2
Bada Iesu hu munë vaꞌëne jiaje jöhoje.
1 Jemë iꞌe rahëvanovëꞌe aribövie jëvëꞌe jiaje ëhuni mu sisëho ahoꞌobëhe vuonugore. Sareri sareriꞌe muoho döëremu mae vaejaruje muoho vuonugore. A jabesi mu mahuni dë vörönëgajoho vuonugore. Jö sisëho vuonugore. 2-3 Aꞌi jemëro mamiꞌe herovarijeje Badaro jemë huë baejëvamu. Huë baejëvamu herovëꞌe jëvaje ëhuni iꞌe rahëvëꞌe asisöꞌehu amu rihu ueꞌahoꞌi nimoruomajëhi ëhi dë vövöbajoꞌo hesi amu maho ueꞌahoꞌi nimonörovore. Ëhi jiëꞌe amu ueꞌahëꞌoho jemesi aruꞌahoho biririvobe vaꞌojuvo ijonö a duvaho vaꞌëne jioromo maro raromoꞌaruje. 4 Röhu jemëro Bada Iesuarinö ruere. Hu hesi darugoremu hiromo darugo bojamuijaje ahoje. Hu munë vaꞌëneje. Ëmunëho aëro sisë hö uvoromo vuonugamu God-ro maego hesi baejadeje. 5 Röhu jemëro Iesuare darugoho baejëꞌe jëvaje hesi öroro rovego God-ro jemë munë gagovëvanovoromo huꞌo havëvoromo javu böröme vaejëvanovoꞌiro jemë gemuoro jëvego hesi Aruꞌahohuro ë vaꞌo hiꞌiröhe. Ëosa börömore jemë ë rumo vaꞌoromo priest muoho vaenövoꞌaruje. Jew rajo priest-ehu God-are osa börömore rumo vaꞌoromo God-ni suvuoro bahijaharëhi jemëro ëhi priest muoho vaeromo jemesi dë vövöbajoꞌo suvuoroho Iesu Keriso-are jöëni God-are örire bojaminövoꞌaruje. Ëhi jiëꞌe suvuoro bojamijëꞌoho God-ro garomo nimajeje. 6 Ëhesi jöho God-are surire jajivoromo uvëꞌeje:
Ëhuro gahëjo. God naro munë vaꞌëne aho Zion bamajëjo
huro munënöꞌe biririꞌe bönu mabëhëro namijego ëhuro javuoho bibivoröhego.
Ae rahu ë aho mae uehorovëꞌoho bogo javojimo gaꞌaꞌajëjo.
7 Mae uehorovaruje aribövioho jemëro uvarujeje: Ëmunëho iae mabëhe höjo. Aꞌi bogo ma uehorovarue aribövi jabesi jöho God-are surire jajivoromo uvëꞌeje:
Munë javue vaeꞌirögoro munë gemu bijönimoromo vuonugare höjo.
Vuonugaroho jaruvoho ë munëhuro javuoho nigemoꞌego bibivoromo mae namijajëjo.
8 Röhu jabesi jö göho jajivoromo ëhi uvëꞌeje:
Aëro ë munë vaꞌëne are ro biberovoꞌaruëjo.
Hesirire ro rireromoꞌaruëjo.
Biberovarue hesi bëhoho God-are jöho juahobijioharueje God-ro ëhi jiëꞌe iꞌuoho bamëhëꞌëro.
No God-are aribövie javuaje jöhoje.
9 Aꞌi jemë God-ro baejëvëꞌe aribövie jëve. Huꞌo masije riravaruje priest ömoꞌöme jëve. Ma-maemu jëvëꞌe aribövie jëve. Hesiremu jëvaje hesi bëhoho jemëro hesi mu mabëhi hesi jöho ae majëhiꞌirarijego rabëni jemë ramoramore raromamu huhu baejëvoromo hesi aji mare bamëvadohuni ëhuni ae majëhiꞌirarijego. 10 Urimoho jemë iho rumoꞌe aribövie jëvadeje. Jaruvoho God-are aribövie jëve. Urimoho God-are huë maho bogo baejarijeje. Jaruvoho hesi huë maho baejëꞌe jëve.
No God-are muemu vaejarue aribövie javuaje jöhoje.
11 Aganomë na jögore bojëmiꞌirögoro ëꞌe. Jemë ave saꞌare raromarujoho saꞌa göre ma-jahuri raromarue aribövioho vaꞌëne jëvanove. Ëhuni uëve jemesi sinehu mu gö gö nimoromo aruꞌahohuꞌo umogihajoho nadi gavanovore. 12 Aꞌiro God bogo uehorovarue ariböviohuꞌo raromoromo mu maemu vaebe vaꞌore. Ëhi ëꞌëꞌoho jabumëro jö sisë buꞌöromo jemë sisë vaejaruje hö uëvaruoho röhu gëꞌiröhe jemë mu mae vaeꞌiramu gëgorovo vaꞌo ëho majaho rueꞌiramu God-are ihoho mae uaꞌëꞌö.
13 Röhu Badare jöho uehorovoromo aehu masijo bahiꞌamare aribövioho ahoꞌobëhe jabesi jöho ejëhore. Aehu böröme namiromo nosi saꞌae ahoꞌobëhe muebejavuajoho ejahore. 14 A börömo hesi bëhire raromoromo saꞌare mu muebejëvaruoho ejëhore. Ësaꞌare a börömohuro jabumë rëmöꞌöjëꞌeje mu sisëꞌe aribövioho iꞌue bojëmiꞌi mu maꞌe aribövioho mae uëröhego. 15 Jemëhu a masijo ejëhoꞌirarije hesi bëhoho God hu nime jemëro mu mae vaejego sisëꞌi uehorovarue ariböviohuro ëho garomo simano rumoꞌe jöho vuonugoröhego. 16 Röhu aehu a gö jabesi darugoremu raromoromo jabesi muemu vaejaruëhioho nadi ëhioho raromoꞌi mae raromo jijihore. Ëhiꞌore röhu nadi uvore: No bogo a darugoremuoho raromoꞌi iae no nosi mae raromo jijiharuëromo ëhuni riꞌöromo mu sisëho vaere. Aꞌiro uvore: No God-are darugoremu raromoromo hesi muemu vaejarue aribövie javuajëromo mae raromo jijihore. 17 Ëhiꞌoromo ae ahoꞌobëhe rajëhire. Christian ö muenoꞌoho dë vövöbajoꞌe ahoꞌo uehorovëvore. God böröme hö uehorovore. Saꞌare böröme namiromo muebejavuajoho rajahire.
Kerisohu huë vavaeni baejadëhi noꞌo ëhi huë vavaeni baeröhe jöhoje.
18 O ae gö jabesi darugoremu raromoromo mu vaejëharuje aribövioharo jemesi mu simano vaejarue aribövioho masije hö uehorovoromo jöho ejëhonövore. Jemesi a masijehu a mae jioromo sanuꞌe jöemu majëhijëꞌoho ejëhoꞌi röhu vöröꞌe aribövioho jabuꞌo ejëhonövore. 19 Ëhi jiëꞌe sisë aribövi ejëhoꞌirarije hesi bëhoho jaehu God-are jö uehorovanuohuni aehu huë vavaeni ëma bojamamu ma-herovëꞌi taemorovoromo hijëꞌoho God-are huë maho baeꞌaꞌanue. 20 O jemë mu sisë vaejamu aehu muoꞌamëvamu jemëhu ma-taemorovëꞌoho no rabëni uvoꞌejo: Jemë taemorovarujohuro jemesi ihoho ajiomëꞌe höjo. Aꞌi jemë mu mae vaejëꞌiro huë vavaeni bojëmamu ma-taemorovëꞌoho ëhuro God-hu gavajoho maeje. 21 Rabëni hesi bëhoho God-ro ëhi jiëꞌe huë vavaeniꞌe muoho jemesi örire bojëmijëꞌeje. Keriso huꞌo jemesi jöëni huë vavaene baejadeje. Huë vavaene baeromo ëhuro jemëhu diehi ëꞌirarije muoho röjëhijadeje huhu ëꞌadëhi jemëꞌo ëhi ëꞌirarijego. 22 Hu mu sisëho bogo vaejadeje. Sareriꞌe jöho bogo jövadeje. 23 Aehu sivohijaroho bogo mana sivëgonövohijo. Aehu viꞌehi bojamihijaroho hu bogo jö darugoꞌoho mana majëhinövohijo. Aꞌi hesi arijoꞌarije God-are övo döre bamorovadeje hu mae mevoromo gavaje aego. 24 Ëhiꞌoromo huro nosi sisë hesi iꞌuoho hesi sino hahoꞌere baeromo korosire guomadeje ëhuro no vuovanovoromo öri sisëho ioroꞌiore gemu vuonugoꞌi iꞌovoromo öri maremu jijihoröhego. Huhu viꞌehi baejadohuro ëhuro jemë sisëꞌi raromarijoho marëjëvëꞌeje. 25 Sheep-ehu sidövanovoromo jijiharijoho jaruvoho sheep o jemesi aruꞌaho muebeꞌamaje a hesiro vuonoröꞌö rovëꞌe jëve.