1 Eto da Ephesus embomeni jamopo eo iji isapa mihimihe Paul na ambotani enu vahaita puvuo hamo ngahia humbari ta ke eto irae enu peketo da Macedonia ta pambuna. 2 Eto Macedonia Province ta puvuto degi ta pahue da nei nei ta heteto ekalesia embomeni ta degi ke neite neite ikenu sovera ari umbua. 3 Eto Greece ta puvuto hariga nei heriso nei vahai ai mihahija eto e nga humbuto Syria ta pambasi nununga unu Judea embo na avo tasi ari ke ingito enda ta tiumbeto Macedonia ta pambuna. 4 Eto embo Paul ga da Philippi ta pambua amita javo amo erevira, da Berea ta Pyrhus ta meni Sopater te da Thessolonica ta embo heriso Aristarchus te Secundus te da Derbe ta embo Gaius, te Asia ta embo heriso Tychicus te Trophimus te embo Timothy te 5 aingeto kihi Troas ta pambua. 6 Eto dago te Paul te pondo iji puvuna avo bread, yeast ikae pajirae amita pondo iji irae enu da Philippi toto e nga ta pambuto pahuo iji 5 irae unu da Troas ta puvuto hura vahai ea.

7 Eto Paul na evito da nei ta pambasuja avo hotembeto Saturday mume sihukihinu dago vahaita 3 story bande ta umoro ue indie Paul na ke hihi koso be tirihinu 8 mume humba orohuta usasa isapamane unduketo bande jo i be ta tetekea amo ai umoro asora avoeto ikea. 9 Eto Paul na hihi koso be tirihinu singa javo Eutychus amo bande otoho ta arumbeto mihie evoja evoja unu tihi vahaiketo jene tiuketo evimihe vurereketo otoho i be ta eto veto teto pehenu embo na enda ta veto oviribeto humbuto kia amo pehenu kia. 10 Eto Paul na enda ta veto singa ta hamo ta veto andito ke einge ena, “Ungo mane osaga asova, singa emo amita vasiri ehako puvija,” 11 ainge eto Paul na bande ta vihito bread pereto ikenu indio hihi koso be ijinu iho vujenu toto pahunu 12 embomeni na singa pehena amo ehako vasiri te amiga amita bande ta pambuto tunga javotoho ea.

13 Eto Paul na dago kihi e nga humbuto tiumbeto da Assos ta pambuto avo hambara ke enu pahuo Paul ambota utu na pambuna. 14 Eto da Assos ai Paul hambuto e nga ta humbuto puvuto da Mitylene ta puvuto ai hetea. 15 Eto toto eva jo ta evito puvuto tiuka Chios seriketo puvuto iji nei tiuka Samos ta puvua eto iji nei Miletus ta puvuto 16 Paul na da Ephesus ta pambasuja amo embomeni na haeketo iji koso iroja ke asora avo eto Paul na iji koso irari uje ae avoeto da Ephesus toto kito tambueto Jerusalem ta pambuto Judea embomeni ta pondo javo ‘Pentecost’ ta iji auvena avo Jerusalem ta asi uje eto sau sau pambuna.

17 Eto Paul na da Jerusalem ta pahue da Miletus ta heteto mihie da Ephesus ta ekalesia embo okokose kesi uje eto ke ikenu pambunu 18 ingito puvuo Paul na ke einge ena, “Nau embo pepeni, na kihi Asia Province ta puvuto nane tapa do ere uahena amo ungo kiarira, 19 eto nanena na na ae sisire ae Bada ta pure avo uena. Eto Judea embo ta jo ngahia avo eto osaga peni vahai kogue sisivu kuhihe pure ere uahena, 20 rate ungo kogova na ke nei do tapa ojikae rate ungo hondate ari ta ke tapa avo da araha ta eto bande jo ta ehene ingihava. 21 Na Judea embomeni te enda nei embomeni te ari sasapura avoeto God ta degi aja to ijie Bada Iesu be humo ta ara ke sovera na ijiena. 22 Eto eha amo na uje nei mane asona rate Ahihi Otohu ta uje avo eto Jerusalem ta pambuhona. Eto ai ta do puvuresuja amo na kiaera 23 te na ere kogona amo da vahai vahai ta Ahihi Otohu ke hande oi kogona amo tipura te osaga te amo na simba mihera 24 te na pehanote teho vasiri te irono amo tehora te Bada Iesu na pure nau ikena avo God na embo ta irari javotoho avo hande ikasi uje ere ua avo ke hande ano pure irae aisuja. 25 Na ungota degi pahue ke hande uena amo God na tihi jigihirou irari javotoho na iresova amita ke avo hande uena. Eto na ere kogona emo ungona na ehako mane kesova 26 avoeto iji eha eremite ungota degi ke be na erena ungo nei nei na ke be ae eto sio sao ue vaine ue ahihi datoho irari avo aijaja asova amo ujekari nau mane ujekari ungota 27 amita be amo God ta ke tapa ungota degi arahata ijiena 28 eto ungote ungota embomeni te avo simba ava Ahihi Otohu na ikena avo eto simba evujo. Eto God na amita Meni pehena avoeto ekalesia amita toho umbuna avo unduvujo. 29 Eto nei kogona amo na pahurono isoro o na puvuto undurari o kambasuja, 30 eto iji nei ungota toho uho na ke gamo ijiroro ambotani nei nei na ambo ambo asora. 31 Avoeto be kogue irivujo. Eto na mumete iji te sisivu kuhihe jua nei heriso nei vahai amita jo ta ungo vahai vahai ahe poekihena. Avoeto nau pure ngahia ari avo kogue hotembu hotembu evujo. 32 Na ungo God na simba aja tohena eto amita hondate ari ta ke na ungo simba aisuja rate amina ungo au sovera aisova eto ungote amita toho uho tapa te ta hotari avo nununga ere ua. 33 Na ungote mihie embo nei ta koro te bo te avo uje eto umbae 34 rate ungo kogova uje nau te nau pure vahai embomeni te ainge eto nau ingeni na pure ue undihena 35 avo eto na ungo ahe poekihena te donda ambu embomeni avo pure ngahia na hondate evu. Eto Bada Iesu ta ke avo hotembevujo amo, ‘Hande humbari amo aravora rate God na hande ikari embo kito osa eaguja avoeto hande embo na tunga javotoho asuja.’ ” 36 eto Paul ta ke irae enu enana tapa paunge teteri eto pari eo irae enu 37 sisi sasi ijie andito mune mine ara eto peketo orerere ea. 38 Eto Paul ta ke avo ehako puvurou enana ehako mane kesora avo hotembihe osaga peni vahai kogue e nga humbasi enana tapa amiga hora ta vea.