1 Hein nekeulì si Jehoshafat diyà te turuǥan din diyà te Jerusalem he wazà mekeizi, 2 ne midsinuǥung sikandin te ebpeneuven he si Jehu he anak ni Hanani ne migkeǥiyan din te, “Maan is mid-uǥupan nu is lalung wey mibmahal nu haazà is menge etew he mibpekidkuntada te Nengazen? Tenged kayi, nepauk is Nengazen kenikew. 3 Piru zuen ded meupiya he naahà diyà te kenikew. Impepen-awè nu kayi te Juda is menge tukud he simbulu te vahi he ed-ezapen he si Asera su iyan nu egkesuatan is kedangep te Megbevayà.”

4 Diyà med-ubpà si Jehoshafat te Jerusalem, piru mibpemeyaan din is menge etew puun te Beersheba pehendiyà diyà te vuvungan te Efraim su ibpelikù din sikandan diyà te Nengazen he Megbevayà te menge kepuun dan. 5 Duen menge zatù he midhimu zin he menhuhusey ziyà te kada vinerengbeng he inged diyà te Juda. 6 Ne migkeǥiyan din sikandan te, “Purung kew isip-isip te kenè kew pa edhukum, su is kedhukum niw, ne kenà para zà te etew, kekenà, para te Nengazen. Ne iyan is Nengazen eduma keniyu te kebpenhusey niw. 7 Tehuza niw is Nengazen, ne hukum kew te hustu su kenà igkesuat te Nengazen he Megbevayè tew is kebpemintahà, wey kedhukum he zuen edepiǥan, wey iyan ibpevenar is ebpekeveǥey.”

8 Duen daan menge Levihanen, menge memumuhat, wey menge pengulu te menge pemilya te menge Israilihanen he midhimu ni Jehoshafat he menge menhuhusey te menge rirù he zuen kelevetan te kesuǥuan te Nengazen wey kedhusey te menge ebpekedtetebek. Ne ziyè dan med-ubpà te Jerusalem. 9 Iyan heini menge mandù din kandan: Kinahanglan he mebpenilbi kew he metinumanen wey ebpuun te ǥehinawa niw duma is kedtahud te Nengazen. 10 Ne emun duen samuk he egkehitavù diyan te keniyu he vaal te menge zuma niw ziyà te minsan hendei he inged he zuen kelevetan te kedhimatey wey zuma pa he paaǥi te kebpekesupak te menge suǥù wey menge sulunuzen, petizeeni niw sikandin he kenè dan mebaal te salà diyà te Nengazen, su wey kenà mepauk sikandin keniyu wey diyà te kandan. Ul-ulaha niw heini para kenè kew mekesalà. 11 Emun duen menge kasu mehitenged te kegkesupaka te velaud te Nengazen he kenè niw egkehusey, si Amaria he lavew he memumuhat is ipehusey niw zuen. Ne emun duen kasu mehitenged te kegkesupaka te velaud te gubirnu he kenè niw egkehusey, ne si Zebadia he anak ni Ishmael he pengulu te tribu te Juda ne iyan ipehusey niw zuen. Ed-uǥup keniyu is menge Levihanen para mesunud is hustu he kukuman. Pekevurut kew he ebaal te kinahanglan he ebeelan niw. Berakat he zumahi te Megbevayà is menge etew he ebaal te hustu.