1 Vatto canxion nchanho cottimeja Jesús cjan cjoi ngain rajna Capernaum. Co chojni conohe ttinó mero vehe Jesús nttiha. 2 Anto daca ẍatte anto tsje chojni ngain Jesús que ni vittjaha nchia vixinhi na co hasta tti ndoja víxin na. Co nttiha Jesús ndache na joajné Dios. 3 Cottimeja nó tti xí tetsengui iná xí que c̈hoha vacji; vintteguicao xa ngain Jesús. 4 Pero c̈hoha vatto na para tti jí Jesús, ixin anto tsje chojni te ngandanguí nchia mé. Mexinxin cjoáso na ngataha nchia co vinttjian na rioho techoe nchia co nttiha joinchexincanjinxin na tti nihi mé conixin ná jino ngain camillé para ngain lugar tti jí Jesús. 5 Co are Jesús vicon queẍén joinchehe na, jehe conohe ixin jehe na vitticaon na que jehe chonda joachaxin. Co Jesús ndac̈ho ngain tti nihi mé:

―Ojointtatjañaha jaha cain tti jianha joinchehe.

6 Co nttiha tate canxion ximaestroe ley Israel, co ẍaxaon xa: 7 “¿Quedonda jañá jinichja xí yá? Ixin ndac̈ho xa nchao nchehe xa cosa que jeho Dios nchao nchehe. ẍonhi quensen nchao nchetjañehe chojni tti jianha que nchehe na; jeho Dios tti nchao nchetjañehe na.” 8 Pero Jesús oconohe tti ẍaxaon ximaestro mé, co ndac̈ho ngain xa:

―¿Quedonda jañá ẍaxaon jaha ra? 9 ¿Quexehe tti icha tanguiha, rrondattjan ná tti nihi: “Ovitjañaha jaha cain tti jianha joinchehe”, o rrondattjan: “Dingattjen, co tsinhi camillá co sattjixin rottea”? 10 Co tsjagoha ra cai ixin janha tti Xí que joixin de ngajni chonda joachaxin ngataha nontte nttihi para nttatjañá chojni tti jianha que nchehe na.

Cottimeja ndac̈ho Jesús ngain tti nihi mé:

11 ―Jaha rrondattjo, dingattjen, co tsinhi camillá co sattji para nchiandoi.

12 Co rato mé vingattjen tti nihi mé, co coame camillé, co vac̈hjexin de nttiha are tatetsjehe ni icha. Co rato mé cainxin chojni que vintte nttiha goan na admirado co joinchesayehe na Dios ixin jehe anto jian co chonda cainxin joachaxin. Co ndache chó na:

―Ẍonhi nttiha vocon na ná cosa janhi.

13 Cottimeja Jesús cjoi ngandehe lago de Galilea iná, co are conchienhe tsje chojni ngain Jesús, jehe joinchecoenhe na de ixin Dios. 14 Co are Jesús sacjoixin de ngandehe lago mé co vatto ngandanguí ná caseté cobro, Jesús vicon nttiha tají ná tattíta vinhi Leví jinchehe cobro nttiha, co ndodé vinhi Alfeo. Jesús ndac̈ho ngain jehe Leví:

―Ẍacoi nganji co rroehna na.

Co Leví vingattjen co sacjoi conixin Jesús.

15 Co después are Jesús tajine ngaxinhi nchiandoha Leví, conchienhe anto tsje xicobrador co icha chojni que vanchehe cosa jianha. Cain chojni mé jinecaho na Jesús conixin cain chojni que vacao ixin anto tsje chojni varroé. 16 Co cai cjoi canxion ximaestroe ley co icanxin xifariseo ngain nchiandoha Leví. Cain chojni mé vicon ixin Jesús jine conixin tsje chojni que nchehe cosa jianha, co ndac̈ho cain xí mé ngain chojni que vacao Jesús:

―¿Quedonda ximaestroa ra jinecaho xa co dicaho xa xicobrador co icha chojni que nchehe cosa jianha?

17 Are Jesús coinhi yá ndac̈ho:

―Chojni que niha, chojni mé rrogondeha xincheẍoan, jeho tti chojni nihi, mé tti rrogondehe xincheẍoan. Mexinxin janha joiha para joinichjá chojni jian, sino que janha joihi para joinichjá chojni que tenchehe jianha.

18 Nchanho mé chojni que vacao Juan co chojni que vacao xifariseo vinttecjáño na. Co icanxin chojni cjoi na ngain Jesús co joanchianguihi na co ndac̈ho na:

―¿Quedonda chojni que ẍicao Juan co chojni que ẍicao xifariseo dinttecjáño na pero chojni que c̈hjiho jaha nahi?

19 Jesús ndac̈ho:

―¿Acaso cain chojni que ttji ngain ná vandango tti tottehe na nchao sinttecjáño na are ẍa nttiha jí xinovio ngain na? Nahi, jehe na c̈hoha sinttecjáno na si ẍa jí xinovio ngain na. 20 Pero are tsí nchanho que xinovio satsjixin de ngain na, cottimeja jehe na chonda que sinttecjáño na.

21 Co Jesús ndac̈ho iyó ejemplo:

―Ẍonhi chojni tteyehe rioho lontto naroa ngain ná lontto nttaxí ixin lontto naroa ndadixehe co ndattinchje lontto nttaxí, co tti diguichje icha tojie. 22 Co cai ẍanttjoa are jidatsoxinhi ẍan, c̈hoha siquia ẍan ngá ná roanẍan onttaxí ixin tsonc̈hintaon ẍan roa mé, co ndasitján ẍanttjoa co ndasitján roanẍan. Mexinxin ẍanttjoa are jidatsoxinhi ẍan, chonda que siquia ẍan ngá ná roanẍan naroaxin para dacaha tsonc̈hintaon ẍan roanẍan mé. Jañá tti costumbre que jaha ra chonda ra jiha de acuerdo ngain tti janha rrindattjo ra.

23 Ná nchanho que nchejogaha ni, Jesús conixin chojni que vacao vatto na ngain canxion jngui tti diguinga trigo, co chojni que vacao Jesús conc̈hinji na canxion ninchjan de trigo para joine na. 24 Co canxion xifariseo vicon xa queẍén tenchehe na. Mexinxin ndac̈ho xa ngain Jesús:

―Tsjexin, ¿quedonda chojni que c̈hjiho nchehe ẍa jai que jiquininxinha nchehe chojni ẍa, ixin jai nchanho para nchejogaha cain chojni?

25 Co Jesús ndac̈ho:

―¿Aẍa tsjeha ra tti jitaxin de ixin queẍén joinchehe David conixin cain xicompañeroe are vechondaha na tomi co venhe na jintta? 26 Are mé Abiatar vehe xidána icha importante, co David joixinhi ngaxinhi nchiandoha Dios co joine niottja que vehe ngataha altar, co jeho xidána jiquininxin para jine niottja mé. Co David chjé chojni que vacao nio cai co joine na nio.

27 Cai ndac̈ho Jesús ngain xa:

―Nchanho que nchejogaha chojni jí nchanho para ixin chojni co jeha chojni te para ixin jehe nchanho mé. 28 Mexinxin cai janha, tti Xí que joixin de ngajni, chonda joachaxin para ngain nchanho que nchejogaha ni.