Añanar aŋ
Lilaya in
Akayëta Añanar and Bibël aŋo ro kë sëƴalind mëne Kaxanu rik ngwën iŋ do gë ɗek ɓeɓër ex polo ɓën. Mëŋ ri këɓi ɓela ɓën gër eñaw̃ endexëm do gër amëndëra andexëm. Gër ỹanar, aniyan aŋ monënga nënga bax gayik enjekax fo bax. Ɓarikan asoŝan an do gë asoxari aỹanar an w̃endëra këni. Ata Kaxanu ỹana ko këɓi xitind ɓela ɓën xali ƴowëk apumbuluỹët aŋ. Nowe do gë ɓër ekun edexëm ɓën fo fex bax gayik ɓën fo bax ɓër bax liyand ang rek eyeƴan ed Kaxanu ɓën. Ga xucak apumbuluỹët aŋ, ɓërandëw̃ëra and Nowe ɓën ỹana këni këni ŝënarënd. Ỹana këni gaŝëxe emëŝen ed Kaxanu el. Ɓarikan Kaxanu yata këŋo Abëraxam do fel këŋo exo dëfa gër ebar ed Kanahaŋ. Isak, asëñiw̃ ar Abëraxam, do gë Yakob ɓëteli këni eter ed Kaxanu do gë Abëraxam el. Oɓaŝ or Yakob ol rëw̃ër këni ɓenëng epëxw gë ɓeki, do hi këni ɓulunda ir Isërayel in. Ata paɓ gë ɓulunda ijo ɓakawëk gër ebar enang ed enim Kaxanu el. Er ex gër akayëta in:
Mondake ỹanak ngwën iŋ do gë aniyan and ɓela aŋ: 1.1–2.25.
Mondake ỹanak eñëŋënax eŋ do mondake xëñëk gër ngwën: 3–6.
Endeƴ end Nowe do gë end apumbuluỹët eŋ: 7–9.
End ɓërandëw̃ëra and Nowe eŋ: 10–11.
Endeƴ end Abëraxam do gë ekun edexëm eŋ: 12–25.
Endeƴ end Isak do gë ekun edexëm eŋ: 26.1–28.9.
Endeƴ end Yakob do gë ekun edexëm eŋ: 28.10–50.26.
1
End eñana eŋ
1 Gër ỹanar, Kaxanu nëcëtëguk* 1.1 Kaxanu nëcëtëguk ɓeỹ ɓën në ỹoweỹ gayik mbaŋ fanga ko. orën ol do gë ebar el. 2 Ebar el er hi bax ŝoɗe-ŝoɗe, do wafërëluŋ. Ecamëɗan fo xëñ bax gër ambëxw atiw̃ax aŋo, do onjën ond Kaxanu oŋ bax xerëkerarand ƴaŋ gër amen.
3 Kaxanu re ko: «Gil ex angoɓen aŋ!» Ata hik angoɓen aŋ. 4 Kaxanu wat ko mëne angoɓen aŋ eyekax ex. Ŝapëreli ko angoɓen aŋ do gë ecamëɗan el. 5 Kaxanu w̃ac ko angoɓen aŋ «Goyat», do ecamëɗan el «Gëmëɗ». Ata ga w̃ëɗëk do xeyëk, hik akey añanar aŋ.
6 Kaxanu re ko: «Gil ex anguxar mërëxand ir amen do ex capëreli amen aŋ ja mërëxand!» 7 Ata Kaxanu ri ko ƴaŋ anguxar aŋ. Ŝapëreli ko amen and hik ɗila gër anguxar aŋ gë amen and hik ƴaŋ gër anguxar aŋ. Ata hik mondako. 8 Kaxanu w̃ac ko anguxar aŋ «Orën». Ata ga w̃ëɗëk do xeyëk, hik akey akinëm aŋ.
9 Kaxanu re ko: «Amen and hik ɗila gër anguxar aŋ ɓarërëlex beɓët iɓat, do canayal ex eperëk el.» Ata hik mondako. 10 Kaxanu w̃ac ko eperëk el «Ebar», do amara and amen aŋ w̃ac ko «Angwëngw». Ata Kaxanu wat ko mëne aye yek. 11 Kaxanu re ko: «Ebar el dëw̃ëlex ɓeɓëlëg, ondës ond gë eneɗa, gë ɓatëx ɓañamb ƴamb, ɓand gë enëng gë enëng, do gë ɓeneɗa ɓendeɓën ak.» Ata hik mondako. 12 Ebar el rëw̃ëk ɓeɓëlëg, ondës ond gë ɓeneɗa, ɓatëx ɓañamb ƴamb ɓand gë enëng gë enëng, do gë ɓeneɗa ɓendeɓën ak. Kaxanu wat ko mëne aye yek. 13 Ata ga w̃ëɗëk do xeyëk, hik akey atasën aŋ.
14 Kaxanu re ko: «Gil ex ɓangoɓen gër anguxar and orën, ex pitëndëraxënënd goyat in, do gë gëmëɗ in. Ɓangoɓen ɓaŋo kë hi ɓananganëme ɓand opëna, gë ɓakey, do gë ɓëniy. 15 Elod ƴaŋ gër anguxar and orën ŋoɓayindëlex ebar el!» Ata hik mondako. 16 Kaxanu ri ko ɓangoɓen ɓatëm ɓaki: atëmënak aŋ ex ŋoɓaxënënd goyat, do atil aŋ do gë ow̃al oŋ ex ŋoɓaxënënd gëmëɗ. 17 Kaxanu xaw̃ ko ɓangoɓen ɓaŋo gër anguxar and orën ex ŋoɓaxënënd ebar el, 18 ex ŋoɓaxënënd, aŋo goyat do ɓaŋo gëmëɗ, do ex pitëndëraxënënd angoɓen aŋ do gë ecamëɗan el. Kaxanu wat ko mëne aye yek. 19 Ata ga w̃ëɗëk do xeyëk, hik akey anaxën aŋ.
20 Kaxanu re ko: «Ɓëmacar ɓëŋ ñëmbërëlexëni gër amen, do oŝël ol cëgërayindëlexëni ƴaŋ gër ebar, gër anguxar and orën!» 21 Kaxanu nëcëtëgu këɓi ɓoñeỹ ɓond gër angwëngw ɓoŋ, gë ɗek ɓeɓëɓëngw do këni ŝangënarand ɓën. Nëcëtëgu këɓi ɓëte ɓeɓër ỹëmbër bax gër amen ɓën, gë ɓenëng ɓendeɓën ak, do gë oŝël ol, gë ɓenëng ɓendeɓën ak. Ata Kaxanu wat ko mëne aye yek. 22 Kaxanu yël këɓi oɓetak ol and re ko: «Cënarin, ñëmbërin do pëxwin gër amen, polo gër angwëngw. Do oŝël ol ñëmbërëlexëni gër ebar!» 23 Ata ga w̃ëɗëk do xeyëk, hik akey anjoxën aŋ.
24 Kaxanu re ko: «Ebar el dëw̃ëleɓi ɓeɓëɓëngw, gë ɓenëng ɓendeɓën ak: oyel ol, gë ɓanjën ɓaŋ, gë ow̃acar oɓapuỹ ol, er ex yo gë enëng endexëm ak!» Ata hik mondako. 25 Kaxanu ri këɓi ow̃acar oɓapuỹ ol, gë ɓenëng ɓendeɓën ak; oyel ol gë ɓenëng ɓendeɓën ak; do gë ɗek ɓanjën ɓand gër ebar ɓaŋ, gë ɓenëng ɓendeɓën ak. Ata Kaxanu wat ko mëne aye yek.
26 Kaxanu re ko: «Dinëɓëne tan ɓela ɓën gër eñaw̃ endeɓi, eni mëndër gë ɓiyi, enëɓi bëñaxënënd oxan or gër angwëngw ol, oŝël or kë ŝëgërand gër orën ol, gë oyel ol; eni bëñaxënënd ebar el ɗek, do gë ɗek ɓanjën ɓand kë ŝangënarand gër ebar ɓaŋ.» 27 Kaxanu nëcëtëgu këɓi ɓela ɓër ex eñaw̃ endexëm ɓën. Nëcëtëgu këɓi gër eñaw̃ end Kaxanu: asoŝan do gë asoxari. 28 Kaxanu yël këɓi oɓetak ol and re ko: «Dëw̃ërin mbaŋ, ñëmbërin, ɗëgërayin në er ex yo, do bëñayin ebar el. Bëñayinëɓi oxan or gër angwëngw ol, oŝël or kë ŝëgërand gër orën ol, do gë ɗek ow̃acar or kë ŝangënarand gër ebar ol.»
29 Ata re ko Kaxanu: «Anëka yël këmun ɗek ondës ond gër ebar oŋ, gë ɓeneɗa ɓendeɓën ak, ɗek ɓatëx ɓañamb ƴamb ɓaŋ, gë ɓeneɗa ɓendeɓën ak, ex gi eƴamb edewën el. 30 Emacar end ex yo gër ebar, acël and kë ŝëgërand yo ƴaŋ gër orën, er kë ŝangënarand gër ebar do hik gë onjën yo, ɗek ondës ocëkët oŋ ex eƴamb ƴamb edewën el.» Ata hik mondako. 31 Kaxanu wat ko ɗek er ri ko in mëne mbaŋ ye bax. Ata ga w̃ëɗëk do xeyëk, hik akey anjongamatën aŋ.