4
Biŋebiaŋ i foŋne tâmiric
1 Wofuŋ e buafec-ticnere gie iŋucne munârewecte mi pârâweeŋgopeneŋ. 2 Ehuc bahac, mimi fuazacte soŋsoŋko eene, i râpecke-fârembeŋ Me sioc faio juhuc Anuture dâŋ bâbâsifucke i wâc mi eeŋgopeneŋ, aricne Nâŋe Anuture maio miti mutaniŋkehuc ŋic jaŋere maŋ bâmiriŋkepene fuŋne-nâŋec manaeŋgopieŋ. 3 Eme Biŋebiaŋ mueŋgopeneŋ izi foŋnehec moc eekacko ine sisipiricte biŋe jaŋerao sawa foŋnehec eekac. 4 Miti qiqikiŋ jaŋe hâcne mâreŋ ʒirec ŋicbomboŋzi maŋjeŋic bâzickeme wemocko Biŋebiaŋte tatamaczi hume Kristo e Anuture sâc jâmbâŋ jukac muhuc Wofuŋ qâreŋ-ticne ʒâŋitaniŋmu? 5 Nâŋe miti muhuc nâŋe nâŋâcne dâŋ mi ŋazaeŋgopeneŋ, Jesu Kristo eki Wofuŋ â nâŋe ine Jesure erâ kiŋaŋ qaqafâc-ŋeŋic sawa juŋgopeneŋ, iŋuc ŋazaeŋgopeneŋ. 6 Anutu e mârâc jaha fuŋnao dapâc fohame hae mâreŋ fureocte mume furewec, ekizia hâcne mume maŋnâŋecko mitire tatamaczi uŋ heme Kristore ʒâŋe maio Anuture huriri qâreŋ fua tâcneha ʒâŋitambeŋ.
Paulo e wiac hâhâwicnezi maŋ gogoroŋ mi ecnewec
7 Tâpiri ʒâkâŋ i nâŋerao mâcne, Anuturao fokac, irec fuŋne taniŋkeocte boreŋ ʒeŋaŋ-ticne kuʒi mâreŋzi bakicne nâŋerao duckekicne. 8 Hume serereŋ faio juipiehuc sifu docke ʒaŋ mi eeŋgopeneŋ. Bebekâne juipiehuc sifu mi mana utuckeeŋgopeneŋ, 9 fific guguriŋ faio juipiehuc sifu mamac babasa mi eeŋgopeneŋ, qa imac enâre-bipiehapie sifu hâmo sipiric mi eeŋgopeneŋ. 10 Iŋuc ehuc sahac-nâŋecko Jesu hâmoc-ticnere ma amecke jueŋgopeneŋ, i Jesu juju-ticnere ma iŋuc jaha sahac-nâŋecko fuaocte hâcne. 11 Ŋic jaŋe Jesure erâ dameŋ oombâŋko gâbâ sipiric-nâpohuc hâmocko râec-nâpoeŋgopieŋ, i Jesu juju-ticnere tâpirizi sahac hâhâmo-nâŋecko fua taniŋkeocte iŋuc fua-nâreekac. 12 Eme ʒiŋuc fokac: Nâŋerao hâmoczi gie baekac, â ŋoŋerao jujuzi gie baekac.
Paulo e Wofuŋ manasiŋkehuc miti giere mi takickewec
13 Dâŋqâreŋ moc ʒiŋuc fokac: “No Wofuŋ manasiŋkeekopacte miti muekopac.” Eme nâŋe dâŋqâreŋ irec sâcko Mârozi esoc-nâpoha Wofuŋ manasiŋkeeŋgopeneŋte miti mueŋgopeneŋ. 14 Ehuc ʒiŋuc manapaŋkeeŋgopeneŋ: Wofuŋ Jesu bâɋârewec eki nâŋe iŋuc jaha Jesuhec bâɋârec-nâporâ ŋoŋehec mâmâc erao râec-nâpoocmu. 15 Nâŋe wiac sasawa i ŋoŋere erâ kecʒiŋuc muhuc eeŋgopeneŋ: Mitizi haŋ barahame ŋic bocjahazi manahuc Anutu ʒeri mumuteŋ sâko ecnepie Izi ʒuhuckeme ʒuhuc forahuc fozejec.
Mâreŋko ʒâic busâqoc i wawahane
16 Nâŋe ʒiŋuc manahuc mi pârâweeŋgopeneŋ: Sahac-nâŋec bâmuzuckehame maŋnâŋec ʒoaŋne ʒoaŋne soka biaŋ eekac. 17 Mâreŋko ʒâic busâqoc-nâŋec mâmâŋne â tatarane izi eri aŋac biaŋ ŋemâc bâmâcne â fofo sanaŋ bâfua-nârehame guru dindiŋ fonârezokac. 18 Erâ wiac tâtâc fokac irapec mâcne, wiac soŋsoŋ fokac irapec firâ râqârepene i fua-nârezokac. Wiac hohonene izi sisirowene, wiac mi hohonene izi fofo sanaŋ.