Pathien Lekhabu Inthieng Chongtung Thar 1 Peter 1

PETER

Renga Lekhamuthuon Inkhatna

Chongmaruoi

Peter renga Lekhamuthuon Inkhatna hi hitaka, “Pathien a mi thangngei” Khristienngei ai ti, Asia Te Saktieng pumpuia chekinchâia omngei ranga miziek ani. Hi lekhamuthuon hin ai khîn tak chu a porepu ngei'n an taksônna sika dûk mintuonga omngei mohôkna rang ani. Amiziekpu'n a porepu ngei Jisua Khrista Thurchi Sa roi minriet nôkin, a thina, ânthoinôkna, a juong nôkna ranga chongkhâmna sabeina pêkin ai mohôk ani. Hi rietna sikin an dûktongna ngei khom pomin an tuongdier rang ani, mahah an taksônna a dettie minsinna ania, “Jisua Khrista a juong inlâr tika” chu râisânman ipêk nîng an tih, tiin a rilminthâr pe ngei ani. (1:7)

Intakna zora a mohôkna le inruolin, a miziekpu'n a porepu ngei hah Khrista mingei anga om rangin a ngên sa ani.

Asûnga chongtângpuingei

Chogmaruoi 1:1-2

Pathien sanminringna min riet nôkna 1:3-12

Inthienga ring ranga mohôkna 1:13—2:10

Dûktuong zora Khristienngei sinpêl 2:11—4:19

Khristien nunnêmna le chuonsin 5:1-11

Chongkhârna 5:12-14

1 Peter, Jisua Khrista tîrton renga, Pathien ithang, Pontus ram, Galatia ram, Cappadocia ram, Asia ram le Bithynia ram murdia chekinchâia om ngei. 2 Pa Pathien mintuo dungjûiin nangni ngei hah thang nin nia, male Jisua Khrista chong jôm rang le a thisena minthiengin a Ratha'n mi inthiengin nangni sin ani zoi.

Nin chunga moroina le inngêina asipmatin om rese.

Sabeina ring

3 Ei Pumapa Jisua Khrista Pathien le pa chu minpâkin om rese. Ama han a moroina lien sikin thina renga Jisua Khrista kaithoiin ringna thar mi pêka, sabeina ring leh mi minsip zoi. 4 Masikin Pathien'n a mingei ranga rochon satvurna ngei ai dar hah chang rangin ei mântieng ei thîr ani. Ha ngei hah ama'n asiet thei khâiloi, achuoi thei khâiloi le ânmang thei khâloina invâna Pathien'n nin rangin a dar ani. 5 Sanminringna zora nûktaka inlang ranga a darchiena om hah man rangin taksônna sika Pathien sinthotheinân dar nin ni.

6 Masikin râiminsân roi, atûna hin dûk tamtak nin tuong sikin inngûiin la om khom ungla. 7 Nin taksônna adik mo itia nangni minthâr hah an khîn tak ani. Asiet thei rângkachak luo mana meia an minthâr ngâia, nin taksônna rângkachak nêka lut uol ok vang chu asôi theina rangin minsinin ai om rang ani. Hanchu Jisua Khrista ânlâr nikhuo han minpâkna, roiinpuina le chôiminsângna man nin tih. 8 Ama hah la mu tet ngâi no khom ungla nin lungkhama, atûn la mu no khom ungla nin iema, masikin râisâna misîr zoiloi roiinpui takin nin sip ngâi ani, 9 asikchu nin ratha ngei sannminringna nin mana, mahah ama nin taksônna abitak chu ani.

10 Ma sanminringna hah dêipungeiin asadimin an roka an phuola, ma neinunpêk Pathien'n nangni ai pêk rang hah an lei phuong sai ani. 11 Anni han kho zora mo ai tung rang le i-angin mo ai tung rang iti an zong ngâia.* An sûnga Khrista Ratha a om han, Khrista tuong rang tie le roiinpuia a om rang hah chongphuongna an lei dôn ngâi ani. 12 Ma dêipungei kôma han Pathien'n, an sin hah anni inlâpna rang ni loiin, nangni ranga an isin ani iti a min riet zoi. Ha chong hah Ratha Inthieng sinthotheina invân renga thangthei juongtîr, atûna nin iriet Thurchi Sa nangni misîr pe ngei hih an ni. Ma neinunngei hah vântîrtonngei luo khomin riet an nuom ngâi ani.

Inthienga om ranga koina

13 Masikin nin mindonna hah sintho ranga inthoksaiin inningchienin om roi. Khrista a juong inlâr tika satvurna nangni pêk rang hah sabei phar roi. 14 Pathien chong jôm ungla, male ite rietloia nin om lâia nin ôina ngei han nin ringnunngei ajêk rangin inphal no roi. 15 Manêkin, nangni koipu Pathien ânthieng ang han nin thona murdia inthieng roi. 16 Pathien lekhabu'n, “Keima kên thieng sikin inthieng roi,” ai ti ang han.

17 Hanchu mi murdi an sintho dungjûia ân-angnata roijêk ngâipu Pathien kôm chubai nin thôn, O Pa, nin ti ngâiin chu rammuola nin lêng kâr chu ama rangin mân inthieng thôn om roi. 18 Nin richibulngeiin nangni an pêk, nin nunchan mangmunboi renga hah, neinun asiet thei sumdâr le rângkachaka minjôk ni mak chei ti nin rieta; 19 belrite demnaboi aninônchu achâina boitêt anga, Khrista inbôlna manlutaka ratan nin nih. 20 Ama hah rammuol insieng mân renga Pathien'n a lei thangsai, le hi sûn nûktak ngeia hin nangni sikin inlangin ai om ani. 21 Ama sikin thina renga a kaithoipu le roiinpuina pêkpu Pathien hah nin iema; maleh masikin nin taksônna le nin sabeina ngei hah Pathien chunga mindetin ai om ani.

22 Atûn chu chongtak nin jômna sikin nin champui iempungei lungkham tatak rangin nangni nanâkin nin inthieng zoi sikin nin mulungrîl murdi'n inkhat le inkhat inlungkham inlôm roi.† 23 Athithei ni loiin, athitheiloi nulepa renga nâingei anghan, Pathien chong ring kumtuong chongbâi renga suok nôk nin nih. 24 Pathien lekhabu'n:

“Miriem murdi hih sûl angin an nia,

an roiinpuina ngei khom rama pârngei angin an ni.

Sûlngei chu athêma, male a pârngei atâka,

25 aniatachu, Pumapa chong chu tuonsôtin aom tit ani,” ai ti anghan. Hi chong hih, Thurchi Sa nin kôma an phuong hah ani.

*1:11 1:11 kho zora mo ai tung rang le i-angin mo ai tung rang; aninônchu mahah tumo ani rang le tikamo a juong rang.

1:16 1:16: Och 11:44,45; 19:2

†1:22 1:22: nin mulungrîl murdi'n; miziek senkhat chu mulung inthieng leh.

1:24 1:24,25: Isa 40:6-8 (LXX)