1 Eto ainge dombo Paul na da Derbe ta eto da Lystra ta pambuna eto ambotani vahai javo Timothy ai mihahija. Eto Timothy ta e amo Judea evohu rate Iesu ta ke ambo ambo ere uahija eto Timothy ta mamo amo enda Greek embo. 2 Eto da Lystra te da Iconium te amita namei kamei na Timothy osa ue embo javotoho ke ere ijiahera 3 avo eto Paul na Timothy humbuto pambasi uje eto amita hamo kakamba ena amita be amo Judea embo na Timothy ga umoro ari uje ae asora eto amita mamo amo Greek embo mahu kiari avoeto hamo kakamba 4 eto pambuhumihe da vahai vahai ta ekalesia ta ke pepeni Jerusalem embo okokose te Iesu ta ambotani te aingeto mahu ikari avo eo ingio agi ara ke ea. 5 Eto ekalesia na sovera ari humbuto Iesu humota be ea eto embo nei nei na kaju eo embo peni vahai ena.

6 Eto enana enda javo Galatia amita tutumo javo Phrygia amita orohuta pambuto Asia Province ta puvua te Ahihi Otohu na ke hande ari avo haekena 7 avoeto teho pambuto enda Mysia ta hane ta puvuto Bithynia Province ta pambasi uje ea rate Bada Iesu ta Ahihi na haekena 8 avoeto toto Mysia enda orohuta pambuto da Troas eva hora ta puvua. 9 Eto ai evie Paul na ehure ta enda Macedonia embo na puvuto heteto mihie penunu einge ena avo kina, “Puvuto dago Macedonia embo hondate e,” ainge enu 10 ingito ereto God ta ke javotoho enda Macedonia embomeni ta degi dago na ke hande ara avo God na uje ena avo hotembeto Macedonia ta pambasi nununga ea.

11 Eto dago nununga eto e nga humbuto da Troas toto tambueto puvuto tiuka nei Samothrace ta evito pambuto da Neapolis ta pambuto 12 e nga toto enda ta pambuto Macedonia ta Province vahai da okose javo Philippi ai ta Roman embomeni na puvuto kogombeto mihahera ai ta puvua. 13 Eto iji isapa mihimihe giu ari iji puvunu da ahone umo ti ta Judea embo ta pari ari degi irari ke hotembeto jombure ue pambuhumihe evohu ai horuketo mihio puvuto hambuto evohu ga arumbeto ke eo 14 da Thyatira evohu vahai javo Lydia amo enda nei evohu amina ke avo ingina. Eto evohu amo bo pangari ove javotoho ombari evohu amo God jakeka ere ijiahija amina Bada na amita hotembari ikenu Paul ta ke be ingina. 15 Eto amite amita da pe vahai embomeni te vahaita bapataito eo amina dagota degi ke einge ena, “Ungo, na Bada ta ambotani be hotembiheva avo nau bande ta have ungote irore,” ainge ke sovera eto enu dagota jo haperekenu amiga pambua.

16 Eto iji vahai dago pari ari degi ta pahuo embo ta pure ari kakara ahihi sapura na jo ta horeto sovera ikenu ambota do puvuresuja avo harikena. Eto embo na ambota do puvuroja ke ena avo ingesi uje eto kakara simba ari embopo ta degi koro ikeo kakara na ke avo harikenu simba ari embopo na koro peni vahai be ere umbuhahera. 17 Eto kakara amina Paul te nangote kihi pahuo amina ambota puvutohunu amita ahihi sapura na enu ingito jage einge ena, “God Sinderi te i be ta amita ke hande ari embo God na ungo dainge eto orekasuja avo ke ijie ere ora.” 18 eto iji isapamane ainge jage kaiketo ijinu Paul na tumo eto overeketo kakara amita ahihi ta degi ke einge ena, “Iesu Keriso ta javo ta erena umo arahata puvura.” ainge enu ahihi na arahata puvuto pambunu 19 kakara amita simba ari embo na koro humbari degi irae enu hotembeto 20 Paul te Silas te humbuto goruketo embo okokose da orohuta mihia ai humbuto pambuto Roman tihi jigari embo ta degi iketo ke einge ea, 21 “Judea embo emina ungotenau da embomeni isoro ara jo kajihere ingito humbuto ere puvutohora amita be amo enana dago Roman embo na dagota ke pepeni avo poeketo enda nei ta ari avo umbara ke erera.” ainge eo 22 embomeni tapa na jo vahai eto toruo Roman ta tihi jigari embo okose na Paul te Silas te ta bo houketo 23 esi ngahia na tara ikeo sapura be na tea. Eto embo okose na tipura simba ari embo ta degi iketo be vahaikaja ke ena. 24 Eto tipura ta simba ari embo na ke aro ingito humbuto tipura ta bande jo be ta gosuketo ji tevo pepeni pere heriso na utu ta kikira ena. 25 Ainge eto mume orohuta Paul te Silas te God jakeka ue haveni ijio tipura embo nei uhoho na ingihe mihio 26 enda titira peni vahai enu tipura ta bande tiroki tiroki enu bande bokiri tapa hirikenu embomeni ta chain na embomeni ta ingeni ta utu ta tigia amo karaun eto vena. 27 Eto tipura simba ari embo na evimihe ereto bokiri tapa hirikari kito embo jo ta tapa mahu pambari ke hotembeto asivo kororo eto humbuto umo oenga kaeto pehasi unu 28 Paul na kito jage peni vahai eto, “Umo ainge to. Dago tapa mihera,” ainge enu 29 tipura simba ari embo na usasa jage enu humbuto puvunu sau sau jo ta horeto tatatata ue Paul te Silas te heteto mihio utu ta sinena ue veto ereto 30 embo humbuto arahata pahue ke einge eto ingina, “Na do ano embo na na orekaro?” ainge enu 31 Paul na ke einge ena, “Umo Bada Iesu be humota asoa umo te no da pe vahai embomeni avo orekasuja,” 32 ainge eto amite amita bande vahai embomeni ta degi Bada ta ke hande uo 33 enana ta hamo ta mahu momono avo egihio tipura simba ari embo te amita da pe vahai embomeni te bapataito ena. 34 Eto mume vahai Paul te Silas te humbuto bande ta vihio donda ikeo india. Eto amite amita javo vahai embomeni te God ke be ijie tunga javotoho ere uahera.

35 Eto iho vujenu Roman embo okokose na police embopo ikeo pambuto ke einge ea, “Embo evi ikejo arahata pambare,” ainge eo 36 tipura simba ari embo na Paul ta degi ke einge ena, “Enana okokose na umo te Silas te arahata pambava ke ikehere puvija avoeto tunga jamo jamo te arahata pambuvujo,” ainge enu 37 Paul na police embopo ta degi ke einge ena, “Rome embomeni ta ke pepeni amo embo na Rome ta citizen avo mane tasora eto nei amo court eto ari sapura hambae amo Rome ta citizen avo tipura ta mane gosukasora, rate dago Rome ta citizen eto dagota ari sapura hambae sio tipura ta gosukehera te enana na dago kiae ojiketo pambara ererete? Dago mane pambasora te enana Roman embo okokose na puvuto bokiri hirikaro pambasora,” ainge enu 38 police embopo na Paul ta ke avo Roman embo okokose ta ke eo ingito joru eto 39 pambuto me kogue aja to eto ingeni humbuto arahata puvuto, “Ungo dagota da toto pambuvujo,” ainge jokeka ke na ea. 40 Eto Paul te Silas te tipura toto evohu Lydia ta bande ta pambuto namei kamei ta degi oje kahari ke ikeo sovera ari umbuo toto pambua.