Dos Iko-oruwon Sulat ni
JUAN
Unna nod Bosan
Inin sulat, id popiyod ni Juan diyot sokkad no bo-i o ba-ay woy riyon mandad to mgo anak din, piru kopakoy mandad no iddos kohulugan ka-ay, idda en so od lolivuung nod pompomakoy.
Iddot timpu ni Juan, otid ipanow iddos od pompomakoy, od upiyannan sikandan tod tuhanuu taddot mgo duma ran nod pompomakoy no od oowottan dan. Ungketen dad en mandad kos id puungan to mgo tohodnonaw to kahit Monama. Piru iddos nokodora-at, duwon mandad iddos od ponnonaw to konna bonnaa. De-en ka-ay'n sulat, id pomonduwan ni Juan iddos od pompomakoy, no dii ran od tonggapon iddon mgo minuvu no od owwot diyot kandan, su amoy dii sikandan od ko-okoy taddot morat no pinuungan dan.
Ahad moobbava ra kos ponudtulon ka-ay'n sulat, piru dakkoo kos ta-aw, oyyos id posampot ni Juan no ko-ilangan nod pohinowannoy kos od pompomakoy, su ini en kos suhu to Monama pomon poron dangan. Id pomandu rin mandad, no ko-ilangan od poriyu ran taddot od ponnonaw to konna bonnaa, woy dii sikandan od pominog taddot nonaw ran.
Dos mgo Nokota-aw:
Kodpokilaa (1-3)
Dos bonnaan nonaw woy dos kodginawa to duma (4-11)
Kodpongumusta (12-13)
1
Kodpokilaa
1 Siyak no sokkad taddot od pombuyyahon tod pompomakoy, mid sulat a kikow, bo-i* Kopakoy mandad no iddos kohulugan to bo-i, idda en so od lolivuung nod pompomakoy. no id aam to Monama woy atag mandad to mgo anak du. Id dokollan ku sikiyu to ginawa, woy konna ra siyak, ko konna, ahad iddos langun no nokaabbot to bonnaan nonaw. 2 Id ginowannan doy sikiyu pomon to iddos bonnaan nonaw, nokopomuwa riyot pusung ta woy od ponayun idda taman to waad tomanon.
3 Otid ikuu ki to bonnaan nonaw woy'd pohinowannoy ki, od pokoriyon to keta iddos tavang, eru woy kosunayan no id pomon diyot Monamon Amoy woy ki Disas Krays no Anak din.
Dos Bonnaan Nonaw woy dos Kodginawa to Duma
4 Dakkoo kos kahaan ku to norinog ku no iddos dumon mgo anak du, id dumoruma to bonnaan nonaw, oyyos ungketen me-en kos suhu keta to Monamon Amoy. 5 Na Bo-i, od buyuwon ku kikow no od pohinowannoy ki langun. Konna ini lammin suhu, su nosorollan tad man ini pomon poron tid pomakoy ki. 6 Dos ginawa, idda en so kodtuman to mgo suhu to Monama. Woy id suhu ki nikandin nod pohinowannoy, oyyos ini en kos norinog ta pomon poron to tigkonayan to keton kodpomakoy.
7 Id posampot ku ini koniyu, su mo-uraa ron ko-ungkay iddos od ponnonaw to konna bonnaa. Od so-ob sikandan ka-ay to intirut ingod, woy od nonaw no si Disas Krays, waa kun na-anak to minuvu. Mgo bouhuson sikandan woy id supak kandin. 8 Purisu ayyad-ayyad kow amoy diid konuhunan iddos langun no id oiluggatan dow, su otik od puungan dow ini, od kotanggap dow iddos langun nid panoy to Monama atag koniyu. 9 Iddos ahad ondoy no diid ponayun nod ikuu to nonaw ni Disas Krays, woy od timulan din baling idda, waa sikandin nosokkad diyon to Monama. Piru iddos ponayun nod ikuu taddon nonaw, nosokkad don sikandin diyot Monamon Amoy woy riyon to Anak din. 10 De-en otik duwon od unduwot koniyu no ossa kos nonaw rin, yo row sikandin tonggapa riyot ubpan dow woy yo kow mandad od pongumusta kandin. 11 Oyya su iddos ahad ondoy nod pongumusta kandin, noko-iling tid lonug sikandin to morat no pinuungan taddon minuvu.
Kodpongumusta
12 Mo-uraa pa nanoy kos od osengon ku koniyu, piru dii kud id po-ukit to sulat, oyyos id pomuhawang a nod lowwi koniyu amoy od pokod-unoy ki nod poponudtuloy, woy od koponnu ki to kahaan.
13 Na, id pongumusta koniyu iddos mgo anak to suwod du rini no id aam mandad to Monama.
Na, ka-ay ra en taman.