1 David egisde gusad: “¿Saúl-gwenadgan wis-gudii be dakmala? Ade, Jonatán an-ai-nuedga gussoggu, a-nukad an egi nabir binsabied.”

2 Dule-gwensak Saúl-neguyagi arbadigusad gudii daklealid. A-dulede, Sibaʼye-nugad. Davidʼse dagega geb Sibaʼse gorlenaded. Siba nonigua, Rey-David ese egisded:

—¿Be, Siba?

Abin-sogded:

—Eye, Dummad. Sogdena, ibu bega imakbi be an-abege.

3 Rey-David ega sogdebalid:

—¿Saúl-e-gwenad-gwensak-gudii be dake? Ar Bab-Dummad-emar-wiledakmaid-nuggi an ega ibmar-nued oyobienad.

Siba, Rey-David-abin sogded:

—Unnila Jonatán-e-machibi gudiid, e-mali abinbela bonigwaled.

4 Rey-David ese egisdebalid:

—¿A-dule bia gudii?

Siba abin-sogdebalid:

—Jonatán-e-machi, Lodebar-neggweburgi gudiid. Amiel-machi-Maquir-e-neggi maid.

5 Rey-David, Mefiboset-sedamalaga Lodebar-neggweburse, Amiel-machi-Maquir-negse dulemar-barmisad. 6 Mefiboset, David-asabin nonigua, napa-nagase dulluu imaksad. Mefibosetʼde Jonatán-machid. Jonatánʼdi, Saúl-machi-gumogad. David, Mefibosetʼga sogded:

—¡Mefiboset!

Mefiboset abin-imakded:

—Degite, sogdeen dummad.

7 David ega sogdebalid:

—Mer be an-dobguo. Be-bab-Jonatán-nuggi innikigwadba ibmar-nued an wile be-dakedgi bega imako. Nainumar-nanaid, be-dad-Saúlʼgad, gannar an bega uko. Bedi, be anba mas-gundii guo.

8 Mefiboset, David-abin gannar-dulluu-naded, geb ega sogdemogad:

—Dummad, ¿ibiga be nabir angi nued binsae? Ar ande, ibmar-isgana-milemaiyob gued.

9 Agine, Rey-David, Saúlʼga-ibmar-akwedid-Sibaʼse goted. Geb ega sogded:

—Be-dummad-e-machi-Mefibosetʼga ibmar-bela-Saúlʼgadga-gusadi, negmarse-bakar, bela ega be uke. 10 Degisoggu, Mefibosetʼga be e-nainumargi arbadii guo, be-masmala ega arbamogo, degi, be-maiga-gudimaladse-bakar, ega-arbamogo. Ibmar-gwag-gulleged-sanmakmalad welealile, ega nue sabomalo, be-dummad-e-machi nabir mas-gundii guegar. Be-dummad-e-machi-Mefibosetʼdi, bane-bane anba mas-gundii guoed.

Sibaʼde, masmala-warambe-gakatar (15) nikad, degi, e-maiga-gudimalad e-dulagwen (20) nikabalid. 11 Siba, Rey-David-abin sogded:

—An-dummad-rey, an be-maiga-gusoggu, be anga-igar-mesnaidba, an ibmar-imako.

Mefiboset, igi rey-masmala mas-gundidamala, deyobi Rey-Davidʼba mas-gundii gussunnad. 12 Mefiboset machi-bipigwad-wargwen nikad, Micaíaʼye nugad. Bela Siba-neggi-gudimalad, Mefiboset-e-maiga gudimalad. 13 Degine, Mefiboset, muya-muya-nanasoggu, Jerusalén-neggweburgi gudii dasunnad, ade, Rey-Davidʼba bane-bane mas gundii daed.