2
Kubwera kwa Mzimu Wakucena
1 Pomwe ntsiku ya Pentekoxte idafika, akhadatsonkhana wentse pa mbuto ibodzi. 2 Mwacisututu, kudzulu kudabveka muwira ninga condzi ca mphambvu kwene-kwene, ndipo cidadzaza nyumba yentse yomwe iwo akhadakhala. 3 Ndipo adawona bzinthu ninga cirambi-lambi bzomwe bzidamwazana ninga malirime ya moto, bzicikakhala padzulu pa m'bodzi na m'bodzi wa iwo. 4 Wentse adadzala na Mzimu Wakucena ndipo adayamba kulewa-lewa bzilewedwe bzinango, malingana na momwe Mzimu udawalewesa.
5 MuJerusalema mukhana aJuda wakugopa Mulungu, wakucokera ku madziko yentse ya pantsi. 6 Pomwe adabva muwira, adakhoncezana gulu likulu lomwe lidamalidwa ndzeru, thangwe m'bodzi na m'bodzi akhawabva alikulewa cirewedwe ca iwo. 7 Mwakudabwa na kumalidwa ndzeru, iwo akhambabvundzana aciti: “Onani, wanthu wentse omwe alikulewa-lewawa ni wa kuGalireya lini kodi? 8 Tsono m'bodzi na m'bodzi wa ife tirikuwabva tani mucirewedwe cathu? 9 Ife ndife aParti, aMedi na aErami, wakukhala kuMesopotamiya, kuJudeya, kuKapadosiya, kuPonto, kuAziya, 10 kuFirijiya, kuPamfiriya, kuIjipito na mbali za kuLibiya pafupi na kuSireni, alendo wakucokera kuRoma, 11 napo aJuda na wakutendeuka mu ciJuda, aKerete na a Arabu. Tsono tawabva tani alikulewa bza bzidabwiso bzukulu bza Mulungu mu cirewedwe cathu?” 12 Ndipo wentse adadabwa na kumalidwa ndzeru, akhambabvundzana wina na mwandzace aciti: “Bzimwebzi bzinilewanyi?”
13 Tsono, winango akhawasinjirira, acimbati: “Iwo aledzera na vinyu”.
Mafala ya Pedru
14 Pamwepo Pedru adaimirira pabodzi na Atumiki anango khumi na m'bodzi (11) ndipo mwa kukuwa adawauza kuti: “Amuna wa muJudeya na mwentse omwe mun'khala muJerusalema, lekani ndikufokotozereni bzimwebzi! Tetekerani bwino: 15 Amunawa alibe kuledzera, ninga momwe imwe mun'kumbukira. Yakali macibese nthawe zipfemba!” 16 Tsono bzomwe bzirikucitikabzi ndibzo bzidalewedwa na m'polofita Jowere kuti:
17 “ ‘Mulungu adati: Ntsiku zakumalizira,
nin'dzathulurira Mzimu wangu pa mbumba yentse.
Wana wanu wacimuna na wacikazi an'dzacita cipolofita,
matswaka an'dzawona maso-mphenya,
ndipo nkhalamba zin'dzalota.
18 Napo kwa anyagrinya wangu wacimuna
na anyagirinya wacikazi
nin'dzathululira Mzimu wangu pantsiku zimwezo
ndipo iwo an'dzacita cipolofita.
19 Nin'dzawonesa bzidabwiso
padzulu, kudzulu
na bzizindikiro pantsi pa dziko:
Mulopa, moto na mitambo ya utsi.
20 Dzuwa lin'dzasanduka m'dima
ndipo mwezi un'dzasaduka mulopa,
ikanati kufika ntsiku ikulu
ndipo yaulemerero ya Mbuya.
21 Ndipo wentse omwe an'dzacemera
dzina la Mbuya an'dzapulumuka!’ ”* Jow 2:28-32
22 “Amuna wa kuIjirayeri, tetekerani mafalaya: Jezu wa kuNazareta mamuna wakutsimikizidwa na Mulungu patsogolo pa imwe kudzera mwa bzidabwiso, bzilatizo na bzizindikiro bzomwe Mulungu adacita kudzera mwa Iye pakati pa imwe, ninga cadidi imwe mun'dziwa. 23 Munthu umweyu mudam'pasidwa na cakulinga cakutalidwa ndipo mwakudziwika kale na Mulungu. Imwepo mwakuthandizidwa na wanthu wakuipa mudam'khomerera pam'tanda mucimupha. 24 Tsono Mulungu adamulamusa kwa wakufa, mwa kum'tsudzula mubzakuwawa bza infa, thangwe bzikhakwanisika lini kuti infayo im'mangirire. 25 Thangwe Davidi adalewa bza Iye aciti:
“ ‘Ine nthawe zentse ndikhawona Mbuya patsogolo pangu.
Thangwe Iye ali kuboko langu ladidi,
kuti ine ndireke kutekenyesedwa.
26 Ndipopo m'tima wangu
udakondwera ndipo ndidalewa mwakupfatsa.
Ndipombo thupi langu lin'dzapuma mucidikhiro,
27 thangwe un'dzandisiya lini munthutu† Munthutu: MuciGiriki alikulewa kuti gwindza.,
napo kudzabvuma kuti Wakucena wako adzabvunde.
28 Iwe wandidziwisa njira za moyo ndipo
un'dzandidzaza na mfatso patsogolo pako’ ”‡ Mas 16:8-11.
29 Pedru adalewa pomwe kuti: “Abale, lekani ndikuuzeni padeca kuti kholo m'kulu Davidi adafa acikapendesedwa ndipo nthutu yace iri pakati pa ife mpaka ntsiku ya lero. 30 Tsono iye akhali m'polofita ndipo akhadziwa kuti Mulungu adamupicira mwa kulumbira kuti an'dzaikha m'bodzi wa dzindza lace pa m'pando wa umambo wace. 31 Iye pakudziwa kale bzimwebzi, adalewa bza kumuka kwa Krixtu, omwe alibe kusiyidwa kuinfa napo thupi lace kubvunda. 32 Mulungu adalamusa kwa wakufa Jezu umweyo, ndipo tentsene ife ndife mboni za nkhani imweyi. 33 Ndipo adakwizidwa kuboko ladidi la Mulungu, Iye adatambira Mzimu Wakucena wakupiciridwa na Baba, ndipo adathulula bzomwe imwepo tsapano mulikuwona na kubva. 34 Thangwe Davidi alibe kukwira kudzulu, tsono iye adafotokoza kuti:
“ ‘Mbuya Mulungu adalewa kuna Mbuya wangu kuti: Khala kuboko langu lamadidi 35 mpaka ine ndiikhe anyamadulanthaka wako ninga cakupondera minyendo yako’§ Mas 110:1.
36 “Na tenepo, mbumba yentse ya Ijirayeri idziwisise kuti Jezu umweyo omwe imwepo mudakhomerera pantanda, Mulungu adamucita Mbuya na Krixtu”** Krixtu: MuciHeberi ni Mesiya, bzomwe ni kulewa kuti wakudzozedwa..
Wakuyamba kutendeuka
37 Pomwe iwo adabva bzimwebzo, mitima yawo idaneseka ndipo adabvundza Pedru na atumiki anango kuti: “Abale, ticite ciyani?” 38 Pedru adatawira kuti: “Bwekani ndipo m'bodzi na m'bodzi wa imwe abatizidwe mu dzina la Jezu Krixtu kuti mulekereredwe kuphonyera Mulungu kwanu, ndipo mun'dzatambira mphatso Mzimu wa Mulungu. 39 Pakuti cipiciro ni ca imwe, wana wanu na wentse omwe ali kutali ndipo ni ca wentse omwe Mbuya, Mulungu wathu, an'cemera”. 40 Na mafala yanango mazinji akhambawacenjeza na kungingimira aciti: “Bzipulumuseni pa m'badwe wakuipa uno!” 41 Omwe adatawira fala adabatizidwa, ndipo ntsiku imweyo mbogo idathimizirika na wanthu bzulu bzitatu (3:000).
Kuphatana kwa akrixtau
42 Iwo akhambabzipereka kucipfundziso ca atumiki na mukuphatana, mukugawana pau na m'mapembo. 43 Wentse wakhadadzala na mantha, ndipo bzidabwiso bzizinji na bzilatizo bzikhacitidwa na atumiki. 44 Wentse omwe akhakhulupirira akhakhala wakuphatana ndipo bzentse bzomwe akhanabzo bzikhali bzawo pabodzi. 45 Akhagulisa mbuto zawo na bzinthu bzawo, akhagawira m'bodzi na m'bodzi malingana na bzomwe akhasaya. 46 Ntsiku zentse akhambagumana paNyumba ya Mulungu, acimbagawana pau munyumba zawo, ndipo wentse acimbadyera pabodzi mwa kupfatsa na mitima yakubzicepesa, 47 acimbatumbiza Mulungu mwa kukomeredwa m'tima na mbumba yentse. Ndipo ntsiku zentse Mbuya akhawathimizirira anango omwe akhambapulumusidwa.