Yù Olu nga Túrâ ni Kuan
Yù Meyannung sù Túrâ
Yù nattúrâ sawe si Kuan, nga tádday sù ira mapulu duá nga sinudduán ni Apu Kesu. Á lakalákayin ta pattúrâ na sù ira tallu nga túrâ na. Á initubbuk na yawe túrâ na sù ira iddukan na nga mangikatalà kâ Namarò ta ngámin nga giád da. Á kinagi na nira ta magimuguk ira, marakè mesinná ira kâ Namarò, nu kurugad da yù kagian nayù ira mangituddu, nga ari kuruk yù ituddu ra.
Ta ajjan ngaw yù ira mappassapassiár nga mangituddu ta tanakuán nga ari kuruk, nga kunnay nga ajjan ta ággawo. Á kinagi ra ta narákè yù ngámin nga ajjan ta dabbuno. Á kinagi ra gapay ta ari kuruk nga tolay si Apu Kesu Kiristu, ánna ari kuruk nga Anâ ni Namarò. Á kinagi ra ta arád da máwák nga mabbabáwi ta liwiliwâ da ánna ari máwák nga makkaká-iddù ira, ta ajjan yù awayyá nayù ira tatolay nga katággitádday nga maguray lâ yù akkuán na.
Á yáyù gapu na nga initúrâ ni Kuan, tapè ipakánnámmu na yù kuruk, tapè awán ta tolay nga melogò. Á inibukalán na ta kuruk nga Anâ ni Namarò si Apu Kesu nga naggapu ta lángì, nga nabbáli ta tolay nga minay ta dabbuno. Á kinagi na gapay nittam ngámin nga tatolay nga mangiddù kâ Apu Namarò ta máwák tam nga akkuán yù napiá nga ipakuá ni Namarò nittam, nepatalugáring sù pakkaká-iddù tam.
Yù Mayán nayù Túrâ
Yù Bilin nga Meyannung sù Manotolay (1:1-4)
Si Namarò yù Mamannawák ta Nonò tam (1:5-10)
Si Apu Kesu Kiristu yù Mamakkápiá nittam kâ Namarò (2:1-6)
Yù Bagu nga Taddán ni Apu Kesu (2:7-11)
Yù Ággián nayù ira Mangikatalà kâ Apu Kesu (2:12-17)
Mappalán ittam sù Mangontará kâ Apu Kesu Kiristu (2:18-29)
Ánâ na ittam ni Namarò nga Mangikatalà kâ Apu Kesu (3:1-10)
Yawe yù Itaddán ni Apu Kesu: Makkaká-iddù kayu (3:11-18)
Mappelò kâ Namarò yù ira Pinabbalin na ta Ánâ na (3:19-24)
Yù Ari Masingan nga Makikontará kâ Namarò (4:1-6)
Sigga-iddù si Namarò (4:7-21)
Appútat tam yù Ngámin nga Mangontará kâ Namarò (5:1-5)
Yù Pangurugát tam ta Anâ ni Namarò si Apu Kesu Kiristu (5:6-12)
Yù Mannanáyun nga Áttole tam nga Mangikatalà kâ Apu Kesu (5:13-21)
1
Yù Bilin nga Meyannung sù Manotolay
1 Itúrâ ku nikayu yù meyannung kâ Apu Kesu Kiristu, nga manotolay nga mangngágan ta Ubobuk ni Namarò.
Aggina yù pannakasimù ni Namarò nga mangipakánnámmu sù bilin na,
nga paggapuán nayù mannanáyun nga áttole tam.
Egga nga mannanáyun áddè ngaw gári
sù awán paga bulubugá ta naparò.
Á ipakánnámmu mi nikayu gapu ta nasingam mi
ánna naginná mi yù kinagi na ta keggá na ta dabbuno.
Á yù matá mi lápay yù ánningam mi kuna,
ánna yù limá mi lápay yù ánnangngal mi kuna.
2 Nappasingan nikami yù manotolay, nga nabbáli ta tolay. Á yáyù nga ilayalayâ mi, ánna sistíguám mi ta kuruk nga aggina yù paggapuán nayù mannanáyun nga áttole tam. Naggián ngaw nga nepulupulù kâ Ammò Namarò, áddè ngaw lage na pamegapu na ngámin. 3 Á kagiam mi nikayu yù nasingam mi ánna naginná mi, tapè mesipà kayu nikami sù pakikopum mi kári Ammò Namarò nga Yáma tam ánna si Apu Kesu Kiristu nga Anâ na. 4 Á yáyù gapay yù ipattúrâ ku nikayu, tapè magayáyâ ittam.
Si Namarò yù Mamannawák ta Nonò tam
5 Á yawe yù bilin nga naginná mi nga meyannung kâ Apu Namarò, nga inipakánnámmu ni Apu Kesu nikami, á ilayalayâ mi nikayu. Si Namarò yù kun na nawák nga maddalingáráng, nga awán bulubugá ta kallà kuna, gapu ta awán bulubugá ta liwâ na onu narákè kuna. 6 Á nu kagiat tam ta napiá yù ákkiyápu tam kâ Namarò, ngam narákè galâ yù akka-akkuát tam, massirisiri ittam, ánna kunnay ittam ta naggián ta kallà, gapu ta arát tam akkuán yù napiá nga ituddu ni Namarò. 7 Ngam nu tumulù ittam kâ Namarò, ánna akka-akkuát tam yù napiá nga ituddu na, á mesipà ittam kuna, ánna napiá gapay yù ákkoput tam sù ira kábulut tam nga manguruk. Á mapakarenuán ittam, ánna mári yù liwiliwâ tam, megapu sù dága ni Apu Kesu Kiristu, nga Anâ ni Namarò.
8 Á nu kagiat tam ta awán ta liwâ tam, ilogò tam galâ yù baggi tam, ánna arát tam pinatattam ta nonò tam yù kuruk nga bilin ni Namarò. 9 Á nu kagiat tam kâ Namarò yù liwiliwâ tam, ánna likuránát tam yù narákè nga akkuát tam, á pakomán na ittam, ánna pakarenuán na yù nonò tam. Ta matunung si Namarò, ánna palurotan na yù ngámin nga initabbá na sù ira mangikatalà kuna. 10 Á kinagi ni Namarò ta awán ta tolay nga ari malliwâ. Á nu kagiat tam ta awán bulubugá ta liwâ tam, á kunnay ta kagiat tam ta massiri si Namarò, á arát tam kinuruk yù bilin na.