35
Eliú-sunmaked-ilapaagwad
1 Eliú sunmakdebalid, weyob sogded:
2 “Job, nabir ibmar-sognaiye be sogsunde, bede soged:
‘Bab-Dummadba bur an ibmar innikii imakdiiye.’
3 Emisgindi, be Bab-Dummadga weyob sogbalid:
‘¿An isguye sogele, akarsi?
An-isguedde, ¿igi-be-imaksunna?’
4 Job, degiir nabir, an bega ibmar soggwelo,
be-aimarga an ibmar sogmogwelo.
5 Niba be atakena, nue nuu be dakena,
mogir-naid be dakena.
6 Ar be isguye-sogele, ¿ibugi be Bab-Dummad oakalogosunna?
Ar be ichesur isgudisogele, gwen be Bab-Dummad-oakalogosulid.
7 Ar be nued-ibmar-imakdiiye sogele, Bab-Dummadga ¿ibu be ukosunna?
Ar Bab-Dummad egi ibmar-nued amiosulid.
8 Ar be ibmar-isgana imakdibe, be ibmar-nued imakdibe,
unnila be-abargi-gudimaladi, beba wilegoed.
9 ”Ar neg nue-isgusnaisoggua, dulemar na bendakleged amidimalad.
Dule-bulegan-emar-wionaidgi-noegala, bendakleged egisnanaid.
10 Degi-inigwele, dule gwen sogsulid:
‘Bia Bab-Dummad-an-obinnisad nadye.
Mutikidba an-niga-ogannoardaedi,
11 ibmar-durganba, bur ibmar-wisi-anmar-imakedi, ¿bia nadsunye?
Sikwimarba bur binsaed-nued-anga-ukedi, ¿bia nadsunye?’
12 Ar dulemar Babse gornanai-inigwele, dule-isganamarsoggu, na san-odummogedginbi binsadimarsoggu,
a-ulale, Bab-Dummad we-dulemar-abin-imaksulid.
13 A-ulale, Bab-Dummad-Bela-Gangued-Nikadi, binsarsunna-ibmar-egisnanaid itosulid,
Bab-Dummad a-dulemar baisur-daked.
14 Amba be sogdibe: ‘An Bab-Dummad daksurye,’
degi-inigwele, amba be-igar itolegedsegad,
degisoggu, be Bab-Dummad-edarbedsegad.
15 Bede soged, ‘Bab-Dummad wissur-urweye,
wissur-emar-sabsur-odurdakye, degine, ibmar-isgana baisurdakye.’
16 Job, be yogasaar sunmaked,
binsa-ee-be gwichid, binsaedsuli be sunmaked.”