1 Zikhadasala ntsiku ziwiri kuti ufike msinda wa Phasika na ntsiku yakudya mkate wakusaya cakutupisa. Akulu wa azibaba wa ntsembe na apfundzisi wa Mtemo akhanyang'ana mpata wakuti amphate Jezu mwaciwembo, acimupha. 2 Tsono akhati:“Bzimwebzi tireke kubzicita panthawe ya cikondwereso kuti mbumba ileke kundzacita phokoso.”

3 Jezu akhali kuBetaniya akhadakhala paMeza, munyumba ya Sirimau nyamapere,adabwera mkazi mbondzi akhadanyamula ntsupa ya girazi, yamafuta yakununcira yakucokera ku muti wa narido*ya ntsengwa ikulu. Mkaziyo adaswa ntsupa ire, acitsanurira mumsolo mwa Jezu. 4 Ndipo wanthu winango adaipidwa nabzo waciuzana kuti, “Thangwe ranyi kuyadzonga tenepa mafuta yakununcira? 5 Angadayagulisa na ntsengwa yakupitirira kobiri zicena za nzayaya madzana matatu, acikapasa wakusauka” Na tenepo wanthuwo adamfufumira.

6 Tsono Jezu adati, “Mulekeni mkaziyu, muli kumuneseranyi? iye wandicitira basa labwino. 7 Thangwe wanthu wakusauka munawo nthawe zentse, pomwe mun'funa kuwacitira bza lufoi, mungakwanise kuwacitira. Tsono Ine mun'dzakhala lini nande nthawe zentse. 8 Omweyu wacita bzomwe angadakwanisa kucita. Wadzozerau thupi langu likanati kuikhidwa kuthenje. 9 Cadidi ndiri kukuuzani kuti kuli-kwentse padziko lapantsi komwe kungadzalalikidwe mafala Yabwino, bzidzafokotozedwambo bzomwe mkaziyu wacita kuti wanthu wamukumbukire.”

10 Judasi Iskaliote, m'bodzi wa wakupfundzira khumi na awiri wale, adayenda kwa akulu wa azibaba wa ntsembe kuti akapereke Jezu kuna iwo. 11 Pomwe iwo adabva bzimwebzi adakomedwa ndipo wadapicira kuti an'dzamupasa kobiri. Pamwepo iye adayamba kunyang'ana mpata kuti apereke Jezu.

12 Pantsiku yakutoma ya msinda wa mikate yakusaya cakutupisa, ntsiku yomwe wanthu akhambapha mwana wa bira pakucita cikondwereso ca Phasika, wakupfundzira wa Jezu adamubvundza kuti, “Kodi tikakukondzereni kuponi mbuto yakudyera uzokoto wa Phasika?” 13 Jezu adatuma awiri mwa wakupfundzira wace, aciwauza kuti, “Ndokoni mumzindamu. Mun'gumana na mwamuna adanyamula mtsuko wa madzi. Mum'tewere. 14 Ndipo komwe an'kapita, mukauze mwenekaciro wa nyumba kuti, ‘Misiri ali kubvundza kuti, kodi n'ciponi cipinda cangu cakuti ndidzadyere uzokoto wa Phasika na wakupfundzira wangu?’ 15 Iye an'kakuwonesani cipinda cikulu capadzaulu momwe akondza bzentse, mukatikondzere momwemo.” 16 Wakupfundzira wale adayenda acipita mumzinda mule. wadabziwona ninga momwe Jezu adawauzira ndipo wadakondza bza uzokoto bwa Phasika.

17 Kwatadoka, Jezu adabwera na wakupfundzira wace khumi na awiri wale. 18 Pomwe wakhadakhala pantsi acimbadya, Jezu adati, “Cadidi ndiri kulewa kuti mbodzi mwa imwe, omwe alikudya nande, an'dzandipereka kwa nyamadulanthaka wangu.” 19 Wakupfundzira wadabva wacidodoma. m'bodzi na m'bodzi adamubvundza kuti, “kodi ningakhale ine?” 20 Jezu adawatawira kuti, “Ni m'bodzi wa khumi na awirimwe omwe ali kuikha boko mundiro pabodzi nande. 21 Cadidi Mwana-wa-Munthu ali kukaphedwa ninga momwe bzidanembedwa. Tsono ana tsoka omwe an'kapereka Mwana-wa-Munthuyo. Bzikhali bwino kwa munthu umweyo angadasaya kubadwa.”

22 Ndipo pomwe iwo akhambadya, Jezu adatenga m'kate, aciudalisa, adagwata-gwata, acipasa wakupfundzira, ndipo adati, “Phatani, iri ni thupi langu.” 23 Patsogolo pace adatenga mkombo,acidalisa, adaupereka kwa wakupfundzira, wacimwa wentse. 24 Ndipo adawauza kuti, “Uyu ni mulopa wangu wa pangano la kulumbira. Mulopa omweyu ndin'dzawutaya thangwe la wanthu azinji. 25 Cadidi nin'kuuzani kuti, nin'dzamwa lini cakumwa ca muti wauvaci, mpaka ntsiku yomwe nin'dzamwa cipsa mu Umambo bwa Mulungu.” 26 Ndipo wadaimba nyimbo yakulemekeza Mulungu, adacoka waciyenda kuPhiri la Olivera. Eks. 12.6,14-20. Eks. 24.8.

27 Patsogolo pace Jezu adauza wakupfundzira wace kuti, “Mwentsenemwe usiku buno mun'disiya mucibwerera thangwe bzidanembedwa kuti, ‘Nin'dzapha makabusa ndipo mabira yan'dzabalalika.’ 28 Tsono ndikadzamuka kwa akufa, nin'dzatsogola kuyenda kuGalileya.” 29 Ndipo Pedru adati, “Napo wentse wakusiyeni acibwerera, ine nibwerera lini cipo.” 30 Tsono Jezu adamuuza kuti, “Cadidi ndirikukuuza kuti lero usiku buno, congwe akanati kulira kawiri, un'dzandilamba katatu kuti un'ndidziwa lini.” 31 Pamwepo Pedru adagigimira kuti, “Napo bzicifunika kufa namwe pabodzi, cipo ningadzakulambeni kuti nin'kudziwani lini.” Anangowo wentse wadalewabo bzibodzi-bodzi. Zak. 13.7.

32 Jezu adayenda na wakupfundzira wace kumbuto ibodzi, ikhacemerewa Gesemani*. Pomwe wadafika, Jezu adauza wakupfundzira wace kuti, “bakakhalani pano, Ine ndikapembe.” 33 Jezu adatenga Pedru, Tiyagu na Juwau. Iye adayamba kubva mantha makulu acidodoma. 34 Adawauza kuti, “mzimu wangu ngwakudodoma mpaka kufa. khalani mudapenya pano.” 35 Adayenda patsogolo pang'ono, adagodama pantsi, acipemba kuti penu n'bzakukwanisika nthawe yakugoswa ire imupitirire. 36 Adapemba kuti:“Aba, Baba, bzinthu bzentse bzingakwanisike kwa imwe. Mucose mkombo wa matsautsoyu kwa ine, tsono lekani kucita bzomwe ine ninfuna, citani cifuniro canu.”

37 Atabwerera kuna wakuphunzira wace adawagumana wadagona. Ndipo iye adabvundza Pedru kuti, “Sirimau, uli kugona kodi? Cadidi watazira kukhala udapenya panthawe ibodzi yokha? 38 Khalani mudapenya mucimbapemba, kuti muleke kuyezedwa na bzakuipa. Cadidi mzimu uli kufuna, tsono thupi lawofoka.”

39 Adayenda pomwe kapemba na mafala mabodzibodzi yale. 40 Pomwe adabwerera, adawagumana adagona, thangwe bzikhope bzawo bzikhadalemedwa na tulo. Na tenepo iwo adasaya cakumtawira.

41 Pomwe adabwerera kacitatu, adati, “Kodi muli kugona na kupuma? Bzakwana. Nthawe ire yakwana, Mwana-wa-Munthu ali kukaperekedwa kwa wanthu wakuipa. 42 Mukani, mbatiyende. Onani wa kundipereka kwa nyamadulanthaka ule, wafika.”

43 Jezu akanati kumaliza kulewa-lewa, nthawe yomweyo adafika Judasi, m'bodzi wa wakupfundzira khumi na awiri wale. Adabwera na mthithi wa wanthu akhadanyamula bzisenga na mabonga. Wanthuwo adatumidwa na akulu wa azibaba wa ntsembe na apfundzisi wa Mtemo na akulu wa Ajuda. 44 Wakudzam'pereka ule akhadawauza cizindikiro ca kuti, “Omwe nin'kapsompsonayo, ngumweyo. Mun'kam'phate mun'ciyenda naye, lekani kamuleka.”

45 Pomwe Judasi adabwera, adandofika pana Jezu adati, “Misiri!” Ndipo adamumpsompsona. 46 Ndipo wanthu wale adam'phata Jezu wacimmanga. 47 Tsono mbodzi mwa wakupfundzira omwe akhali naye pamwepo, adasolola cisenga cace, adapweteka wabasa wa mkulu wa azibaba wa ntsembe, ndipo adam'gwata khutu. 48 Tsono Jezu adawabvundza wanthu wale kuti, “ mwandibwerera na bzisenga na mabonga kudzandimanga ninga ndine mbava? 49 Ntsiku zentse ndikhakhala namwe ndicimbapfundzisa muNyumba ya Mulungu, imwe nee kundiphata. Tsono bzimwebzi bzakukwanirisa bzomwe bzidanembedwa.” 50 Pamwepo wakupfundzira wace wentse wadamsiya wacibwerera.

51 Mulumbwana m'bodzi akhadafunika ciriya akhatewera Jezu. Wanthu wale akhafuna kuphata, 52 tsono iye adaikopola nguwo ire, acithawa ali pezi.

53 Ndipo iwo adatenga Jezu aciyenda naye kunyumba ya mkulu wa azibaba wa ntsembe. Kumweko kukhadagumana wentse akulu wa azibaba wa ntsembe na akulu wa Ajuda, na apfundzisi wa Mtemo. 54 Pedru akhamutewera Jezu na patali, mpaka iye adakapitambo ku seri kwa nyumba ya mkulu wa azibaba wa ntsembe kule. Adakhala pantsi pabodzi na walindiri aciwotha moto. 55 Akulu wa azibaba wa ntsembe wale na wentse akulu wa mbuto ikulu ya Majuda akhanyang'ana umboni wakupasa mulandu Jezu kuti amuphe. Tsono alibe kuuwona. 56 Azinji akhambalewa bzakumnamizira. Tsono umboni bwawo bukhabverana lini.

57 Winango wadaima waciyamba kumbalewa bzakunama. 58 waciti, “Munthu uyu ife tidamubva acimbalewa kuti, ‘Ine nin'dzapfudza Nyumba ya Mulunguyi yakumangidwa na wanthu. Ndipo muntsiku zitatu nin'dzamanga inango yakusaya kumangidwa na wanthu.’ ” 59 Napo tenepoyo uboni bwawo bukhabverana lini.

60 Ndipo mkulu wa azibaba wa ntsembe adaima pamaso pawo, acibvundza Jezu kuti, “Kodi ulibe cakutawira? N'bziponi bzomwe wanthuwa wali kukunamizira?” 61 Jezu adanyamala. Alibe kudzatawira pomwe. Pamwepo mkulu wa azibaba wa ntsembe ule adabvundza pomwe kuti,“Kodi ndiwe Crixtu Mwana wa Mulungu wakusimbiwa?” 62 Jezu adatawira kuti, “Inde, ndine. Ndipo mun'dzawona Mwana-wa-Munthu adakhala kuboko ladidi la Mulungu wamphambvu zentse. Mun'dzamuwona ali kubwera mmitambo yakudzulu.” 63 Pamwepo mkulu wa azibaba wa ntsembe ule adang'amba bzakubvala bzace, acilewa, ‘tin'funiranyi pomwe mboni? 64 Mwabzibvera mwekha kunyoza Mulunguku. Tsono muli kukumbuka tani?” Wentse adalamulira kuti bzin'funika kuti aphedwe.

65 Winango adayamba kumupsipira mata acimumpsinkha mmaso acimbam'menya na mafayiti, acimbam'bvundza kuti, “Vima!” alindiri wale adayambambo kum'menya na mbama. Lev. 24.16.

66 Pedru akhali pa nyumba ya pantsi ya mbuto yakutongera mirandu. padafika Mtsikana m'bodzi nyabasa wa mkulu wa azibaba wa ntsembe. 67 Pomwe adawona Pedru alikuwotha moto, adamuyang'anisisa aciti, “Na iwembo ukhali na Jezu wa kuNazaleyo.” 68 Tsono Pedru adalamba, adati, “ndinimudziwa lini. bzomwe ulikulewa ndiri kubzidziwa lini.” Ndipo adacoka adaenda mmaseca. Pamwepo congwe adalira. 69 Ndipo nyabasa ule adamuwona aciyamba pomwe kuuza omwe wakhali pamwepo kuti, “ umweyu ni m'bodzi wawo.” 70 Tsono Pedru adalamba pomwe. Thawe pan'gono, wanthu omwe wakhali pamwepo wadamuuza Pedru kuti, “Cadidi iwepo ndiwe m'bodzi wawo. Thangwe ndiwembo wa kuGalileya.” 71 Tsono Pedru adayamba kudzitemberera na kulumbira kuti, “ ndinimudziwa lini munthu omwe muli kulewayo.” 72 Nthawe yomweyo congwe adalira kaciwiri. Ndipo Pedru adakumbukira mafala yomwe Jezu akhadamuuza yakuti, “Congwe akanati kulira kawiri, iwe un'dzandilamba katatu.” Pamwepo Pedru adayamba kulira.