1  Nengazen, maan is mibpekeziyù ka?

Maan is mid-eles ka zutun te timpu he edlised key?

2 Tenged te kegkemepelevawen te lalung he menge etew, ibpaantus dan is menge egkaayuayu.

Berakat he iyan sikandan melitag te idlitag dan te zuma he menge etew.

3 Ibpahambug dan is menge mezaat he tinguhè dan.

Is menge etew he azen is dekelà diyà te ǥehinawa zan, ebpenrawak wey ed-undaunda kenikew, Nengazen.

4 Tenged te kegkemepelevawen te menge lalung, ne kenè en sikandan ebpetavang kenikew.

Kenè dan ed-isipen is mehitenged kenikew.

5 Ne minsan pa zutun, layun sikandan ed-uswag, umbe wazè en diyà te isip dan is kedhukumi nu kandan.

Ne và dan dà ed-un-undaha is menge kuntada zan.

6 Iyan diyà te isip dan is: wazà mezaat he egkehitavù kandan,

kekenà layun dan ebmelipayen ne wazà ebpekekaid kandan.

7 Nepenù te rawak, tarù, wey hulga is menge lalag dan.

Melemu zà diyà te kandan is kebpenrawak.

8 Ed-eyanan dan diyà te menge inged is menge etew he wazà mekesalà diyà te kandan.

Ebpeniizan dan ne edhimetayan dan.

9 Iring sikandan te erimaung he ed-eles he ed-ayan su edekepen dan is menge egkaayuayu,

ne emun ebpekezakep dan en ne eguyuzen dan haazà.

10 Mekehizuhizu is egkekeizan dan su ed-eminen dan en

is desen dan te kedruuǥa zan kandin taman te kenè en sikandin ebpekeenew.

11 Iyan diyà te isip dan is iring te midsebpengan te

Megbevayà is menge mata zin su kenè en ebpekilavet dutun te mezaat he vaal zan.

12  Nengazen he Megbevayà, kenè nu pekeuǥeta is kedsiluti nu te menge mezaat he etew!

Ne kenè nu vey-ani is menge egkaayuayu he menge etew.

13 He Megbevayà, kenè nu ituǥut he un-undaha ka te menge mezaat he etew.

Ipeehè nu kandan he tarù is egkeisip dan he kenè nu sikandan edsilutan

tenged te menge mezaat he vaal zan.

14 Neehè nu is menge etew he ed-antus wey sikan is ebpenlised,

ne andam ka he edtavang kandan.

Edangep diyà te kenikew is mekehizuhizu he menge etew he iring te menge ilu,

ne edtevangan nu sikandan.

15 Iawè nu is gehem te menge mezaat he etew.

Siluti nu sikandan tenged te kezaat dan taman te egkeengkezan dan is ked-ulaula te mezaat.

16  Nengazen, edhadì ka te wazà pidtemanan.

Egkengeawà is mezaat he menge nasyun kayi te kelibutan he midlimbag nu.

17  Nengazen, nezineg nu is ampù te menge egkaayuayu he menge etew.

Ne ǥeina te ebpemineǥen nu sikandan, edlig-enan nu sikandan.

18 Ebpemineǥen nu is pengemuyù te menge ilu wey menge etew he edèdaaǥen,

su wey ikeveǥey ziyà te kandan is hustu he kukuman,

su wey wazè en ebpelihandek kandan he etew he kelibutanen dà.