1 Ma ndra wahun ta len ma bwena ta wik ari ja, Mariya badu Makdala edek ili mada lek anya kanyolom Jises. Iy ili mirihik, iy anyolom bek bado mada lek bwe, iri ndratundruwiy ndra-au ndrala len. 2 Iy sakaliye eme hamon tiye jo hawe Saimon Pita. Jo badeh, lau ta Jises iy aso-ok labai. Mariya tiye taru i buku doh, “Iri ndrabwese-ei Laban udu bolo lek tan ndra-au. Iri ndrabwese-ei iy ndrala heh handru, to bala tanan bwe.”

3 Eme aru Pita adek ala mada lek anya kanyolom. 4 Aru ma la-uh sakaliye taseh ala, arile jo sakalawi Pita eme hamon, jo ili isos mada lek bwena. 5 Jo aluh, ma anyolom ili munu bek. Eme jo anyolom iri kari kolau nane iri asu iy na aliy, arile jo bala munu bek bwe. 6 Saimon Pita in hamon tek eme ja, edek ales amwenen ili munu bek. Iy anyolom iri kari kolau marakon nane iri asu iy na aliy udu api. 7 Ma iy anyolom kolau nane asu batu Jises na aliy. Arile kolau nane doh, bare hawe iri kari kolau rayah nane bwe. Nyolom ta aliy i buku kolau le nane alokom iy. 8 Pita ndra-au ndrala bolon, jo eme edek in hamon tan ili munu bek ale. Eme jo anyolom iri lakou marakon nane doh, ma jo atehei budon tek ili tan i buku Jises badeh, ndramak ndrame awas ja. 9 (Na len doh badeh, aso bala tanan ta buk ndrabun asehek ta Jises kameh amak ja bwe.) 10 Aru anyolom iri lakou marakon udu lek nane ano, aru ame adek au ala hamon ala kon ja.

11 Mariya badu Makdala eden udu mirihik ta mada lek. Iy eden kahis, iy aluh ma anyolom amwenen ili bolo lek. 12 Iy anyolom angelo ma la-uh ado bolo lek, asini awin belen. Uru manyah are loboho bada kei mene udu aliy. Iy ari udu loboho batun, iy ari ja udu loboho kiwin. 13 Uru ndremenya Mariya i buku doh, “Badih den, ou aden ndranye sah?” Iy asumon, “Iri ndrandrei Laban tek ndra-au, jo bala tanan bwe, iri ndratehei iy ndrado heh handru.”

14 Iy asehek sahou ano, iy tubuni madan ili amwenen ta Jises ales udu konan, arile iy baseleyani Jises bwe. 15 Jises eme ndremenya iy, “Badih den, ou aden ndranye sah handru? Ya ou asilah are lau handru?” Iy anya, kede-eh iy ndramak ta bilin doh le ai. Iy anya, “Ndramak den, i buku ou ndrandrei iy ndra-au, ou tiye tek, ou atehei iy udu heh handru, jo kameh kili kandrei iy.”

16 Jises anya, “Mariya.” Mariya tubuni iy amwenen tan, ma iy aloh i boho iri Hiburu anya, “Raboni!” (Moso sahou Raboni badeh, “Ndramak ta leheya.”)

17 Jises anya, “Minem same badak o! Tasah, jo bala loken hawe tama bwe le. Arile ou ala tiye oro lau tek, ou tiye toro, ‘Jo kameh ilih loken hawe tama, iy tama ado. Jo ili hawe Kindrei tek ma Kindrei tado ale.’ ” 18 Eme Mariya badu Makdala sakaliye eme tiye taso lau tan, “Jo ndratou Laban!” Ma iy asehek taso mari ta iri sahou nane Jises asehek i tan.

19 Na len ma bwena ta wik doh, an i andri badeh, oro lau tan atukum oro a le se ado bolo asiu ari. Oro sulu-i kou toro marakon ihis, tasah oro anoh iri lau tinan badu Juwis. Oro ado le badeh, Jises eme ales udu alih toro, ma iy anya, “Mondrei kudu hawe ado.” 20 Iy asehek sahou ili toro ano, iy eme leheya minen ma kabeden. Oro lau tan badeh, sekesek tinan labai ta anyolom Laban ja. 21 Jises tiye toro ja, “Mondrei kudu hawe ado. Buku le tama suni jo eme, ma jo suni ado ta ala bolo kon munyak.” 22 Ano iy aluhi kohan ili bwele-e oro, ma iy anya, “Malawin Ndrabun ndrawek bolo ndrine ado. 23 I buku ado mani kandriyen ndra-in tiri lau, idah kameh kandriyen ndra-in tiri amai iu. I buku aha bamani kandriyen ndra-in tiri bwe, idah kameh kandriyen tiri udu bwele-e iri udu le buku doh.”

24 Na ben nane doh Jises asahan hawe oro lau tan rayah, arile iy lau tan ari nyaran Tomas, nyaran ari ja Didimus, bado hawe oro bwe. 25 Oro ame asehek ili tan, “Aso ndranyolom Laban!” Arile iy anya, “Jo winiyan batehei budon tek bala tan bwe, jo anya kanyolom mweleke minen ma jo anya kanyokar na minek amwenen. Jo anya katehei kandro minek kili mweleke nyah udu kabeden. Jo kanyolom na madak ma la-uh amwenen, ano jo baratehei budon tek barala tan.”

26 Udu hamon ta len ma ndro taloh ano, oro lau tan atukum ala le asiu nane ja. Na len doh Tomas udu hawe oro ai. Oro sulu-i kou marakon ihis, arile i buku le bwena mene, Jises ili ales udu le alih toro, ma iy anya, “Mondrei kudu hawe ado.” 27 Ano iy tiye ta Tomas, “Ya, ou ame atehei minem keme dah, ma madam kanyolom bolo minek ma la-uh, ou suri ou ame atehei minem keme kabedek. Budon tam sala la-uh. Budon tam keme le tek.”

28 Tomas eme asumon bohon i buku doh, “Ou Laban tek, ma ou Kindrei tek!”

29 Ano Jises tiye ta Tomas, “Ou ndratehei budon tam ndrame tek, tasah ou ndranyolom jo amwenen. Iri lau banyolom jo bwe, arile iri atehei budon tiri eme tek, eme ma sekesek tiri kameh udu bwele-en labai.”

30 Jises amekes iri kalem ma iri gok tinan solo-an labai udu mada oro lau tan. Eme jo batorou iri sahou marakon bala bolo buk dah bwe. 31 Arile katin ta jo atorou iri sahou dah, ta aha katehei budon taha kili le ta Jises. Iy Mesaya, ndramak nane Kindrei suni iy eme kon munyak, ta akohok lau tan marakon badu kon munyak ame hamon. Iy nadu Kindrei. Buku aha atehei budon taha marakon in tan, aha kameh akohok koha aha in le ta nyaran.