15
Lama qâsoriekicne â moneŋ sifuckekicne
(Mat 18:12-14)
1 Takesi roro â sâqocne bapa Jesurao miti-ticne mananiŋte mâretec fisi jumbieŋ. 2 Epie farisaio â miti qaqazu jaŋe irec manapie sâqoreme Jesure ʒiŋuc mumbiŋ: “Ŋic e sâqocne bapa rocjoparâ iqic-joparâ jaŋehec nânâ nâekac.” 3 Eme irec Jesuzi dâŋ suŋsuŋne moc ʒiŋuc jazawec: 4 “Ŋoŋeraonec moc e lama 100 jucneniŋmu. Eme mocsâkoazi qâsorieme beheocmu me? Aricne, e gâcne sâko 99 tuhuo behec-joparâ qâsoriekicne basaocmu. 5 Basaku bâfuarâ bubiaŋ manahuc âsickerâ 6 haeo fisirâ âgofâcne wira-jarerâ muocmu: ‘Lama-nane qâsoriekicne bâfuakopacte ʒeri enaŋ. 7 No ŋazape mananiŋ, ŋic tiŋne 99 maŋ bâbârisiere mi mumu-jarene jaŋere erâ sambâŋko ʒeri aafecne fuaha sâqocne bapa mocjaha maczi maŋne bârisieme ere erâ sambâŋko ʒeri fekicne fuaocmu.
8 “Ŋokac moczi siliwa moneŋ 10 bajuocmu. Bajuhame mocjaha wahame beheocmu me? Aricne, e waha qazerâ fic ofaŋne qâzuc ehuc basaocmu. 9 Basaku bâfuarâ ŋokac âgofâcne wira-jarerâ ʒiŋuc jazaocmu: ‘Moneŋ-nane sifuckejec i bâfuakopacte ʒeri enaŋ. 10 Mupe mananiŋ, Anuture aŋelofâc jaŋe iŋuc jaha sâqocne bapa mocjahazi mac maŋne bârisieme bubiaŋ manaeŋgopieŋ.”
Motec moc sipirickezo ewec
11 Jesuzi binaŋ moc ʒiŋuc bawec: “Ŋic moc ŋokâ jahec-ticne jajahec jupic. 12 Juku ʒâhec ŋokâzi mamac-ticne ʒiŋuc âzâcnewec: ‘Mamac, go moneŋ mafa nore biŋe qakicne i narec. Mume moneŋ mafa bâtâc barâ jactewec. 13 Eme ʒâhec ŋokâ e gie bapa afecne jurâ mafa wiac-ticne bâmockerâ ame susuckerâ rawec. Erâ ocna sasec gie bahuc nânâ qowire nâ areŋ ehuc moneŋ mafa-ticne ititiŋke-fârewec. 14 Ititiŋke-fârerâ juhame mâreŋ ira roroc sâko fuawec. Eme motec e kitac qatac eku 15 mâreŋ rune moc erao ra qohotame eki mume susubecfâc-ticne soŋaŋ-jopawec. 16 Ehuc bec jaŋere nânâ nâocte ecnewec i wâc sakarecnembiŋ. 17 Iŋuc juku maŋnezi mumu hehec ecneme ʒiŋuc muwec: ‘Mamac-nanere kiŋaŋ qaqa wemo afecne juŋgopieŋ, eme jaŋe nânâ nâqiŋ qâqiŋ ehuc juhapie no ŋokâ-ticnezi ʒira rorocte sipirickezo ekopac. 18 Irec no hae-naneo rarâ mamac-nanerao fisirâ ʒiŋuc muhuc âzâcnezepac: Mamac, no sâqocne bape kiŋnanezi sambâŋko â gorao ŋemâckekac. 19 Irec wemocko ŋokâge mocwâc munarepie jupemu, go mâc kiŋaŋ motecge bacnutec juzepac. 20 Iŋuc murâ ʒawierâ mamac-ticnerao rawec. Raku hae upeo fisihame mamac-ticnezi biac honerâ bune sâqoreme gasacke ra hâpo mumuduc ecnewec. 21 Eme motec e ʒiŋuc âzâcnewec: ‘Mamac, no sâqocne bape kiŋnanezi sambâŋko â gorao ŋemâckekac, irec wemocko ŋokâge mocwâc munarepie jupemu. 22 Iŋuc mume mamac-ticnezi kiŋaŋ motec jazarâ muwec: ‘Ŋoŋe picpac jaha ŋaqi biaŋne jâmbâŋ moc baware hecnepie huoc, â megâŋ menao hecnepie feoc, â kikehuhu mâmâc râcneniŋ. 23 Erâ bulimakao motecne biuc sâko i hezu rikec epie nâhuc ʒeri enʒepeneŋ. 24 Ŋokâ-nane e hâmoweczi mocwâc ɋârekac, erâ e qâsorieweczi mocwâc fuakac. Iŋuc mume ʒeri embiŋ.
25 “Ehame mârâc ŋokâ e gieo juweczi risierâ hae râpeo domahuc gae â ʒeri mic ʒonʒoŋ manarâ 26 kiŋaŋ motec moc ecneme fisime mu wioc ecnerâ muwec: ‘Wiac i wemocte? 27 Eme eki muwec: ‘Ɋage ware fisikac. Eme sahac furu fisikacte mamac-ŋekiczi mume bulimakao motecne biuc sâko i qa rikec eŋgopeneŋ. 28 Iŋuc âzâcneme mârâc ŋokâ e kimbeŋ qarâ haeo feocte qikiŋnewec. Eme mamac-ticnezi manarâ hae upeo hurâ mu bâmiriŋ ecnewec. 29 Ecneme mi mamana ʒiŋuc muwec: ‘Manakic, no jara wemo afecne kiŋaŋ qagarehuc juhuc dâŋge moc mi qatara-gareekopac. Eme go noniŋ motecne mac moc mi qikiŋne-naretec âgofâc-nane jaŋehec nâ ʒeri embeŋ. 30 Á ʒâhec ŋokâge e gore moneŋ mafa sasec gie bahuc sipiricke-fârewec, e iŋucnezi fisime mutec bulimakao motecne biuc sâko i hezu rikec ecneŋgopieŋ. 31 Mume mamacnezi ʒiŋuc âzâcnewec: ‘Ŋokâ-mae, go dameŋ sâc nohec juwareekiczi wiac mi basaekic, wiac sasawa wirec-nâhec fokac. 32 Á ɋage e hâmoweczi mocwâc ɋârekac, erâ e qâsorieweczi mocwâc fuakac, irec ʒeri bubiaŋ epene sâckekac.”