1 Deunni, ibagan-nasadgine, orosgi-dakleged-welenaidgi, Sansón sibad-bipi suar, e-omese nadegusad. Mosgua, weyob sogdapid:

—An-ome-dakega e-gabedse an dognagwelo.

Degi-inigwele, ome-e-bab Sansón-dogega gwen imaksasulid. 2 Degi, ome-e-bab ega sogded:

—Andi sae-ome-dakye an be-bied. Aga an be-aiga uksad. ¿Degi-inigwele, ar e-urba-bipigwad bur-yeer daklesursi? A be nikusunna, e-ior-anar.

3 Degidgi, Sansón dulemarga sogded:

—An Filistea-dulemar naibi-imaksar, bar angin-surdo.

4 Degidgi, Sansón nadgua, waladulataled-ilapaa (300) achu-bunnu-wawaad-asdubingiid-gasad, degi, abin-abin e-bunnumargi edichabalid. Geb degine, e-bunnumar-abin-abin-atinnar-nanaid-irbali egi war-wargwen acha-gwallumar nasiksad. 5 Geb agi, Sansón, asdubingiid-achu-bunnumargi-acha-gwallumar-nanaid ogasad. Geb degidgi Sansón, Filistea-dulemar-ibmar-digar-nanaidba achu-asdubingiid indaksad. Geb na duurmakdemargu, bela ibmar-gwag-welear-bubukwad ogumaksad, degi, amba ibmar-gwag-yoo-welemalad bela ogumaksabalid, degine, uva-nainumarse-bakar, olivo-nainumarse-bakar, ogumaksabalid.

6 Geb degine, Filistea-dulemar egichiarmalad: “¿Doa-we ogumaksa?”

Ega sogdemalad: “Timnat-dule-e-sapin-Sansón, ogumaksa. Ar e-sakde, Sansón-ibe dule-baidga ome-uksad.”

Geb degidbali, Filistea-dulemar nadegusmalad. Agine, Sansón-ome-ogumakar oburgwismalad, degi, ome-e-bab-ogumakar oburgwismarbalid.

7 Ar Sansón Filistea-dulemarga weyob sogsa gusad: “Weyob bemar an-imaksamarsoggu, inniki an bemarga soged: An bemar-buged-mai-imakedse geb an bogilegoed.”

8 Agala, Sansón urwedigi amargi gwichigusad. Bukidar a-Filistea-dulemar-ogilosad. Geb a-sorba, Sansón, Etam-akwasailagi yaa-ollor-siidse megnaded.

9 Filistea-sordamar Judá-yargi danar-danar ambikudapmalad, bela Lehiʼye-neg-nugadgi aisakis ambikusmalad 10 Judáʼginmalad Filistea-sordamarse egichiarmalad:

—¿Ibiga be anmargi bila-onodanimala?

Filistea-sordamar abin-sogdemalad:

—Anmar Sansón-gaega danimala. Igi-anmar-imaksamoga, deyob anmar imakmogoed.

11 Judá-sordamar degi-itosmargua, milipaa (3,000) Etam-akwasaila-yaa-ollor-siidse nadmalad. Geb Sansónʼga sogdapmalad:

—¿Filistea-dulemar anmargi-obined be wissursi? ¿Ibiga weyob be anmarga boni-onosa?

Sansón amar-abin sogded:

—Ar igi-Filistea-dulemar-an-imaksa, unnila deyob an imaksamogad.

12 Degidgi, Judá-sordamar ega sogdemalad:

—Anmar be-gadanimar, Filistea-sordamarga be-ukegar.

Sansón, Judá-dulemar-abin sogded:

—Be anga ise-sogar-sogmalo, bemar an-iblogosurye.

13 Judá-dulemar abin-sogdemalad:

—Suli, anmar be-iblogosuli. Unnila anmar be-gaogu, geb Filistea-sordamarga anmar be-ukoed.

Degine, urdub-binid-gibogi edichamalad. Geb agi, Sansón akwasaila-yaba-siidgi onosmalad.

14 Lehiʼye-neg-nugadse mosmargu, Filistea-dulemar binnasur-oimakar abin ainiarmalad. Degidgine, Bab-Jehová-Burba gandiki Sansón-imaknonikid. E-argangi urdub-atinnaled e-abin dub-nunudyob itirided. 15 Sansón moli-uayasuid-e-aku-gar-bini-binid susgua, agi, miligwen (1,000) Filistea-sordamar-ogilosad. 16 Degidgi, Sansón sogded:

17 Sansón deyob-sognaid bergusgua, moli-uayasuid-e-aku-gar meted. Geb Ramat-Lehiʼye a-neg onug-imaksad.

18 Sansón bela-belad uku-uku itosoggua, Bab-Jehováʼse gandikidba goted:

“Bab-Dummad, an-isdarmaladgi-nakwega be an-imaksad. Degite, ¿igi emisgindi, uku-uku-itogedba be an-oburgosunna? ¿Igi be dulemar-abgan-uka-duku-sikarsurmaladga an-ukbalosunna? Adi sulirgebed.”

19 Degidgine, Bab-Dummad Lehiʼye-neg-nugadgi yaa-dummad-maidgi yaa egasad. Agi, dii aryoalid. Geb Sansón dii-gobsagu, na gannaleded. Aga, we-dian En-Hacoreʼye nuggusad. Emi, we-garda-narmaklenaidse Lehiʼye-neg-nugadgi a-dian amba maid.

20 Filistea-dulemar-gandik-bukmalad-ibagangi, Sansón birga-dulagwen (20) Israel-dulemarga negsesad.