1 Ano ja, Jises leheya iri lau an kapa gwa li Galili. Iri lau solo-an labai atukum ta anuhun iy, eme iy sandroh in ndron ra-ei ma manyah udu bolo ndron ere bwele-e gwa, ya iri lau mari nane dah, an kapa gwa amik ai. 2 Eme iy asehek sahou solo-an i tiri na sahou sokek, eme udu bolo leheya tan, iy tiye i tiri i buku doh,

3 “Aha kanuhun! Ndramak ari ili sabara badu wit ili bolo bilin, 4 ya eme iy akeh ili, badu wit ra-on taku in san, ya iri sirih ame aniy. 5 Ra-on ja taku in bwele-e bek, ndren solo-an mwe-en bwe, ma badu wit ateh suwi. 6 Arile, an anya eme loken nyarahan boto-on labai, ma sulumwi wit nane, tasah kandron bala bolo munyak alih bwe, eme ma iy ame-er mara-ei ma imek. 7 Ya badu wit ra-on ja taku in bolo bada malou bobodon. Bada malou bobodon nane ateh eme loken, ma tubuluhi wit nane ma iy bato-ou buwan bwai. 8 Arile buwa wit ra-on taku i bolo ndren mwasin, ma iy ateh i tinan ma iy ato-ou buwan solo-an labai. Eme buwan ra-on ato-ou tonoh (30), ya ra-on ato-ou ndro hanoh (60) ma ra-on ja ato-ou rinek (100).”

9 Ano, Jises isan sendrehendreh ta sahou i buku doh, “Ou are lau ndranyem udu aliy, ou anuhun kamwenen.”

10 Eme ma lau solo-an aseker, ano Jises le ari, ma hawe lau ra-on badu bolo oro nane ma hawe oro lau tan anuhun, ma oro ndremenya Jises ta saba moson handru ta sahou sokek nane ndra-au. 11 Eme iy tiye i toro, “Kindrei aseken ado lau tek katanan iri sahou mene aton ta nyala tondrok ta Kindrei. Arile iri rayah bare hawe to dah bwe, jo asehek i san ta sahou sokek,

13 Eme Jises ndremenya oro, “Budon tado kede-eh aleu ta sahou sokek dah deh bwe? Ki buku sah kameh budon tado kaleu ta sahou sokek mara-ei? 14 Ndramak ta sabara buwa kei doh, i buku ndramak ta atiye sahou ta Kindrei. 15 San rayah, sahou ta Kindrei taku in san. Ya iri lau doh anuhun. Arile, Satan eme ja, sokosowei sahou mwasin nane Kindrei tahiy ereu budon tiri. 16 Lau rayah i buku none buwa wit taku in bwele-e bek. Ya eme suwi labai iri anuhun sahou ta Kindrei ma sekesek le, 17 arile bala ndrine iri handru bwe ma bare gwek luluwen bwe. Ya i buku none ndrine sen asahan deh bwe-em ndra-i asahan, tasah ta sahou ta Kindrei, ya idah kameh, suwi suwi iri taku. 18 Lau rayah ja, i buku none buwa wit taku in ndrokowa bada malou bobodon. Idoh i buku none iri anuhun sahou ta Kindrei, 19 arile iri abudon boto-on labai ta lakou solo-an badu kon munyak. Ya iri abudon boto-on labai ta atukum iri luk, ma iri lakou ra-on ja. Ya idoh sokei sahou ta Kindrei, eme ma bwidi iri bato-ou sali iri bwe. 20 Ya lau rayah ja, i buku none buwa wit ateh in munyak mwasin. Iri anuhun sahou ta Kindrei, eme iri tawiy ma iri ato-ou sali iri. Rayah asahan tonoh (30), rayah ndro hanoh (60), ma rayah asahan rinek (100).”

21 Eme Jises asehek le ili, “Ndramak ari iy telemei sun, iy winiyan batehei bado bahandra bwekei bwe, ma iy ale winiyan batehei bala bahandra sau bwe le, arile iy kameh atehei udu ndrahunen loken. 22 Lakou mari aton kede-eh kameh eme lewan, ya saba lakou tubuluhiy kameh andrei lakou ta tubuluhen iu. 23 Ou anuhun, i buku ndranyem udu aliy, ou anuhun kamwenen!”

24 Eme Jises tiye i tiri, “Ndranyem kirih ki ta sahou ou anuhun! Saba maha-an ou amekes i tiri, kameh i le buku maha-an ou akohok. Eme kameh, ou akohok maha-an solo-an labai ja i hawen. 25 Are ndramak tanan tan mwasin udu aliy, iy kameh akohok tanan mwasin labai ja i la-un. Ya ndramak tanan tan sese le, tanan tan sese le doh kameh kuhiy mari iu.”

26 Eme Jises asehek ili le, “Ya tondrok ta Kindrei i buku none ndramak sabara buwa kei ili bolo bilin. 27 Iy amadin na ben ma amak na len, eme buwa kei ateh, arile iy bala tanan bwe, i buku sah handru ateh. 28 Munyak le anyohan buwa kei ateh ma edeu salin. Ma mwena handru iy i tinan ano, nyandren asahan ano ja, buwan asahan. 29 Len ta buwa kei uni badeh, ndramak andrei samen ili isan, tasah len ta akohok badeh, ndrano.”

30 Eme Jises ndremenya, “Taha kasehek tondrok ta Kindrei kameh ki buku sah handru? Saba sahou sokek taha kasehek kaleu? 31 Tondrok ta Kindrei i buku none buwa kei ari iri aloh mastet. Badun badeh, nadu bwisik labai udu bolo munyak idah. Ndramak andrei, iy ili tahiy i bolo munyak. 32 Ano, ateh eme loke ma i tinan sakalawi ja iri buwa kei badu bolo bilin. Iy asahan buku ra-ei kei ma edeu andran. Eme iri sirih winiyan ame amekes ndrahu iri ta aton.”

33 Ya eme Jises asehek sahou i tiri lau na sahou sokek solo-an i buku le doh, iy tiye san solo-an handru winiya iri akohok amwenen. 34 Iy asehek i tiri na sahou sokek le, arile iy le ma hawe oro lau tan le ja, iy asehek moso sahou marakon i toro.

35 Na len mirihik ta kon akoroh, Jises tiye i toro lau tan i buku doh, “To ka-au kala kapa gwa bilisiu.” 36 Eme iri lau marakon an gwek, oro suni Jises i hawe oro, ya ndron ra-on ja a hawe oro ale. 37 Eme laba siyer atohou ya bayau i tinan, eme ndron bokobwak, bayau eme ndron, ndrai idih, ya mirihik ndron anya katuh. 38 Arile, Jises amadin in bada sau hamon ta ndron, eme oro ala mete-ei iy, ma oro tiye i tan, “Ndramak ta leheya, ou batikisi to bwe nadeh? I buku to kamak?”

39 Eme iy amak eme loke, ma iy asehek sahou i ta siyer ma bayau anya, “Ou amondrei! Bahun ka-iy ai!” Eme siyer ma bayau amondrei ma gwa ndras ameres udu le udu. 40 Eme Jises tiye i toro, “Ado anoh tasah? Buku sah ado batehei budon tado ba-en tek bwe?”

41 Eme ma mani oro atur labai, ma oro ndremenya oro ari ari anya, “Iy are lau handru? Ya siyer ma bayau anuhun iy!”