1 Ano na len, kon i nyarahan badeh Abraham eme manyah udu mada san ta asiu balei tan, eme ya Kindrei asahan hawen. Madan eme loke badeh iy anyolom lau taloh badeh ales. 2 Iy anyolom oro le badeh iy sakaliye ili aturuk oro ano iy aluh i andri, bulin i ta bada munyak. 3 Ano iy anya eh, “Laban, ado sa-au ta kon tek, ado kado; jo dah ta atondrok ou. 4 Gwa doh ado kasikine kati ado, ano ado kamunyau kado baha kei badeh. 5 Jo kameh akohok rayah nyamon ta aseben ado, tasah san lawe-en labai. Ado badeh anuhun jo ma ado ame asiu tek, eme ya jo katondrok ado ma kaseben ado.” Eme oro anya eh, “Wurah handru, aso aseken kandriyen tam labai.”

6 Ano Abraham i bolo balei badeh asehek i ta Sara, “Suwi Ou andrei rayah palawa ma ou asun sabe jabi ramen.”

7 Ano iy sakaliye ili bolo iri katin haka badeh andrei bulumakau kasen mwasin handru, iy andrei atehei i mine ndramak ta lahou tan ari ili sesek ma ajeh. 8 Ano iy andrei sur simidin ta katin haka ma hawe bulumakau kasen nane ndrajuhi dah, bwese-ei i hawe oro. Eme oro aimon ai. Ya Abraham badeh ales udu baha kei.

9 Eme oro ndremenya iy, “Udum Sara ndraheh?” Eme iy anya eh, “Iy udu bolo asiu balei.”

10 Ano Laban anya eh, “Jo kameh eme ja, na bolo jaha eme, ma udum Sara kameh nah udu ndrinen.” Ya Sara badeh udu mada san ta asiu balei udu konan. 11 Sara hawe Abraham badeh uru ndra alon handru ma jaha turu badeh ndra sola labai, ma Sara badeh winiyan bato-ou nah ja bwe ai. 12 Eme Sara badeh akodei iy ma iy ehe-en ma iy lomondra, “Jo badeh ndra ndrolo-oh, ma iy lau tek ndra alon, jo kameh barasekesek ta lakou dah de bwe.”

13 Ano Laban tiye i ta Abraham, “I buku sah Sara ehe-en ma anya eh, ‘Handru eh, jo kada-ah ndra alon, jo kameh ato-ou nah?’ 14 Lakou mari kede-eh manamun ta Laban le ai. Jo kameh eme hamon na len ta aliy amwenen udu bolo jaha eme, ma Sara kameh tuwi nah mwan.”

15 Eme Sara inoh ma mwesekei wasai anya eh, “Jo behe-en bwe.” Arile iy anya eh, “Ou ehe-en handru.”

16 Ano badeh oro lau dah au, adek ala, ano oro anyolom eme andri ta Sodom ma Abraham atiye oro ma anyolom oro au. 17 Eme Laban anya eh, “Jo winiyan batonei sasah jo anya kamwekes ta mada Abraham bwe ai. 18 Lundriyen oro kameh asahan kon tinan ari buruwen, ma na iy le badeh kameh, jo kameh atehei nyosowan i tiri kon munyak tinan mari. 19 Jo badeh ndrasehek tan ta atehei iy badeh kabatanau nadun oro hawe lau badu asiu tan kanuhun le jo, ma kamwekes kandriyen mwasin le handru. I buku none oro an hamon ta batanau mari, jo tandrakan ta amwekes lakou mari i tan.”

20 Ano Laban tiye, “Ndrelen ta bada Sodom hawe Gomora tinan labai, ma karei ma lomondra ndra-in ndrandra-i labai. 21 Eme ya jo ki-iu ki andri kanyolom i buku none lakou oro amwekes doh handru de bwe, i buku none ndrelen toro ndrame.”

22 Eme uru lau dah au ala Sodom, arile Abraham le ales udu le mada Laban udu. 23 Ano Abraham eme mirihik ma iy lelen, “Ou kameh adai iri lau mwasin ma lau ndra-in ale? 24 I buku none lau mwasin ma lomonoh (50) i dah kameh ou sulumwi kon de bwe, ma ou sulumwi kon mari ano. Ya ou winiyan basebenei bwe ai, ta lau ma lomonoh (50) bado bwe ai. 25 Ou winiyan bamwesekei bwe. I buku none ou mwesekei kameh iri lau mwasin kameh ado bolo lau ndra-in ale. Ya iy kameh winiyan bwe. Iri lau ta anuhun sahou badu munyak badeh anuhun sahou badeh mwasin ja.”

26 Ano Laban tiye, “I buku none oro lau lomonoh (50) mwasin ado Sodom eh, badeh kameh jo winiyan basulumwi kon mari bwe.”

27 Eme Abraham tiye ja, “Jo badeh ndrasehek sahou boto-on labai ndra ta Laban. Jo badeh lakou leleyah, jo munyak ma koloweh leleyah. 28 Ya ki buku none lau limeh le ka-au udu baha lomonoh (50), ou winiyan sulumwi kon de bwe?” Eme Laban tiye, “I buku none jo anyolom lau hanoh limeh (45) ado aliy, badeh kameh jo winiyan basulumwi bwe ai.”

29 Eme iy ndremenya ja i tan, “I buku sah i buku none lau hanoh (40) kado aliy?” Eme iy tiye, “Buku none oro lau hanoh le, jo winiyan bamwesekei bwe.” 30 Ano Abraham tiye, “Laban ei, ou sabolosen, jo kasehek, ya i buku none tonoh (30) ado aliy?” Eme iy tiye, “Buku none oro lau tonoh le, jo winiyan bamwesekei bwe.”

31 Eme Abraham tiye, “Len ndra-au badeh jo ndrasehek sahou boto-on ndra ta Laban, ki buku none lunoh (20) ado aliy, mwasin?” Eme iy tiye, “Oro lunoh le badeh jo winiyan basulumwi kon bwe.”

32 Ano iy tiye, “Laban ou sabolosen; jo anya kasehek sahou san rasan le ja. Ya ki buku none lau ronoh le mwasin de bwe?” Eme iy anya eh, “Buku none lau ronoh le badeh jo winiyan basulumwi bwe.”

33 Eme Laban asehek sahou hawe Abraham ano badeh iy iu ai, eme ma Abraham i asiu ai.