1 Urimo vae niöꞌi öꞌodoho röhu maho öꞌejo. Ëhi jiëꞌoho vae niöꞌi gemu öꞌëꞌe jevoꞌëꞌe. God-are surire jöho ëhi uvëꞌeje: Ae rahumëhu ae gö hesi sisë court-re majëhijëꞌoho ae niöꞌi o niöꞌi gemu mu sisë gavarijohuro jöe gemuoho ajamirovoromo huruoho majëhiꞌiramu hesi jö sisëho jioꞌaꞌajëjo. God-are surire jöho ëhi uvëꞌeje. Ëhuni jemë bogo avoho raromëꞌoho naro öꞌoromo jemesi jö sisëho majae niöꞌi gavodoho röhu maho gavëhoꞌiramu jemesi sisëho vaꞌorahore huruohëhëꞌe jioꞌëꞌe. 2 Urimëꞌi na öꞌoromo rueromo röhu maho öꞌode majare evare jögore bojëmiromo uëvodeje: Mu sisë urimo vaejarije ariböviohuꞌo a ioroꞌiorohuꞌo naehu röhu maho rovëꞌoho bogo vuororëmiꞌi iꞌue bojëmiꞌejöjo. Jemëꞌo hiromo ëhi uëvodoho öre ëgoꞌo hiromo röhu maho ëhi gemuoho uëve. 3 Naehu jemë iꞌu bojëmiꞌirode hesi bëhoho jemë uvarujeje: Ëꞌego no gaꞌirarëjo Kerisoro Paul jöe bojamego o bogo bojamego huhu no majahuijajoho. Iae naro Keriso-are darugoho baeromo öꞌoromo iꞌue bojëmiꞌiramu gaꞌaꞌaruje Kerisohu na jö bojemajoho. Kerisoro bogo ma-uꞌuhoromo jemesi öriroho muoho vaeꞌi aꞌi darugo maꞌo vaejajeje. 4 Iae Keriso-are sino uꞌuhamu korosire anamu guomadeje röhu avevejöꞌoho hu God-are darugoho baeromo biririvoromo hijajeje. Keriso-are aribövie gemuohuro javuëꞌëro noꞌo ëhi uꞌuhavuajeje. Röhu God-are darugoho baeromo Kerisoꞌo gemu mae raromoromo biririvoromo jemesi örire ajëmiꞌejo.

5 Nasi öriroho nadi bijeho geꞌi aꞌi jemesi arijoꞌarije garorovoromo gare jemë Keriso uhohuꞌo mae uehorovëvego o ma-döëremu mae uehorovëvego. Jemë iae garomo uvarujeje: Iesu Keriso Corinth rajo nosi dë vövöbajoꞌere hijaje höjo. O na jemë ma-döëremu muoho vaejarujeje. 6 Röhu naro uve: Jemëro garomo uvoꞌaꞌarujëjo: Paul-më bogo ma-döhemuoho muoho vaejarue höjo. Na nege jemëro ëhi uvoꞌirarijego. 7 Noro God-are örire uavarueje huro ajëmego jemë bogo rireromëvoꞌiröhego. Ëhesi bëhoho bogo ae ahoꞌobëhe uvoꞌirarijego: Paul-mesi darugoho ruahöꞌöjëꞌe hö uvoꞌirarijego bogo ëhunioho no uavarueje. Aꞌi no uavarue hesi bëhoho jemëro mu maemu vaeꞌirarijego ëhuni God uavarueje. Röhu jemë mu mae vaejamu noehu iꞌu bojëmiꞌiröhe darugo bogo röjëhijamu aehu uvëꞌoho: Paul-mesi darugoho bogohö uvëꞌoho iae hesije. 8 God-are jö ma ahoꞌiröhoho no bogo eni javuoꞌi ma-nigemoꞌiröhoho eni javue. Ëhuni jemëhu mu mahemu ejamu gëvëꞌoho no iꞌu bojëmiꞌiröhe darugoho bogo röjëhiꞌejo. 9 Jemëhu Keriso-are darugo baeromo biririvëꞌoho o noehu Keriso-are darugo jemë bogo röjëhiromo iꞌu bogo bojëmamu a nunire uꞌuhavuëꞌoho iae nimoroharueje. Jemëro avoꞌavoho uehorovoꞌirarijego ëhuni noro God-are örire ua gavarueje. 10 Ëhuꞌego na öre ëgoꞌo hiromo ave jö jajivaje hesi bëhoho na öꞌoromo jemëꞌo hiromo nasi darugoho bogo baeromo vöröꞌe iꞌuoho bojëmiꞌirodëni. Ëdarugoho Badaro bojemadeje bogo jemë ijumëvoꞌi aꞌi ajëmego avoho biririvoromo mae uehorovobe vaꞌirarijego.

11 Nasi ö muenoꞌe ijo tugohoꞌi jöho uëꞌiëꞌe. Mae raromore. Avoꞌavoho uehorovoromo nasi jöho ejehore. Uehore gemu baeromo huë mae baerovore. Ëhi ëꞌëꞌoho God huë ma o sanuꞌe jö bojamuijaje ahuro jemëꞌo hiꞌëꞌe.

12 Christian ö muenoꞌehu jejamirovaruëhi ëhi jejamirovore.

God-are aribövie ahoꞌobëhe jemesi örire jejëmijö.

13-14 Bada Iesu Kerisoro huë baejëvoromo jemë ahoꞌo ajëminövoꞌi God-ro jemë ahoꞌo uehorovëvonövoꞌi God-are Aruꞌaho Mahuro ae ahoꞌo jemëꞌo gemu mae hi juvoꞌëꞌe. Ahia minoꞌe.