1  Nengazen, pemineǥa nu wey tevaka nu is ked-ampù ku su egkaayuayu a wey pubri a.

2 Tipiǥi nu is untung ku su meheǥet is kedsunud ku kenikew.

Iyan ka Megbevayè ku;

luwasa a kenikew is suluǥuen nu he midsarig diyan te kenikew.

3 Kehizuwi a, Nengazen,

su layun a ebpengumew-umew kenikew.

4 Lipaya a kenikew, Nengazen,

is suluǥuen nu su ziyà a te kenikew med-ampù.

5 Tutuu he meupiya ka wey mepineseyluwen,

ne utew nu mibmahal is langun he ebpengumew-umew kenikew.

6 Pemineǥa nu, Nengazen, is ked-ampù ku;

pemineǥa nu is kebpehizuhizu ku kenikew.

7 Ebpengumew-umew a kenikew te timpu te kelised su edtevaken e man kenikew.

8 Wazà megbevayà he iring kenikew, Nengazen;

wazà minsan hentei he ebpekehimu te nengehimu nu.

9 Edsimba kenikew is langun he menge etew ziyà te menge nasyun he midlimbag nu.

Ne edeliǥen ke zan.

10 Su mekeǥeǥehem ka, ne egkein-inuwan is menge vaal nu;

iyan ke zà Megbevayà.

11 Penurua a Nengazen te paaǥi nu,

ne edtumanen ku heini te kenà duwazuwa.

Tevangi a he mehimu he utew hustu is kedtehuza ku kenikew.

12 Nengazen he Megbevayè ku,

edeliǥen ku sikew te kedalig he ebpuun kayi te tivuuk he ǥehinawa ku.

Edeliǥen ku sikew te wazà pidtemanan.

13 Su utew a kenikew mibmahal;

midlibri a kenikew te kemetayen.

14 He Megbevayà, edsurungen a te gelbuwen he menge etew su edhimetayan e zan.

Mesipala sikandan ne wazè dan mekekilala kenikew.

15 Piru sikew, Nengazen, hihizuwen ka wey veliǥeǥawen ka he Megbevayà.

Beliǥeǥawen ka wey metinumanen, ne kenè ka melemu he egkepauk.

16 Seǥipaa a wey kehizuwi a;

beǥayi a te zesen nu ne libriya a is suluǥuen nu.

17 Ipetuusi nu kayi te kediey is keupiya nu su wey mepeel-elezi is menge kuntada ku ke egkeehè dan haazà.

Su iyan ka, Nengazen, edtavang wey ebeǥey kedì te kelipey.