Jon
oh bimrip brak mat atip ohe meng oh
Ohri ma brak matip han Jon orhor mama bimrip ohe meng mohhe brak mar orhe yah han Gaias ohnong adarhetipmur. Mameng brak mar ma adarhetip oh Gaias go Hanipyah ohe meng pot pisapti han ihirnong gwe ambur yah deipat oh go yah hapatmur. Diotrepis oh ihirnong ambur ma na yah deipat oh oh er hapatmur por mameng moh brak mar adarhetipmur.
1
1 Sios ihirnong wamat papat han Jon noh Gaias gonong arpin da napris bopor nahat napapat han gonong mama brak mat nasar ohmur. 2 Norhe bopor nahat napapat han gwe paten meng oh noh Got ohnong nadahandeipatmur. Got ohnong ma nadahandeipat oh At Gota. Gaias oh gorhe danong hat ma sapat oh yah hat orhorwi sapatmur. Ama yah hat sapatru hat orhor ohe ina teio orhe tamreipato ama ihpat ohe erer oh ihat yah hat orhorwi ha sashenoh rim gonong ohe paten meng oh napormur por Gaias gwe paten meng oh nadahandeipatmur. 3 Gwe Got ohe danong ham yah hat ma sapat ohe meng oh Got orhe nita taptem ihir apris Gaias oh Got orhe arpin mengnong kasip ham pomat orhorwi dindeipatmur napotperhan noh amram amam isipnap hatirmur. 4 Nohe amam isip hat ma pat oh mamaru hat patmur. Got orhe danong ham norhe brer hatin hat ma pati gurnong oh kat ihirdapat Ihir arpin mengnong moh amram pomat orhor dindeiptimur napotperhan amrama noh ama ihat pati ohe pe oh amam isipnap hapatmur. Be ohe amam oh ama ohe amam hrepdapat hat patmur. Ama amam orhap isip hat patmur.
Gaias oh Got orhe nita ihirnong yah mat ma panggeisuh ohe meng oh
5 Norhe bopor nahat napapat han Gaias gwe Got ohe nita hat pati taptem ihirnong go hanhan hat patin orhor apriperhan ihirnong ma ambur panggeim yah deipat oh go arpin Got orhe mengnong dindeipat ohe pe oh indeipatmur. 6 Gwe ihirnong imat da apris bopor mar panggeipat ohe meng oh Got ohe nita sios bap ma pati nuhurnong napotperhan nuhur amratirimur. Ama ihat apripti han Got orhe nita bap ihir gwe pat teinong apriyahanhe ire son ohe mandaphe guragure kat Got orhe atamreipti han bap ihirnong panggeitpera daham ma panggeiptiru mat orhor ihirnonghe imat orhor panggeim darherinmur. 7 Ama Got orhe atamrein sapti bap ihir Krais orhornong Ihat pat han ma hapat daham ha am hatingwe rim orhe win aisip mat apisaptimur. Imat isip mat ma apisapti oh ihir Nure meng pot ma pisapti ohe pe yan oh Got orhe danong na hat pati han bap ire ihsen erer oh nuhur na datiprohemur daham ihir na dara be ihat saptimur. 8 Ihat sapti han bap ihir ohoh ihan Got orhe nita hat pati han bap dirdapat Ihirsi dirsi diradir arpin mengnong tap tamreindin han bap hatper daham dirdapat ihat apriya han ihirnong asoh ambur panggeiyahan yahmur.
Diotrepis ohe er hat sasuh ohe meng oh
9 Ama ihat yah hat atamrein sapti han bap ire gure patinong oh aprin meng oh noh sios bap ihirnong brak mar adarhetir orhor Diotrepis oh Nohri mama sios bap ire kakhan hat patepora dahapat han oh Noh Jon ohe meng hrepdapat hat na pat hanmur daham na amratirmur. 10 Ama han ohe ma ihat sapat da oh mamaru hat sapatmur. Oh nure boknong hanip nure ti na ihapti dasuh inin er nahatin meng oh nure boknong nahapatmur. Imat inahama ma ihpat oh nohe ma porpat meng oh na amrama ihirnong ambur na panggeipatmur. Na panggeima kat sios ihirdapat ama apriya han ihirnong ambur panggeitper dahatperhan oh Ama apriya han ihirnong ambur panggeitpera dahapti han bap gur Got orhe nita na hat pati han bap ohoh ihan gur Got orhe rotu apnonghe na rosiprimur por baso porpatmur. Oh ihat pat han ohoh ihan noh apirhanhe ohe er hat patin ma ihpat meng gonsi oh noh sios gure kintei oh atirip hatipramur.
Demitrias oh yah hat sasuh ohe meng oh
11 Norhe bopor nahat napapat han Gaias gori er danonghe dindeipra. Yah danong orhorwi dindeinmur. Yah danong dindeipti han ihir Got orhe nita hat patim ihat saptimur. Er danong dindeipti han ihirhe Got ohnong hanhan hat patim ihat saptimur. Ihtin ohoh ihan gori er danongri dindeipra. Yah danong ohwi dindeinmur.
12 Demitrias ohe ma patnong oh Got orhe nita kuuhan ihir Oh yah danongwi ham yah hat sapat hanmur riptimur. Ire ma riptiru oh Got orhe arpin mengnong dindeipat ohe pe oh oh arpin ihat yah hat sapat han ma hapat daham am haptimur. Nohdapathe Oh arpin yah hat sapat hanmur ma ripat oh gurdapathe Jon oh arpin mengwi ripat han ohoh ihan orhe ma ripat meng moh arpin meng ripat ma hapat daham am hat patimur.
Jon oh Gaias ohnong kapkep matip ohe meng oh
13 Noh Gaias gonong ruumsan meng napotin orhora; brak tei moh brak mar na napotiprohmur. 14 Noh kapkap aprisa diradir wanggoshama mengitiproheneng dahapatmur. 15 Gin Gaias go Got orhorsi manap goshat indin ohe da ohsi hat patim manap goshat ha patenoh rim noh mama brak mat nasar ohmur. Norhe yah han maihirhe Gaias oh sa yah hat pato rim gonong dahatahatperhan noh mama brak mat nasar ohmur. Gin gomdapathe gorhe yah han gonsi ihirnong Jon oh Ihirhe sa yah hat patio rim dahatahat hangwermur potinmur.
Jon nohe meng oh gin kimur.