2
1 Lahatala Ana por-alolang anga, burang atela angdo, bot emangpi ba omimi angu ening angu, aulang.
2 Emangpi angu Lahatala Ana vengkarajang sengmuse, ved emi bititu angu Lahatala Ana barinti. 3 Karajang ba Lahatala Ana ening iila ang naung, ved emi bititu angu, Ana bot bae taang ening niang, se emangpi angu, Ana ening sengila angu ebele. Angmuse ved emi bititu angu Lahatala Ana miari, sengilaba ved angu Ana ening hamulang-kadulang. 4a Uanguveng Lahatala Ana por-alolang anga, burang atela angdo, bot emangpi ba omimi angu ening angu, esarenta angu aulang.
Lahatala Ana nehe mehal, bot nehe jangu ening
(Matius 19:4-6; Markus 10:4-9; 1 Korintus 6:16; 15:45, 47; Efesus 5:31-33)
4b Uanguveng LAHATALA Ana por-alolang anga, bot burang atela angdo ening angu, 5-6 dadi-napa, abuar maang, bot te iiba bae aadang-taata angu taang bilang di jedung, se Lahatala Ana bae aanuar metma por-aloalang anga taang at hela jedung, bot nehe iiba bae por-alolang emeke angu vengkarajang jedung angu ebele. Aarunge uanguveng angu, bano-kaana angu por-alolang anga emeke angu taang da, sengilaba por-alolang emeke angu ening abareka. 7 Uanguveng anguba, LAHATALA Ana meke banakung angu kabingdena medi, sengmuse Ana vengkarajang metma nehe nu ening. Bot Lahatala Ana Eeng-hara aabetang angu metma nehe angu aming boor angu mi apu. Angmuse nehe angu aabeta.
8 Seng angmuse ved danangoa angmi, LAHATALA Ana Eden mi bir nu ening. Bot nehe ba Ana ening iila angu, Ana aing metma Eden mi bir angu mi amihing. 9 Angmuse te rupa-rupa ba aalus ae por-alolang taang, bot eihi angu nehe bisa adang, bot tamaa angu, LAHATALA Ana ot bir angu mi bilang. LAHATA Ana bot te rupa aaru ot bir angu ehahama angu, mi bilang. Te rupa nu angu, kalo nehe eihi angu adang se, ini aabetat aulang ejehing-emeang. Aarunge te erupa nu angu, kalo nehe eihi angu adang se, aaung di ini uuling ateing, bot jasi di ini uuling ateing.
10 Bot moar nu ejar angu, ue Eden mi halu, senge bir angu ening abareka. Angmi angu, moar angu ana atang paul baang buta. 11 Moar ehalomang angu, ene Pison. Aing angu halut Hawila aabang eoang angu emangpi migoleng. Angmi angu, mas toang. 12 Mas ba aabang angu mi angu, hamulang. Bot te epuha manema, bot var huling di ue aabang angu mi. 13 Moar emiaaru angu, ene Gihon. Aing angu halut Kus aabang eoang angu emangpi migoleng.* Tura angu, aabang anga ene ꞌKusꞌ. Aarunge angase aing angu, ue negara Etiopia, bot negara Sudan, ba Afrika eved danangoa ang mi angu, eoang mi tila. 14 Moar emitue angu, ene Tigris. Aing angu halut Asyur aabang† Asyur angu ba, angase negara ꞌIrakꞌ angu. eved danangoa angmi, metma Asyur aabang angu eha ening. Moar emibuta angu, ene Efrat.
15 Nehe ba LAHATALA Ana aing ening iila angu, Ana aing metma Eden mi amihing, senge ana bir angu vengurus aaung-aaung. 16 Angmuse LAHATALA Ana parenta anga metma nehe angu at mateng hula, “Te ba ae bir anga omimi anga, emangpi eihi angu, aana bisa adang. 17 Aarunge te nu bir anga ehahama mi tahi, benangba; Te aaung di ue omimi, bot jasi di ue omimi angu, aana ekang eihi angu adang ekang. Kalo aana eihi angu adang se, aana malekang aamina.”
18 LAHATALA Ana bot mateng hula, “Nehe anga kalo ana enangkolang aabeta se, bae aaung niang. Eserang omi vengbaa nu, Na malekang ening metma maenang hengi.”
19-20 Angmuse LAHATALA Ana binanta rupa-rupa ba por-alolang anga taang, bot dung burang mi aalili angu ening, sengmuse LAHATALA Ana emangpi angu iat nehe angu ebele ila, senge nehe angu ana iene maveng. Base, binanta ba eeng-hara veng ae por-alolang anga taang, bot dung ba burang mi aalili ang naung, nehe angu ana nu-nut iene vengbanang tatalang metma mainang angse, iene angu aulang. Binanta rupa-rupa ba aamunang-balevang, bot dung burang mi aalili angu, nehe angu ana iene maveng iila, aarunge aing angu, nehe nu omi vengbaa metma eserang ening angu, ana bae harak jedung.
21 Angmuse LAHATALA Ana nehe angu aing ening ana tiat udut aaneil. Uanguveng nehe angu ana tiat udu sehi muse, LAHATALA Ana abar-kusing angu nu medi, sengmuse emana angu bale eaabua metma vengtering. 22 Nehe angu abar-kusing ba LAHATALA Ana medi angu, Ana vengkarajang metma nehe jangu nu ening, sengmuse nehe jangu angu Lahatala Ana at ila metma nehe angu enang. 23 Uuling nehe jangu angu ateing muse, nehe angu ana mateng hula,
“Yaa! Aing anga hengi! Anga ba nomi vengbaa!
Ekira anga emenghula nekira edadenang.
Bot eaabua anga emenghula neaabua edadenang.
Aing anga nehe mehal mi ba aing medi base, na ene maveng hula, ꞌnehe janguꞌ.”‡ Nehe mehal angu Ibrani ehur mi se hula, ꞌishꞌ. Bot nehe jangu angu hula, ꞌishaꞌ. Base anga mi anga, ini hur kokal angu aboi-aleleng vengbanang hula, “isha (nehe jangu) angu, ish (nehe mehal) mi jadi.”
24 Angu ebele, nehe mehal angu ana malekang iva-imang angu iadu,
senge ila ejangu angu at aabeta,
se oleve angu, aabetat ening nu kolang iila angu ebele.
25 Uanguveng angu, nehe angu ejangu oleve idura, aarunge oleve uuling itateing di, ini bae rasat iava-aaloring niang.
*2:13 Tura angu, aabang anga ene ꞌKusꞌ. Aarunge angase aing angu, ue negara Etiopia, bot negara Sudan, ba Afrika eved danangoa ang mi angu, eoang mi tila.
†2:14 Asyur angu ba, angase negara ꞌIrakꞌ angu.
‡2:23 Nehe mehal angu Ibrani ehur mi se hula, ꞌishꞌ. Bot nehe jangu angu hula, ꞌishaꞌ. Base anga mi anga, ini hur kokal angu aboi-aleleng vengbanang hula, “isha (nehe jangu) angu, ish (nehe mehal) mi jadi.”