a, ꞌɩnnʋ -a ꞌtmʋʋꞌo ꞌle -a po ꞌʋ ꞌkpa ꞌꞌyi -lrɛɛ, -aꞌba ꞌwee -plɛꞌɛ-ɛ -aꞌba -Kɔyi Zezii Kliisɩꞌa ꞌꞌgwlideɛ ꞌmʋꞌa dɩ a, ʋn de -pɔlʋ ti ꞌtɩn ʋn ꞌke lbhʋ nʋ, ʋn -kaa ʋn -bonyunyu ꞌmʋ ꞌpɛɛ!

ⅩⅢ A-bee -mnʋʋ a, ꞌlotʋꞌa ꞌꞌnynuu-a, aꞌba sɩa -zɛgɛꞌɛ nʋnʋa ꞌmʋ -le! ⅩⅣ ꞌLe, nyʋ -a ꞌꞌsraaꞌa -jiɛ ɛ, ꞌle ꞌwa ꞌꞌklumʋ, lɩ -a -zaꞌa -laa ꞌmʋ, -bho ꞌwa nyɔ -see ɩ ꞌbho ꞌꞌdu a, a -tɔ nɔ nyʋ ꞌwee ꞌꞌyi, aꞌba -ke ꞌɔ ꞌwʋwla ꞌmʋ -le, ꞌle, -ka lɛ ɔ-ɔ nʋꞌa seꞌa ꞌꞌyrili-nmɔ, ꞌɔ ꞌꞌbhuo ꞌke ɩ ꞌꞌyiyibo! ⅩⅤ ꞌBho ꞌmnɔ ꞌtɔ ɔ, ɔ ꞌꞌdu-o a -Bozeziiꞌa nyɔꞌɔ dɩ, a ꞌꞌdu ɔ ꞌꞌsrɩn ꞌmʋ! Aꞌba ꞌnyɔ ɔ ꞌmʋ -le -ka aꞌba jɛkayi!

ⅩⅥ -Aꞌba -Kɔyi *Zeziiꞌa ꞌꞌbhuo-o ꞌꞌnyɩꞌa nyʋ -pɔlʋꞌa bhlubhlua, ɔ ꞌꞌnyɩ amʋ -pɔlʋꞌa lipɩpɛɛ -nɔɔ ꞌwee ti: ꞌle lɛꞌꞌo lɛ ꞌmʋ ꞌle ɔ ꞌke ɛ amʋ ꞌꞌnyɩ! Ɔ -sie amʋ gbo ꞌwee!

ⅩⅦ ꞌƖnmɔ ꞌPɔlʋ ꞌyeꞌe amʋ. Ɩ-bɩ wlu ꞌmnɩ, ꞌan ꞌꞌbhuo-o ꞌcnɩ ɩꞌo. ꞌKa-a ꞌan-a nʋꞌo ꞌle ꞌan ꞌꞌbɔgʋɩ ꞌwee ꞌli, ꞌle, -ka ꞌan ꞌꞌbhuo-o ꞌcnɩꞌa ꞌꞌbɔgʋ -nɛɛ, a ꞌke -kaa yibo. ꞌAn ꞌcnɩcnɩyri ꞌka-a!

ⅩⅧ -Aꞌba -Kɔyi Zezii *Kliisɩꞌa ꞌꞌnitiwʋnnasʋ -nɩ amʋ ꞌꞌkpi ꞌwee!