1 Yesu tenem tupwa ne ye laugabaei kabo maiyana hekahekatao se uyoma yona magai Nasaleta unai. 2 Sabati mayadaina ye hekalo, na ye hetubu ye lauhekata sunago kalonawai. Boda maudoidi yona hedehedede se lapui ede se nokoei. Se henahenamaiꞌuyoidi se wane, “Tamowai ta haedi ginauli maudoidi ta ye kaipateidi yo sibasiba ta haedi ye hai? Idohagi na teina laulau gigigigibwalidi ta ye ginaulidi? 3 Iya meta kapenta. Yo hinage Maliya natuna, na kana kahao ede Yamesi, Yosepa, Yudasi yo Simona. Na lounao hinage maiyadao ta miyamiya.” Unai ede se laukwatakwataei.

4 Na Yesu ye hededelau udiyedi ye wane, “Magai maudoidi peloweta se hekasisiyei, na yona magai tamowaidi yo kana bogao yo kehanao nige se hekasisiyei.” 5 Ede magai wa unai nige gonowana laulau gigibwalina hesau ye ginauli, na nimana ye tolesae tamowai kasikasiyebwadi hisa mo udiyedi na se namwanamwa. 6a Yesu ye nokokalili, matawuwuna ede yona magai tamowaidi nige se sunumaei.

6b Na Yesu ye lau magai gagilidi udiyedi tamowai ye hekatadi.

7 Na kabo Saudoudoi-labui wa ye yoganeidi bena labui labui ye hetamalidi. Iya yona gigibwali ye moseidi na unai kabo yaluwa yabayababadi se hededehepesadi. 8 Na kabo ye guguyaidi ye wane, “Tabu ginauli hesau kwa laubahei yomi kabalau ne unai, na tuke mo. Tabu kami kai, yomi tobwa yo moni kwa bahebaheidi. 9 Na gonowana mo buti kwa likwadi, na tabu kami kwama hagahagadi kwa baheidi.” 10 Na ye hededeꞌuyo ye wane, “Kaiteya numa unai se yoganeigomiu na kwa mwalaesae, meta unai kwa miya ye lau ee magai me kwa laugabaei. 11 Ena kaiteya magai nige se yogaisinigomiu, yo yomi hedehedede nige se lapuidi, meta kwa laugabaei na kaemiu nagalidi mo kwa koinihinihiyedi.* Dius tamowaidi, ena se lau dagela tamowaidi yodi tano se laugabaedi, siya bena kadi buti yo kwama udiyedi nagali se koinihinihinamwanamwaedi, matawuwuna se nuwatuidi meta dagela tamowaidi yo yodi tano se biki. Yesu yona hekahekatao ye hededelau udiyedi teina laulau kesekesegana ta bena se ginaginauli Dius tamowaidi Yaubada yona wasa se tolehesuwala udiyedi. Teina ye hemasalaha meta Yaubada ye nuwatuidi meta se biki doha dagela tamowaidiyao. Unai kabo ye hekamkamnadi, ena nige nuwadi se buidi. Temeta ye hemala magai ne yodi hekihekinoi.”

12 Yesu yona hekahekatao wa se pesa se lau, se lauguguya bena tamowai nuwadi se buidi. 13 Yaluwa yabayababadi gwaudi se hededehepesadi, na bunama unai taukasikasiyebwa gwaudi se heyausidi yo se henamwanamwadi.

14 Heloda wasawasa Yesu wasana ye lapui, matawuwuna Yesu hesana wa tamowai maudoidi kabina se kata. Hekadi se wane, “Nuwana Yowane Babatiso iya boita unai ye toloꞌuyoma, unai ede paisowa gigigigibwalidi ye hemasalahadi.” 15 Hekadi se wane, “Nuwana Eliya”, yo hekadi se wane, “Nuwana peloweta hesau, yo doha peloweta bagubagunadi wa hesau.” 16 Na huyana Heloda wasa wa ye lapui meta ye wane, “Yesu ede Yowane. Iya gadona ya boliyako, na boita unai ye toloꞌuyoma.”

17 Matawuwuna Heloda ye bom ye hededeyako unai Yowane se hai na se kau na se tole numatutugudu unai. Yona ginaulina matawuwuna ede Helodiyasi. Helodiyasi meta Heloda yona saeya Pilipo mwanena, na Heloda ye tawasolai. 18 Unai Yowane ye hedehededelau Heloda unai, ye wane, “Kowa laugagayo ku utusi, taba tabu kam kaha mwanena ku tawatawasolai.” 19 Unai ede Helodiyasi ye kouyalayalakalili, na ye henuwa bena Yowane ye unuhemwaloi. Na iyamo nige gonowana ye ginauli, 20 matawuwuna Heloda Yowane ye kitalobai meta tamowai dudulaina yo tamowai tabuna, unai ye hekasisikaliliyei yo ye kitahetetenamwanamwaei. Huya badobado Heloda Yowane yona hedehedede wa ye lapuidi meta nuwana ye haikabi, na iyamo ye henuwakalili bena ye lapulapulau Yowane unai.

21 Nige bayaona kabo Helodiyasi yona nuwatu wa mayadaina ye lage. Heloda yona huyalabasi unai henuwaisini ye ginauli maiyanao tamowai lakilakidi yo iyala babadadi yo Galili babadadi hekadiyo. 22 Helodiyasi natuna waihiu, iya kabo ye lau siya matadiwai ye sobu. Heloda yo kana taumanao nuwadi se namwakalili, unai wasawasa wa ye hededelau wawaya waihiu wa unai, ye wane, “Kowa kam henuhenuwa saha? Kabo ya ginauli, yo kabo ya leyawa.” 23 Na ye hededehesunuma ye wane, “Ginauli saha ku kaibwadai meta kabo ya leyawa yom. Gonogonowana doha yogu basileiya ta tehana, ena ku henuwa.”

24 Waihiu wa kabo ye lau sinana unai ye henamai, ye wane, “Saha kabo ya kaibwadai?” Helodiyasi ye wane, “Yowane Babatiso kulukuluna.” 25 Ede ye laumwamwayau ye uyo wasawasa wa unai na ye kaibwadalau unai ye wane, “Yau yogu kaibwada ede teina: Mahana ta unai Yowane Babatiso kulukuluna gaeba unai ku usaei na ku haiyama.”

26 Wasawasa wa nuwana ye yababakalili, na nige saha hesau ye hedede, matawuwuna kana taumanao yona hedehededehesunuma wa se lapuiyako. 27 Wasawasa wa taukaiꞌunu hesau ye lauhelili ye wane, “Yowane kulukuluna ku baheiyama.” Iya kabo ye lau numatutugudu unai na Yowane gadona ye boli utusi 28 na kulukuluna wa gaeba unai ye usaei na ye baheiyama ye mosei waihiu wa unai. Na ye baheilaei sinana wa unai. 29 Huyana Yowane yona hekahekatao wasa se lapui ede se laoma, taugaibuna mo se bahei se laei bwayabwaya unai se tole.

30 Apostolo se lagegogoma Yesu unai, yodi paisowa yo yodi lauhekata wasadi yona se hedehedede. 31 Na tamowai se badokalili se hemohemode, unai nige gonowana bena se kaikai. Ede Yesu ye wane, “Kwa laoma, kita ta bom ta lau teha hesau unai. Temenai kabo ta kaiyawasi huyakubwakubwa.”

32 Siya se bom waga unai se gelu se lau balabala hesau unai. 33 Yodi kabalau ne meta tamowai gwaudi se kitayako yo se kitalobaidiko. Unai magai maudoidi se laugabaedi na se heloi na se lagebaguna Yesu yona kabalage wa unai. 34 Yesu kabo ye dunasae ede bodalakilaki ye kitadi na ye katekamkamnaedi, matawuwuna ede siya doha mamoe nige taukitahetetedi. Unai kabo ye hetubu ginauli maudoidi ye hekatadi. 35 Mahana ye talukeo, ede yona hekahekatao wa se lau iya unai na se wane, “Teina ta balabala, yo mahana ye laukalili. 36 Gonowana taba ku hetamalidi se lau dedekawai kasa gagilidi yo magai udiyedi na kadi kai se hemaisa.” 37 Na Yesu ye hededelau udiyedi ye wane, “Komiu kadi kai kwa moseidi.” Siya kabo se henamaiyei se wane, “Haedi kabo denali 200* Denali 200 meta tamowai kesega taba ye paisowa waikena badona haligigi-haiyona unai gonowana kabo tenem moni lakilakina ne ye lobai ye hemala maisana. ka hai na kadi kai ka lokune yo ka hekaidi?” 38 Unai kabo ye wane, “Hage, kwa kita, pwalawa hisa kalimiuyena?” Apostolo kabo se lau pwalawa se wase na se lobaidi ede se uyoma Yesu unai na se wane, “Pwalawa haligigi yo yama labui.” 39 Kabo ye hededelau udiyedi ye wane, “Tamowai maudoidi kwa hedede bena se tuligogoi lagau ne unai.” 40 Kabo se tulinamwanamwa, pwalu hekadi 100 yo pwalu hekadi 50. 41 Yesu kabo pwalawa haligigi yo yama labui ye haidi, ye kitasae galewa unai, na Yaubada ye lautokiyei. Na kabo pwalawa ye kihihegahegagili na ye moseidi yona hekahekatao kalidiwai. Siya kabo se soiyei tamowai wa kalidiwai. Na hinage yama labui ye kihihegahegagili na ye moseidi se kai. 42 Na maudoidi se kaikai yo bogadi se sese. 43 Yesu yona hekahekatao kaitole wa se tanogogoidi, meta bosa saudoudoi-labui se hemwayaudi. 44 Na taukaikai badodi meta 5,000.

45 Yesu yona hekahekatao ye hegelumwamwayauyedi bena se kawasibaguna se lau Betesaida, na kabo boda wa ye hetamalidi se lau. 46 Na kabo ye sae koya tupina hesau unai ye tapwalolo. 47 Boniyaina ne unai meta waga wa sola waila duwaduwalina unai ye laulau, na Yesu ye bom mo tano wa unai ye miyamiya. 48 Na ye kitadi wose unai se kabikabiꞌuseidi, matawuwuna ede yaumai ye bayao yo hinage se wosematai. Malatomtom gagilina Galili Gabwana kewana ne unai ye laulau udiyedi, na bena kabo ye laugabaedi. 49 Na huyana se kita waila unai ye laulau ede yodi nuwatu bena kaiyabu na se yogahi, 50 matawuwuna maudoidi iya se kita na se matausikalili. Na ye hededelau udiyedi ye wane, “Nuwamiu se talu. Doha yau. Tabu kwa matausi!” 51 Na kabo ye gelusae waga wa unai maiyanao, na yaumai wa ye kaiyawasi. Siya kabo se nokokalili, 52 matawuwuna pwalawa haligigi laulauna wa nige se nuwatulobai, na nuwadi se kwailolo.

53 Se kawasigehe ede se duna Genesaleta unai, na menai yodi waga se lowoni. 54 Huyana waga se pesagabaei meta tamowai hekadi Yesu se kitalobai, 55 ede magai wa maudoina se tauhetakikili. Kabo taukasikasiyebwa se baheidi diyadiyali udiyedi, na ena Yesu wasana se lapui yona kabalau haedi meta se laedi temenai. 56 Yesu yona kabalau ne udiyedi—magai gagilidi o magai lakilakidi udiyedi—tamowai kasikasiyebwadi se toledi yodi kabamaketi bakubakudiyao udiyedi. Se kaikaibwadai bena kana kwama dedekanawai se kabilau, na siya kaiteyadi se kabilau unai wa kabo se namwanamwa.