13
Bahacdâŋ mumu fuaocmu
1 Ʒi ŋoŋerao mocwâc fâpe jahec â moc eocmu. Fâ fisipe ŋic jajahec me jahec â moczi mocte bahacte fuŋne mupie dâŋticne munaŋmu. 2 Ŋic bahachec â gâcne ŋoŋe mâmâc arecne 2 fâpo ira uŋ ŋazapo ijaha wiwicko juhuc mukopac, ʒi ʒâhec mocwâc fârâ mi akic-ŋopapemu. 3 Nore maŋko dâŋ râeme muekopac Kristo hâcne, ere tâpiri fuame honezo mueŋgopieŋte honenʒepieŋ. Kristo e ŋoŋerao gie-ticne rorokacne mâcne, tâpirihec baekac. 4 Mârâc jâmbomac rokaweme maripoŋko qambiŋ, ʒi ine Anuture tâpirihec faharewec jukac. Nâŋe iŋuc jaha ere erâ rokaweeŋgopeneŋ irec ere erâ wâc Anuture tâpirio ŋesiŋnehuc jujure fuŋne ŋoŋerao bajaŋgeŋkenaŋmu.
Uŋsawaŋ dâŋ
5 Ŋoŋe mamanasiŋhec jueŋgopieŋ me mâcne, irec maŋŋeŋic esâicke honehuc fuŋne bataniŋkenʒepieŋ. Me Jesu Kristozi maŋŋeŋicko juekac irec fârine basaeŋgopieŋ? Iŋuc eeŋgopieŋko sahaczi mitiŋic muŋarezo. 6 Nâŋe ine sahaczi mitiŋic mi jueŋgopeneŋ, iŋuc hone tarac-nâponiŋte worickekopac. 7 Anutuzi soŋaŋ-ŋopame bahac mi bâfuaniŋte numucnehuc jueŋgopeneŋ. Nâŋe honec-nâpopie mitiŋic fârine enaŋmu me mâcne, irec mi mueŋgopeneŋ, ŋoŋe mitidâŋ reŋkepie fârinehec eocte mocjaha mueŋgopeneŋ. 8 Nâŋe iŋucnezi wemocko dâŋfâri râsi ecnenaŋmu, âgo ecnenaŋmu sawa fokac. 9 Nâŋe tâpiri basahuc juhapene ŋoŋe tâpirihec juniŋmu i bunâŋec biaŋkeocmu. Erâ maŋŋeŋiczi soka sanaŋ eocte Wofuŋ numucneeŋgopeneŋ. 10 No ŋoŋerao fârâ ʒâire-ŋarezipore qanaŋ ʒoricko juhuc uŋdâŋ qâreŋke-ŋarekopac. Wofuŋzi tâpiri narewec, izi imac-ŋopapemurâ mâcne, hume keteŋ eŋarepemurâ narewec.
Jambuŋdâŋ
11 Erâ dâŋ mutarahuc kecʒiŋuc mupe: Ŋoŋe bubiaŋko junʒepieŋ, erâ uŋsawaŋ dâŋ manarâ maŋŋeŋic ba emasaŋ enʒepieŋ. Ŋoŋe maŋ mocjaha efârerâ wamao junʒepieŋ. Eme Anutu e maŋjauŋ â wama runezi ŋoŋehec juocmu. 12 Ŋoŋe mitio meo babac efârenʒepieŋ. Ʒirec mitiŋiczi manasuc-ŋopa-fâreŋgopieŋ. 13 Wofuŋ Jesu Kristore aki anonoc â Anuture maŋjauŋ â Tiri Mârore miriŋ i ŋoŋerao fohuc juzejec.