4
Jesuzi sahac ʒâic manawecte ijaha manahuc sâqocne qikiŋnezo
1 Kristo e sahac ʒâic manawecte ŋoŋe ijaha eniŋte hâbi-ŋeŋic hepie huzejec. Ehuc ʒiŋuc mananʒepieŋ, moc e sahac ʒâic manaekaczi sâqocnere ninikec bâfuaekac. 2 Eme sahacko juju dameŋ-ticne fokac sâc sasecte gie mi bapa Anuture micdâŋ sawa reŋkehuc juzejec. 3 Juwicnao qâpuc wiac ʒiŋuc ehuc jumbiŋ: Wiac gapec tâmiric ee, sasec, opâ momori âmbâŋ nânâ, bec qowi âmbâŋ nânâ, tiwâ sisiricko nânâ, nemu burec kiŋaŋ qaqajare, wiac i hâcne ewarehuc jukupie micne qawec. 4 Eme ʒi ine qâpuc jaŋe sâqocnere ʒâkâŋko fohapie mi qâtec-jopaeŋgopieŋte manapie moc eme mu supaic eŋareeŋgopieŋ. 5 Erâ jaŋe juku jukicne hâmokicne fuŋne-nâŋec bataniŋkeocte ʒawierâ jukac erao dâŋgie baniŋmu. 6 Eme fuŋne ʒiŋucte hâmokicne wâc Biŋebiaŋ jazakicne: Jaŋe ŋifec ŋic hata fokac irec sâcko sahaczi okacne roniŋte, â ŋifec Anuture hata fokac irec sâcko mârozi juniŋte.
Dameŋ bembeŋkekacte ââgo erâ babafic ezo
7 Wiac sasawa irec dameŋ bembeŋkekac. Irec ŋoŋe maŋsowa â pectâc juhuc nunumure afeckenʒepieŋ. 8 Erâ maŋŋeŋiczi jauŋ babac ehuc junʒepieŋ. Maŋjauŋhec juhuc kiŋ bebehec sâcne ezo. 9 Ŋoŋe mutakic tâmiric hezu hewâneŋ eec enʒepieŋ. 10 Ŋoŋe Anutuzi miti mâriri fuŋne fuŋne tahac-ŋopawec, i ŋicne ŋicne foŋarekac sâc aimuŋ bajuhuc bâmec babac â dodopec ehuc junʒepieŋ. 11 Moc e miti muocmu i Anuture dâŋ jâmbâŋ ezejec, moc e gie mucnekicko baocmu ine Anutuzi tâpiri râcneme sâc bazejec. Ŋoŋe iŋuc epie Anuture huriri qâreŋ i Jesu Kristore erâ ŋoŋerao fua tâcnezejec. Eri tatamac â tâpiri i erao foweczi fohuc juocmu sanaŋ. Jâmbomac.
Jesure erâ ʒâic manahuc bubiaŋ bâfuazo
12 Jorocfâc-nane, ŋoŋerao hâbi qaqazure wiac micne momori fuawec fokac, eme ŋoŋe wiac ʒâŋe furu fua-nârekac muhuc bipic tatara mi enʒepieŋ. 13 Ŋoŋe Kristore erâ ʒâic fâro manahuc sâc bubiaŋ bâfuanʒepieŋ, eme juku eri tatamac-ticne fua tâcneme iŋuc jaha bubiaŋ sâko manahuc ʒeri bari eniŋmu. 14 Ŋoŋe Kristo ʒâŋe biŋe-ticnere musoc qâsoriŋ-ŋopapie manapie ʒerine ezejec. Wiac i eŋarepie tatamacte maqâreŋ, Anuture Mâro hâcne, ŋoŋerao waha juocmu. 15 Ŋoŋeraonec moczi ʒikare me fiucte me sindaŋte me penaroŋte ʒika kâpâcwâru faio mi fezejec. 16 Á moc e Kristoŋic jukacte ʒika kâpâcwâru ecnepie ine irec maname mimi busâqochec mi ezejec. E ʒâŋe i bajuhuc Anuture mumuteŋ bâfuazejec. 17 Manaŋgopieŋ, Anutu e fuŋne babataniŋ gie-ticne ŋicfâc-ticne nâŋâcnao fuŋkerâ baocte dameŋne maickekac hâcne. Nâŋâcnao qanaŋ fuŋkerâ baraku Biŋebiaŋ-ticne qikiŋneeŋgopieŋ jaŋerao batarame sâc weniŋucne fuaocmu? 18 Â
“Ŋic tiŋne e okac dameŋko bipic tatara ecnehame
miti qiqikiŋ â sâqocne bapa e wenac eocmu!”
19 Eme irec Anutuzi maname sâckeha fific guguriŋ faio feniŋmu jaŋe maŋ qâqâtâc-jeŋic i bâbâfua mume sasanaŋ erao râehuc eehâmo gie banʒepieŋ.